Read La Bible en Sango courant – Mbeti ti Nzapa 1 Mbai 29 Bible Online

1 Mbai 29 - La Bible en Sango courant – Mbeti ti Nzapa bible

1 Mbai 29

¹Gbia David atene na bongbi ti azo ni kue: “Molenge ti mbi Salomon ayeke zo so Nzapa asoro lo, lo ngba maseka si ade lo kpengba pepe. Andaa kua ni akono mingi, ngbanga ti so a yeke sara yangbo ni ndali ti zo pepe, me a yeke sara ni ndali ti *KOTA GBIA Nzapa.

²Mbi mu ngangu ti mbi kue ti leke aye ndali ti kota da ti Nzapa ti mbi: mbi bongbi lôro ndali ti aye so a yeke sara ni na lôro, wen ti nginza ndali ti aye so a yeke sara ni na wen ti nginza, bengba wen ndali ti aye so a yeke sara ni na bengba wen, wen ndali ti aye so a yeke sara ni na wen nga na keke ndali ti aye so a yeke sara ni na keke. Mbi mu nga atêne ti kornaline na atêne so a yeke zia na tere ti aye titene apendere, avuko têne na atêne so nzoroko ni ayeke nde nde, amara ti atêne nde nde kue ti ngangu ngere nga na gba ti apendere têne ti sarango na da.

³Âdu ti anzoni ye ti mbi wani so ayeke na lôro na wen ti nginza, mbi mu ni ndali ti kota da ti Nzapa ti mbi. Mbi zia aye ni so na ndö ti aye so mbi leke awe ndali ti kota da ti Nzapa so mbi ye ni mingi.

⁴Mbi mu kilo ti lôro 100 000 ti kodro ti Ofir, kilo 240 000 ti wen ti nginza ti nzoni ni ti zia na tere ti dere ti kota da ni.

⁵Ti fadeso, zo wa laa ayeke nduru ti mu na be ti lo wani lôro wala wen ti nginza na KOTA GBIA? Fade azo ti sarango ye na kode alingbi ti leke na aye so kue ayeke na lôro wala na wen ti nginza.”

⁶Tongaso amakonzi ti asewa, amakonzi ti amara ti Israel, ala so ayeke na li ti aturugu saki oko, ala so ayeke na li ti aturugu ngbangbo oko nga na azo so ayeke baa ndo na ndö ti akua ti gbia amu ye na be ti ala wani;

⁷ala mu ye ndali ti kua ti kota da ti Nzapa. Ala mu kilo ti lôro 170 000, ale ti nginza 10 000 so a sara na lôro, kilo ti wen ti nginza 300 000, kilo ti bengba wen 600 000 nga na kilo ti wen 3 000 000.

⁸Azo so ayeke na atêne ti ngangu ngere, ala mu ni na Yehiel, zo ti kete mara ti Gershon ti zia na ya ti da ti mosoro ti kota da ti KOTA GBIA.

⁹Azo ni kue ayeke na ngia, ngbanga ti so ala mu aye na KOTA GBIA na be ti ala kue nga na nzoni be. Be ti David asi singo na kota ngia.

¹⁰David amu singila na *KOTA GBIA na dawa ti bongbi ti azo ni kue, lo tene: “Singila na KOTA GBIA, Nzapa ti kotara ti e Jacob, ngbene ye kpu na kpu, lakue lakue!

¹¹KOTA GBIA, mo yeke kota, mo yeke ngangu, mo lingbi na gonda, iri ti mo awu mingi, mo yeke gbia! Biani, aye so kue ayeke na yayu nga na ndö ti sese ayeke ti mo. KOTA GBIA, lengo-gbia ayeke ti mo si mo yeke na li ti aye kue.

¹²Mosoro na gonda alondo na mo; mo laa mo yeke na komandema na ndö ti aye kue. Ngangu na komandema ayeke na maboko ti mo; mo yeke na ngangu ti zia zo na kota ndo nga ti kpengba zo.

¹³Ti fadeso, Nzapa ti e, e gonda mo si e ya iri ti mo so ayeke nzoni mingi.

¹⁴Mbi na azo ti kodro ti mbi, e yeke zo wa ti mu ye na be ti e wani tongaso? Ye kue alondo na mo; ye so e mu na mo, alondo gi na mo.

¹⁵Biani, na le ti mo, e yeke awande, e yeke agene tongana akotara ti e. Fini ti e na ndö ti sese so ayeke tongana gbe ti de so ayeke hon hongo, mbeni ye titene e zia be ti e ti ku ayeke daa pepe.

¹⁶KOTA GBIA Nzapa ti e, e leke gba ti aye so kue ti sara na da ndali ti mo, ndali ti iri ti mo so ayeke nde si ayeke nzoni kue. Aye so kue alondo na maboko ti mo si ye kue ayeke ti mo.

¹⁷Nzapa ti mbi, mbi hinga so mo laa mo yeke baa ya ti be ti zo si mo yeda na ye so ayeke mbirimbiri. Ti mbi, na be so ayeke mbirimbiri laa mbi mu aye so kue na mo na be ti mbi wani. Fadeso, mbi yeke na ngia ti baa azo ti mo so abongbi ge ti mu ye na mo na be ti ala wani.

¹⁸KOTA GBIA, Nzapa ti akotara ti e Abraham, Isaac na Jacob, sara titene be ti azo ti mo so ala leke ti mu ye na mo angba gi tongaso si be ti ala angba lakue na mbage ti mo.

¹⁹Mu na molenge ti mbi Salomon be so ayeke use use pepe si lo bata atënë ti ndia ti mo, aye so mo fa nga na ambela ti mo. Tongaso si lo sara ye alingbi na ni kue, lo sara yangbo ti mo so mbi leke aye so kue ndali ni.”

²⁰Na pekoni, David atene na bongbi ti azo ni: “Ala mu singila na KOTA GBIA, Nzapa ti ala.” Tongaso, azo ni kue amu singila na KOTA GBIA, Nzapa ti akotara ti ala. Ala kuku akpo li ti ala na sese na dawa ti KOTA GBIA nga na dawa ti gbia.

²¹Lango oko na pekoni, ala ya na *KOTA GBIA *asandaga ti beoko na asandaga so a yeke gbi ni kue na wâ. Ala mu akoli-bagara 1 000, akoli-taba 1 000, akete taba 1 000 si ala mu asandaga ti samba so alingbi na ni. Ala mu gba ti asandaga alingbi na wungo ti azo ti Israel kue.

²²Na lango ni so, na ngia na be, ala te, ala nyon na dawa ti KOTA GBIA. Ti fani use ni, ala zia Salomon, molenge ti David, gbia. Ala tuku mafuta na li ti lo ti ga makonzi ndali ti KOTA GBIA si ala tuku mafuta nga na li ti Sadok titene lo ga kota wayango-sandaga.

²³Salomon aduti na ndö ti mbata ti gbia so KOTA GBIA amu na lo. Lo ga gbia na plase ti babâ ti lo David. Aye so kue lo yeke sara aga nzoni si azo ti Israel kue ayeke ma yanga ti lo.

²⁴Amakonzi kue, aturugu na amolenge ti David kue ayeda na komandema ti gbia Salomon.

²⁵KOTA GBIA aya iri ti Salomon si lo ga kota zo mingi na le ti azo ti Israel kue. Lo sara si komandema ti Salomon awara gonda mingi ahon ti agbia ti Israel so ayeke kozoni na lo.

²⁶David, molenge ti Yese, ale-gbia na ndö ti Israel kue.

²⁷Lo le-gbia na ndö ti Israel ngu baleosio: ngu mbarambara na Hebron, ngu baleota na ota na Jérusalem.

²⁸David aduti nzoni na ya ti mbakoro ti lo si lo kui; lo te gigi alingbi na lo, lo yeke na gba ti mosoro si azo agonda lo mingi. Salomon, molenge ti lo, aga gbia na peko ti lo.

²⁹Atënë na ndö ti gbia David, na tongo nda ni ngbii asi na ndani, a su na ya ti abuku ti ambai ti awayanga-Nzapa Samuel, Natan na Gad.

³⁰Na ya ti abuku so, a tene tënë ti lengo-gbia ti lo, aye ti koli so lo sara, na ambeni kota ye so asi na ngoi ti lo na kodro ti Israel nga na akodro-gbia so ayeke na tere ni.