Read La Bible en Sango courant – Mbeti ti Nzapa 2 Agbia 4 Bible Online

2 Agbia 4 - La Bible en Sango courant – Mbeti ti Nzapa bible

2 Agbia 4

¹Mbeni lâ, mbeni wali so koli ti lo ayeke na ya ti bongbi ti awayanga-Nzapa, aga ti baa Élisée si atene: “Koli ti mbi so ayeke lani zo ti kua ti mo, akui awe. Lo yeke kpe ando mbeto ti *KOTA GBIA mingi; mo hinga kue. Fadeso mbeni koli so boon ti lo ayeke na li ti e aga ti mu amolenge ti mbi use titene ala ga angbaa ti lo.”

²Élisée atene na lo: “Nyen laa mbi lingbi ti sara ndali ti mo, nyen? Tene na mbi: nyen laa mo yeke na ni na da ti mo, nyen?” Wali ni akiri tënë: “Mbi zo ti kua ti mo, mbi yeke na ye oko pepe, me gi kete mafuta titene mbi sara na tere ti mbi.”

³Élisée atene: “Gue na ndo ti azo so ayeke nduru na mo, mo hunda ata so ya ni ayeke senge; mo hunda ni gbani gbani.

⁴Na pekoni, mo kiri na da ti mo, mo kanga yanga ti da na li ti mo nga na amolenge ti mo. Fade mo tuku mafuta ni na ya ti ata ni kue. Tongana mbeni ta oko asi awe, mo zia ni na mbage. Mo sara tongaso na ata ni kue.”

⁵Wali ni azia Élisée, lo gue, lo kanga yanga ti da na li ti lo nga na amolenge ti lo. Amolenge ni ayeke ga na lo ata ni si lo yeke tuku mafuta na ya ni.

⁶So lo tuku mafuta na ya ti tanga ti ta ni awe, lo tene na mbeni molenge ti lo: “Ga na mbi mbeni ta ni.” Molenge ni akiri tënë na lo: “Mbeni ta ayeke daa pepe.” Tongaso mafuta ni akai ti sigigi.

⁷Wali ni aga atene tënë ni na zo ti Nzapa si zo ti Nzapa atene: “Gue, mo ka mafuta ni, mo futa na boon so ayeke na li ti mo. Tanga ti nginza ni, fade mo na amolenge ti mo ayeke te na kobe.”

⁸Mbeni lâ, Élisée ahon na kete gbata ti Shunem. Kâ, mbeni wali ti mosoro ahunda mingi na Élisée ti gue ti te kobe na da ti lo. Ti to nda ni na lango ni so, lakue tongana Élisée ayeke hon na ya ti kodro ni, lo yeke gue ti te kobe na da ti wali ni.

⁹Wali ni atene na koli ti lo: “Mbi hinga, mbi tene, koli so ayeke ga lakue na ndo ti e so ayeke taa zo ti Nzapa.

¹⁰Ayeke nzoni e leke mbeni kete kubu na lo na ndö ti da. E zia na ya ti kubu ni gbogbo, meza, ngende na lamba. Tongana lo ga na ndo ti e, lo lingbi ti lango daa.”

¹¹Mbeni lâ, Élisée asi na ndo ti ala. Lo gue na ya ti kubu ti nduzu ni si lo lango kâ.

¹²Lo tene na Gehazi, zo ti kua ti lo, lo tene: “Iri na mbi wali ti gbata ti Shunem so.” Gehazi airi wali ni si wali ni aga aluti na dawa ti lo.

¹³Élisée atene na Gehazi: “Mo tene na wali ni, mo tene: ‘Mo sara anzoni ye so kue na e. Nyen laa e lingbi ti sara ndali ti mo, nyen? Mo ye titene e tene nzoni tënë ti mo na gbia wala na makonzi ti aturugu?’ ” Wali ni akiri tënë: “Ên-en! Mbi duti nzoni na popo ti a-ita ti mbi; ye oko atia mbi pepe.”

¹⁴Tongaso Élisée atene na Gehazi: “Nyen laa e lingbi ti sara ndali ti wali so, nyen?” Gehazi akiri tënë: “Ae! Ade lo du molenge-koli pepe; koli ti lo nga aga mbakoro awe.”

¹⁵Élisée atene: “Iri lo!” Gehazi airi wali ni si lo ga lo luti na yanga ti da.

¹⁶Élisée atene: “Na ngu ti peko, gi na mara ti ngoi so, fade mo yeke yo molenge-koli na maboko ti mo.” Wali ni atene: “Babâ, mbi ke! Mo yeke zo ti Nzapa, tene mvene na zo ti kua ti mo pepe!”

¹⁷Wali ni amu ngo si na ngu ti peko, gi na mara ti ngoi so, lo du molenge-koli alingbi na tënë so Élisée atene lani na lo.

¹⁸Molenge ni akono. Mbeni lâ, lo gue na peko ti babâ ti lo na yaka; babâ ni na azo ti fango le ti kobe ayeke sara kua.

¹⁹Molenge ni ato nda ti dekongo, atene: “Li ti mbi! Li ti mbi!” Babâ ni atene na zo ti kua ti lo: “Gue na lo hio na mama ti lo!”

²⁰Zo ti kua ni ague na molenge ni na mama ti lo. Molenge ni angba na ndö ti gere ti mama ti lo ngbii asi na bekombite. Na pekoni, lo kui.

²¹Tongaso mama ni ague na ya ti kubu ti Élisée, lo zia molenge ni na ndö ti gbogbo ti zo ti Nzapa. Lo kanga yanga ti da na li ti molenge ni si lo sigigi.

²²Lo iri koli ti lo si lo tene na lo: “Mbi gbu gere ti mo, tokua na mbi mbeni zo ti kua oko nga na mbeni mama ti lele oko. Mbi yeke kpe na ndo ti zo ti Nzapa si mbi kiri.”

²³Koli ti lo ahunda lo, atene: “Mo ye ti gue na ndo ti lo laso ngbanga ti nyen? So e yeke na lango ti fini nze wala *lango ti wungo tere pepe so.” Wali ni akiri tënë, atene: “Gi be ti mo pepe!”

²⁴Wali ni aleke lele ni si lo tene na zo ti kua ti lo: “E gue! Mo kpe na lele ni, mo luti na lege pepe. Tongana mbi mu yanga na mo si mo luti.”

²⁵Wali ni amu lege ague na hoto ti Karmel ti wara zo ti Nzapa kâ. So wali ni angba yongoro na lege, zo ti Nzapa abaa lo; lo tene na Gehazi, zo ti kua ti lo, lo tene: “Baa, wali ti gbata ti Shunem so laa!

²⁶Kpe mo gue, mo wara lo; mo hunda lo, mo tene: ‘Mo yeke senge? Koli ti mo ayeke senge? Molenge ni ayeke senge?’ ” Wali ni akiri tënë, atene: “Een, e kue, e yeke senge!”

²⁷So wali ni asi na li ti hoto na tere ti zo ti Nzapa awe, lo gbu gere ti zo ti Nzapa. Gehazi aga nduru na lo ti pusu lo; me zo ti Nzapa atene: “Zia lo! Baa, vundu ahon ndö ti lo mingi, mbi hinga nda ni pepe. *KOTA GBIA ade ti fa na mbi nda ni pepe.”

²⁸Wali ni atene: “Babâ, mbi laa mbi hunda molenge na maboko ti mo? Mbi tene lani na mo, mbi tene, mo handa mbi pepe!”

²⁹Élisée atene na Gehazi: “Leke tere ti mo; mu keke ti mbi ti wayanga-Nzapa, mo gue! Tongana mo wara mbeni zo na lege, mo bara lo pepe. Tongana mbeni zo abara mo, mo yeda pepe. Fade mo yeke zia keke ti mbi na ndö ti le ti molenge-koli ni.”

³⁰Me mama ti molenge ni atene na Élisée: “KOTA GBIA ayeke na fini! Mo nga, mo yeke na fini! Mbi yeke zia mo ti hon pepe.” Tongaso Élisée alondo si amu peko ti wali ni.

³¹Me Gehazi asi kozo ti ala. Lo zia keke ni na ndö ti le ti molenge-koli ni, me molenge ni atene tënë oko pepe, lo sara nga tere ti lo kete pepe. Gehazi akiri ague, awara Élisée si atene peko ti tënë ni na lo, atene: “Molenge ni azingo pepe.”

³²So Élisée asi na da, andaa molenge ni akui awe, kuâ ni ayeke na ndö ti gbogbo ti Élisée.

³³Élisée ali na ya ti kubu ni, lo kanga yanga ti da na li ti lo na molenge ni si lo sambela KOTA GBIA.

³⁴Na pekoni, lo ko na ndö ti gbogbo ni si lo lango na ndö ti molenge ni. Lo zia yanga ti lo na ndö ti yanga ti molenge ni, le ti lo na ndö ti le ti molenge ni, maboko ti lo na ndö ti maboko ti molenge ni. Lo lango na ndö ti molenge ni ngbii tere ti molenge ni amu wâ.

³⁵Élisée alondo na ndö ti gbogbo ni, lo zu na sese; lo tambula, lo si kâ, lo si ge na ya ti kubu ni. Na pekoni, lo kiri lo lango na ndö ti molenge ni. Mo ye ti baa, molenge ni angasi lege mbarambara si lo zi le ti lo.

³⁶Élisée airi Gehazi si atene na lo: “Iri wali ti gbata ti Shunem so, lo ga.” Gehazi ague, airi wali ni. So wali ni aga awe, Élisée atene na lo: “Mu molenge ti mo!”

³⁷Wali ni aga, lo ti na gere ti Élisée, lo kpo li ti lo na sese. Na pekoni, lo mu molenge ti lo si lo sigigi.

³⁸Élisée akiri na Gilgal. Andaa na ngoi ni so, kota nzara ati na ya ti kodro ni. So azo ti bongbi ti awayanga-Nzapa ayeke luti na dawa ti Élisée, lo tene na zo ti kua ti lo: “Mu kota tawa, mo to kobe ndali ti azo ti bongbi ti awayanga-Nzapa.”

³⁹Tongaso mbeni zo oko na popo ti ala ague na yaka ti gi akugbe ti kasa. Lo wara mbeni keke ti vinye ti ngonda, lo fâ ale ti keke ni gbani gbani asi ya ti bongo ti lo. So lo kiri na da, lo fâ ya ti ale ti keke ni kete kete si lo tuku na ya ti tawa ni. Zo oko ahinga ye ni so pepe.

⁴⁰A fu kobe ni na azo titene ala te. Gi so ala zia ni na yanga ti ala awe, ala dekongo, atene: “Zo ti Nzapa, kobe ni ayeke sioni yoro ti fango zo!” Nilaa ala lingbi ti te kobe ni pepe.

⁴¹Zo ti Nzapa atene: “Ala ga na mbi farini.” Lo tuku farini ni na ya ti tawa si lo tene na zo ti kua ti lo: “Fu kobe ni na azo, ala te!” Mbeni sioni ye oko akiri angba na ya ti tawa ni pepe.

⁴²Mbeni koli alondo na Baal-Shalisha aga. Lo ga na zo ti Nzapa mapa so a sara na akozo le ti kobe: mapa baleuse so a sara na *orze; lo ga nga na fini le ti *ble na ya ti sake oko, ble so lo fâ ni aninga pepe. Élisée atene na zo ti kua ti lo, atene: “Kangbi ni na azo, ala te!”

⁴³Zo ti kua ti lo akiri tënë: “Wungo ti azo ni ayeke ngbangbo oko. Fade mbi yeke kangbi ni na ala tongana nyen?” Élisée atene: “Kangbi kobe na azo ni kue, ala te! Biani, tënë so *KOTA GBIA atene ayeke so: ‘Fade azo ayeke te kobe, tanga ni ayeke ngba.’ ”

⁴⁴Zo ti kua ni akangbi kobe ni na azo kue. Ala te si tanga ni angba alingbi na tënë ti KOTA GBIA.