Read La Bible en Sango courant – Mbeti ti Nzapa 2 Agbia 22 Bible Online

2 Agbia 22 - La Bible en Sango courant – Mbeti ti Nzapa bible

2 Agbia 22

¹Yosias ayeke na ngu miombe si lo ga gbia; lo le-gbia ngu baleota na oko na Jérusalem. Iri ti mama ti lo ayeke Yedida, molenge ti Adaya, zo ti gbata ti Boskat.

²Yosias asara ye so ayeke mbirimbiri na le ti *KOTA GBIA. Lo mu taa gi peko ti sarango ye ti kotara ti lo David; lo zia lege ni ti hon mbage na mbage pepe.

³Na ngu baleoko na miombe ni so Yosias ayeke le-gbia, mbeni lâ, gbia atokua wakuasu Shafan, molenge ti Asalia, molenge ti Meshulam ti gue na kota da ti *KOTA GBIA. Lo tene na Shafan, lo tene:

⁴“Gue mo wara kota wayango-sandaga Hilkia; mo hunda na lo titene lo diko nginza so azo aga na ni ndali ti kota da ti KOTA GBIA si azo so ayeke bata yanga ti kota da ti KOTA GBIA amu na maboko ti azo so.

⁵Ayeke nzoni a zia nginza ni na maboko ti awakode-kua so ayeke baa ndo na ndö ti akua ti lekengo kota da ti KOTA GBIA. Fade awakode-kua ni ayeke mu nginza ni na azo so ayeke sara kua ti kota da ti KOTA GBIA titene ala leke na dere ti da ni so asuru.

⁶Ala yeke futa na asarapande, azo ti sarango da nga na amason, ala yeke vo akeke na atêne so a de tere ni dengo ti leke na aye so abuba na ya ti kota da ni.

⁷Nginza so a mu na ala so, zo ahunda ala ti fa peko ni pepe, ngbanga ti so ala yeke sara ye na taa legeni na nginza ni.”

⁸Tongaso kota wayango-sandaga Hilkia atene na wakuasu Shafan, atene: “Mbi wara mbeti ti *Ndia na ya ti kota da ti KOTA GBIA.” Hilkia amu mbeti ni na Shafan si Shafan adiko ni.

⁹Na pekoni, Shafan ague, awara gbia si lo fa peko ti ye ni na lo, lo tene: “Azo ti kua ti mo abongbi nginza so ayeke na ya ti kota da ti KOTA GBIA; ala mu ni na awakode-kua so ayeke baa lege ti lekengo kota da ti KOTA GBIA nga na azo so ayeke leke aye so abuba na ya ti kota da ni.”

¹⁰Na pekoni Shafan akiri atene na gbia: “Wayango-sandaga Hilkia amu na mbi mbeni mbeti.” Tongaso lo diko mbeti ni na dawa ti gbia.

¹¹So gbia ama atënë ti ya ti mbeti ti *Ndia ni, lo suru bongo na tere ti lo ti fa kota mbeto ti be ti lo.

¹²Na pekoni, lo mu yanga na wayango-sandaga Hilkia, na Ahikam, molenge ti Shafan, na Akbor, molenge ti Mikaya, na wakuasu Shafan nga na Asaya, zo ti kua ti gbia, lo tene:

¹³“Ala gue, ahunda *KOTA GBIA ndali ti mbi, ndali ti azo ti kodro nga ndali ti azo ti Juda kue, ndali ti atënë ti ya ti mbeti so a wara so. Biani, KOTA GBIA asara ngonzo mingi; ngonzo ti lo alondo tongana wâ na tere ti e, ngbanga ti so akotara ti e aye ti ma atënë ti ya ti mbeti so pepe; ala sara ye pepe alingbi na atënë so a su na ya ti mbeti ni na ndö ti e.”

¹⁴Wayango-sandaga Hilkia, na Ahikam, na Akbor, na Shafan nga na Asaya ague, awara Hulda, wayanga-Nzapa so ayeke lango na Fini Vaka ti Jérusalem. Lo yeke wali ti Shalum; Shalum ayeke molenge ti Tikva, molenge ti Haras. Shalum ayeke zo ti batango abongo ti ya ti kota da ti Nzapa. Azo ni afa peko ti tënë ni na wayanga-Nzapa ni.

¹⁵Hulda atene na ala: “Tënë so KOTA GBIA, Nzapa ti Israel atene ayeke so: Ala tene na koli so atokua ala na mbi so, atene:

¹⁶‘Tënë so KOTA GBIA atene ayeke so: Mbi yeke sara titene sioni kpale aga na ndö ti gbata so nga na ndö ti azo ti gbata ni, alingbi na atënë so kue ayeke na ya ti mbeti so gbia ti Juda adiko so.

¹⁷Azo ti gbata ni azia mbi awe si ala zö dukani na anzapa nde; anzapa nde so ala leke so azia ngonzo na be ti mbi. Ndani laa ngonzo ti mbi ayeke londo tongana wâ na tere ti gbata so; ngonzo ni ayeke kai ande pepe.

¹⁸Me ti gbia ti Juda so atokua ala ti hunda mbi KOTA GBIA so, fade ala yeke tene na lo: Tënë so KOTA GBIA, Nzapa ti Israel atene ayeke so: Mo ma tënë ti ya ti mbeti so nzoni awe.

¹⁹Tënë so mbi tene na ndö ti gbata so nga na ndö ti azo ti gbata ni apika be ti mo si mo sara tere ti mo kete na gbe ti KOTA GBIA. Fade gbata so ayeke ga ngonda si ayeke ga ye so a deba ni awe. Na mango tënë so mbi tene, mo suru bongo na tere ti mo si mo toto na dawa ti mbi. Mbi nga, mbi ma mo awe; so tënë ti yanga ti KOTA GBIA laa.

²⁰Ndani laa, mbi yeke zia mo ti gue na tere ti akotara ti mo na siriri; a yeke lu nga mo na siriri na ya ti du ti kuâ ti mo. Sioni kpale so kue mbi yeke sara titene aga na ndö ti gbata so, fade mo yeke baa ni pepe.’ ” Kota wayango-sandaga Hilkia na amba ti lo akiri ague, atene peko ti tënë ni na gbia Yosias.