Read La Bible en Sango courant – Mbeti ti Nzapa 1 Mbai 23 Bible Online

1 Mbai 23 - La Bible en Sango courant – Mbeti ti Nzapa bible

1 Mbai 23

¹David ate gigi si lo ga mbakoro awe, lo zia molenge ti lo Salomon gbia ti Israel.

²David abongbi amakonzi ti Israel kue, awayango-sandaga na azo ti mara ti Lévi.

³A diko wungo ti azo ti mara ti Lévi so ngu ti ala alingbi na ngu baleota na ala so ngu ti ala ahon baleota. A diko ala oko oko si wungo ti akoli kue ayeke 38 000.

⁴David asoro azo 24 000 titene ala baa ndo na ndö ti akua ti kota da ti *KOTA GBIA, azo 6 000 tongana awakuasu nga na awafango-ngbanga;

⁵azo 4 000 tongana azo ti batango yanga ti da si azo 4 000 ti sepela KOTA GBIA na aye ti mozoko so lo leke ndali ni.

⁶David akangbi azo ti mara ti Lévi na ya ti abongbi nde nde na lege ti akete mara ti ala: kete mara ti Gershon, ti Kehat na ti Merari.

⁷Na ya ti bongbi ti kete mara ti Gershon, asewa ti amolenge ti Gershon ayeke daa: Ladan na Shimei.

⁸Ladan adu amolenge-koli ota: kozo molenge ni ayeke Yehiel, use ni ayeke Zetam, ota ni ayeke Joël.

⁹Shimei adu amolenge-koli ota: Shelomit, Haziel na Haran. Ala yeke amakonzi ti asewa ti Ladan.

¹⁰Shimei akiri adu amolenge-koli osio: Yahat, Ziza, Yeush na Beria.

¹¹Kozo molenge ni ayeke Yahat, use ni ayeke Ziza; Yeush na Beria adu amolenge mingi pepe. Nilaa a diko ala gi na ya ti sewa oko.

¹²Kehat adu amolenge-koli osio: Amram, Isar, Hebron na Uziel.

¹³Amolenge ti Amram ayeke Aaron na Moïse. A zia Aaron nde, lo na *ahale ti lo titene ala sara kua na ndo so ayeke nde si ayeke nzoni kue ahon atanga ni kpu na kpu. Kua ti ala ayeke ti zö dukani na dawa ti KOTA GBIA, ti sara kua ti Nzapa na ti sara tufa na ndö ti azo na iri ti KOTA GBIA kpu na kpu.

¹⁴Ti Moïse, lo yeke zo ti Nzapa; me a diko amolenge ti lo tongana asenge zo na popo ti azo ti mara ti Lévi.

¹⁵Amolenge ti Moïse ayeke Gershom na Eliezer.

¹⁶Molenge ti Gershom ayeke Shebuel; lo yeke kota zo ni.

¹⁷Eliezer adu gi molenge oko, iri ti lo ayeke Rehabia; lo yeke kota zo ti sewa ni. Eliezer adu mbeni molenge-koli na pekoni pepe; me Rehabia awara ahale mingi.

¹⁸Molenge ti Isar ayeke Shelomit; lo yeke kota zo ni.

¹⁹Amolenge ti Hebron ayeke Yeria, kota zo ni, use ni ayeke Amaria, ota ni ayeke Yaziel, osio ni ayeke Yekamam.

²⁰Amolenge ti Uziel ayeke Mika, kota zo ni, use ni ayeke Isia.

²¹Amolenge ti Merari ayeke Mali na Mushi. Amolenge ti Mali ayeke Elazar na Kish.

²²Elazar adu molenge-koli pepe si lo kui; me lo du amolenge-wali. Amolenge ti ita ti lo Kish laa amu amolenge ni ti ga awali ti ala.

²³Amolenge ti Mushi ayeke ota: Mali, Eder na Yeremot.

²⁴So ayeke ahale ti Lévi na lege ti akete mara ti ala oko oko nga na lege ti amakonzi ti asewa ti ala oko oko laa. A su iri ti ala oko oko kue na mbeti. Ala so ngu ti ala alingbi baleuse na ala so ngu ti ala ahon baleuse, a mu ala ti sara kua na ya ti kota da ti KOTA GBIA.

²⁵Biani, David atene lani, atene: “KOTA GBIA, Nzapa ti Israel asara si azo ti lo aduti kpoo; lo wani, lo yeke duti na Jérusalem kpu na kpu.

²⁶Tongaso, azo ti mara ti Lévi ayeke kiri ti yo pepe da ti bongo so KOTA GBIA na azo ti lo ayeke wara tere daa nga na aye ti kua ni.”

²⁷Gi na ndö ti yanga so David amu na ndani so laa a diko wungo ti azo ti mara ti Lévi, ala so ngu ti ala alingbi baleuse na ala so ngu ti ala ahon baleuse.

²⁸Kua ti ala ayeke ti mu maboko na ahale ti Aaron na ya ti da ti KOTA GBIA, na ya ti gbagba ni nga na ya ti akubu ni; ala yeke *sukula sioni ti aye so kue a zia ni nde ndali ti Nzapa; ala yeke sara akua nde nde ti da ti Nzapa:

²⁹amapa so a leke si a zia na dawa ti Nzapa, nzoni farini ndali ti asandaga ti ale ti kobe, amakara so a sara na mama ni pepe, agatoo so a zö ni na ya ti kpangbara sembe na agatoo nde nde; ala yeke baa lege ti asembe na ametere ti hakango na ye.

³⁰Na ndaperere nga na lakui, alingbi ala duti daa ti sepela na ti gonda KOTA GBIA.

³¹Lakue, ala yeke duti nga daa na ndembe so a yeke mu sandaga so a yeke gbi ni kue na wâ na KOTA GBIA, na *lango ti wungo tere, na lango ti fini nze nga na lango ti amatanga. Ala yeke sara kua ti ala na ngoi kue na dawa ti KOTA GBIA, alingbi na wungo ti lango so ndia afa na ala.

³²Ala yeke baa ndo na ndö ti da ti bongo so KOTA GBIA na azo ti lo ayeke wara tere daa nga na ndo so ayeke nde si ayeke nzoni kue. Ala yeke mu maboko na a-ita ti ala, ahale ti Aaron, ti baa lege ti akua nde nde ti kota da ti KOTA GBIA.