Read La Bible en Sango courant – Mbeti ti Nzapa 2 Agbia 15 Bible Online

2 Agbia 15 - La Bible en Sango courant – Mbeti ti Nzapa bible

2 Agbia 15

¹Na ngu baleuse na mbarambara ni so Yeroboam ayeke gbia ti Israel laa Azaria, molenge ti Amasia aga gbia ti Juda.

²Azaria ayeke na ngu baleoko na omene si lo ga gbia; lo le-gbia ngu baleoku na use na Jérusalem. Iri ti mama ti lo ayeke Yekolia, zo ti Jérusalem.

³Azaria asara ye so ayeke mbirimbiri na le ti *KOTA GBIA gi tongana ti so babâ ti lo Amasia asara.

⁴Me ando so azo aleke na ndö ti ahoto ti voro anzapa nde daa so, lo zi ni pepe; azo angba ti gue kâ ti mu *asandaga na ti zö dukani.

⁵KOTA GBIA abi sioni kobela na tere ti Azaria: lo ga zo ti buruma; lo ngba zo ti buruma ni ngbii lo kui na ni, lo lango gi lo oko na ya ti mbeni da nde. Molenge ti lo Yotam, makonzi ti aye ti yangbo ti gbia laa ayeke sara komandema na ndö ti kodro-gbia ni.

⁶Tanga ti atënë na ndö ti Azaria, na aye so kue lo sara, a su tënë ni na ya ti “Mbeti ti aye so agbia ti Juda asara”.

⁷Azaria akui, lo hon na peko ti ababâ ti lo si a lu lo na tere ti ababâ ti lo na Gbata ti David. Molenge ti lo Yotam laa aga gbia na peko ti lo.

⁸Na ngu baleota na miombe ni so Azaria ayeke gbia ti Juda laa Zakarii, molenge ti Yeroboam aga gbia ti Israel na Samarii. Lo le-gbia nze omene.

⁹Lo sara ye so ayeke sioni na le ti *KOTA GBIA gi tongana ti akotara ti lo. Siokpari so Yeroboam, molenge ti Nebat apusu lani azo ti Israel si ala sara so, Zakarii azia lege ni pepe.

¹⁰Shalum, molenge ti Yabesh aleke tënë na hondengo ni na tere ti lo. Shalum apika lo na le ti azo kue, lo fâ lo si lo ga gbia na peko ti lo.

¹¹Tanga ti atënë na ndö ti Zakarii, a su ni na ya ti “Mbeti ti aye so agbia ti Israel asara”.

¹²Nilaa ye ni kue asi alingbi na tënë so KOTA GBIA atene ando na Yehu, atene: “Fade *ahale ti mo ayeke duti na ndö ti mbata ti gbia ti Israel ngbii asi na molongo osio ni.”

¹³Na ngu baleota na gumbaya ni so Azaria ayeke gbia ti Juda laa Shalum, molenge ti Yabesh aga gbia. Lo le-gbia nze oko na Samarii.

¹⁴Menahem, molenge ti Gadi alondo na gbata ti Tirsa aga na Samarii. Lo pika Shalum, molenge ti Yabesh, lo fâ lo si lo ga gbia na peko ti lo.

¹⁵Tanga ti atënë na ndö ti Shalum na tënë so lo leke na hondengo ni na tere ti Zakarii, a su tënë ni na ya ti “Mbeti ti aye so agbia ti Israel asara”.

¹⁶Na ngoi ni so, Menahem ague ti tiri bira na gbata ti Tifsa. Lo fâ azo ti gbata ni kue; lo fâ nga azo ti kodro so kue angoro gbata ni, ti londo na Tirsa ngbii asi na Tifsa. Lo sara bira na gbata ti Tifsa, ngbanga ti so azo ni azi ayanga ti gbata ti ala na lo pepe. Kâ, lo suru nga ya ti amama ti ngo kue.

¹⁷Na ngu baleota na gumbaya ni so Azaria ayeke gbia ti Juda laa Menahem, molenge ti Gadi aga gbia ti Israel. Lo le-gbia ngu baleoko na Samarii.

¹⁸Lo sara ye so ayeke sioni na le ti *KOTA GBIA. Siokpari so Yeroboam, molenge ti Nebat apusu lani azo ti Israel si ala sara so, na lango ti fini ti lo kue, lo zia lege ni pepe.

¹⁹Pul, gbia ti Asirii ali ti sara bira na sese ti Israel. Tongaso Menahem amu na lo wen ti nginza so nengo ni ayeke kilo saki baleota titene Pul amu na lo maboko si komandema ti lo akpengba.

²⁰Titene Menahem awara nginza so, lo hunda na azo ti mosoro ti Israel kue ti futa mbeni lapo. Zo oko oko ayeke mu le ti nginza baleoku titene a mu na gbia ti Asirii. Na peko ti so ala mu nginza ni na gbia ti Sirii awe, lo londo na sese ti Israel si lo kiri na kodro ti lo.

²¹Tanga ti atënë na ndö ti Menahem na aye so kue lo sara, a su tënë ni na ya ti “Mbeti ti aye so agbia ti Israel asara”.

²²Na pekoni, Menahem akui, lo hon na peko ti ababâ ti lo. Molenge ti lo Pekahia laa aga gbia na peko ti lo.

²³Na ngu baleoku ni so Azaria ayeke gbia ti Juda laa Pekahia, molenge ti Menahem aga gbia ti Israel na Samarii. Lo le-gbia ngu use.

²⁴Lo sara ye so ayeke sioni na le ti *KOTA GBIA. Siokpari so Yeroboam, molenge ti Nebat apusu lani azo ti Israel si ala sara so, lo zia lege ni pepe.

²⁵Peka, molenge ti Remalia ayeke mbeni turugu ti kota kamba ti gbia ni. Peka aleke tënë na hondengo ni na tere ti lo. Lo mu azo ti Galaad baleoku na tere ti lo si lo gue, lo fâ Pekahia; lo fâ nga Argob na Arie na ya ti mbeni kubu ti yangbo ti gbia. Tongana lo fâ Pekahia awe, lo ga gbia na peko ti lo.

²⁶Tanga ti atënë na ndö ti Pekahia na aye so kue lo sara, a su tënë ni na ya ti “Mbeti ti aye so agbia ti Israel asara”.

²⁷Na ngu baleoku na use ni so Azaria ayeke gbia ti Juda laa Peka, molenge ti Remalia aga gbia ti Israel na Samarii. Lo le-gbia ngu baleuse.

²⁸Lo sara ye so ayeke sioni na le ti *KOTA GBIA. Siokpari so Yeroboam, molenge ti Nebat apusu lani azo ti Israel si ala sara so, lo zia lege ni pepe.

²⁹Na ngoi so Peka ayeke gbia ti Israel, Teglat-Falasar, gbia ti Sirii aga si lo mu agbata tongana: Iyon, Abel-Bet-Maaka, Yanoa, Kedesh na Hasor. Lo mu nga sese ti Galaad, ti Galile na ti Neftali kue. Lo gbu azo ti agbata ni si lo gue na ala na kodro ti Asirii.

³⁰Osée, molenge ti Ela aleke tënë na hondengo ni na tere ti Peka, molenge ti Remalia. Lo fâ Peka si lo ga gbia na peko ti lo. Lo fâ lo na ngu baleuse ni so Yotam, molenge ti Azaria ayeke gbia ti Juda.

³¹Tanga ti atënë na ndö ti Peka na aye so kue lo sara, a su tënë ni na ya ti “Mbeti ti aye so agbia ti Israel asara”.

³²Na ngu use ni so Peka, molenge ti Remalia ayeke gbia ti Israel laa Yotam, molenge ti Azaria, gbia ti Juda, aga gbia.

³³Lo yeke na ngu baleuse na oku si lo ga gbia; lo le-gbia ngu baleoko na omene na Jérusalem. Iri ti mama ti lo ayeke Yerusha, molenge ti Sadok.

³⁴Yotam asara ye so ayeke mbirimbiri na le ti *KOTA GBIA gi tongana ti so babâ ti lo Azaria asara.

³⁵Me ando so azo aleke na ndö ti ahoto ti voro anzapa nde daa, lo zi ni pepe. Azo angba ti gue kâ ti mu *asandaga na ti zö dukani. Yotam laa aleke yanga ti gbagba ti kota da ti KOTA GBIA, yanga ni ti mbage ti nduzu.

³⁶Tanga ti atënë na ndö ti Yotam, na aye so kue lo sara, a su tënë ni na ya ti “Mbeti ti aye so agbia ti Juda asara”.

³⁷Na ngoi so Yotam ayeke gbia laa KOTA GBIA ato nda ti tokua Resin, gbia ti Sirii na Peka, gbia ti Israel ti tiri bira na Juda.

³⁸Yotam akui, lo hon na peko ti ababâ ti lo, a lu lo na tere ti ababâ ti lo na Gbata ti David. Molenge ti lo Ahaz laa aga gbia na peko ti lo.