Read La Bible en Sango courant – Mbeti ti Nzapa 2 Mbai 21 Bible Online

2 Mbai 21 - La Bible en Sango courant – Mbeti ti Nzapa bible

2 Mbai 21

¹Yosafat akui, lo hon na peko ti ababâ ti lo, a lu lo na tere ti ababâ ti lo na Gbata ti David. Molenge ti lo Yoram laa aga gbia na peko ti lo.

²A-ita ti Yoram ayeke daa; ala kue ayeke amolenge ti Yosafat. Iri ti ala ayeke Azaria, Yehiel, Zakarii, Azariahu, Mikael na Shefatia.

³Babâ ti ala amu na ala gba ti kadoo: wen ti nginza, lôro na aye ti ngangu ngere mingi. Lo mu nga na ala agbata so a sara angangu gbagba na tere ni si ayeke na Juda. Me lo soro Yoram ti ga gbia ti kodro ni, ngbanga ti so Yoram ayeke kozo molenge ni.

⁴So Yoram aga gbia na peko ti babâ ti lo awe, lo sara si komandema ti lo akpengba; lo fâ a-ita ti lo kue nga na ambeni makonzi ti Israel.

⁵Yoram ayeke na ngu baleota na use si lo ga gbia; lo le-gbia ngu miombe na Jérusalem.

⁶Lo mu peko ti sarango ye ti agbia ti Israel tongana ti so azo ti sewa ti Akab asara, ngbanga ti so lo mu mbeni molenge ti Akab ti ga wali ti lo. Lo sara ye so ayeke sioni na le ti *KOTA GBIA.

⁷Me ndali ti *mbuki so KOTA GBIA na David asara ando, KOTA GBIA aye ti hunzi azo ti da ti David pepe, ngbanga ti so lo tene na David, fade mbeni *hale ti lo ayeke duti gbia lakue lakue na peko ti lo.

⁸Na ngoi so Yoram ayeke le-gbia laa azo ti Edom ake ti ngba na gbe ti komandema ti Juda si ala soro gbia ti ala wani.

⁹Yoram amu apusu ti mbarata ti lo kue si lo na amakonzi ti aturugu ti lo, ala gue. Na be ti bi, lo na amakonzi ti aturugu ti lo alondo si ala suru lege ahon na popo ti azo ti Edom so angoro fade ala kue.

¹⁰Ti londo na ngoi ni so ngbii asi fadeso, azo ti Edom ake ti ngba na gbe ti komandema ti Juda. Gi na oko ngoi ni so, azo ti gbata ti Libna ake ti ngba na gbe ti komandema ti Yoram, ngbanga ti so Yoram azia KOTA GBIA, Nzapa ti akotara ti lo awe.

¹¹Lo wani, lo leke ambeni ndo na ndö ti ahoto ti Juda titene azo avoro anzapa nde daa. Lo pusu azo ti Jérusalem na azo ti Juda titene ala mu peko ti anzapa nde.

¹²Yoram awara mbeni mbeti so wayanga-Nzapa Élie atokua na lo; tënë ti ya ti mbeti ni atene: “Tënë so KOTA GBIA, Nzapa ti babâ ti mo David atene ayeke so: Mo sara ye tongana ti babâ ti mo Yosafat pepe wala tongana ti kotara ti mo Asa, gbia ti Juda pepe.

¹³Me mo mu peko ti sarango ye ti agbia ti Israel. Mo pusu azo ti Jérusalem na azo ti Juda titene ala voro anzapa nde tongana ti so azo ti sewa ti Akab asara. Ataa a-ita ti mo so ala yeke amolenge ti babâ ti mo, ala so ayeke nzoni mingi ahon mo so, mo fâ ala.

¹⁴Ndani laa KOTA GBIA ayeke bi ande mbeni kota kpale na tere ti azo ti kodro ti mo, na tere ti amolenge ti mo ti koli nga na tere ti awali ti mo si lo yeke buba aye ti mo kue.

¹⁵Ti mo wani, fade angangu kobela nde nde ayeke so mo. Mbeni kobela ni ayeke so mo na ya ti vi ti mo; ayeke ga ngangu ngangu na ya ti lango oko oko ti gue na ni ngbii avi ti mo ni kue asigigi ndali ti songo ti kobela ni.”

¹⁶KOTA GBIA apusu azo ti Filistii na a-arabu so ayeke lango nduru na azo ti Etiopii ti tiri bira na Yoram.

¹⁷Ala ga atiri bira na kodro-gbia ti Juda si ala li na ya ti kodro ni. Ala mu aye so kue ayeke na yangbo ti gbia; ala mu amolenge ti lo ti koli nga na awali ti lo ague na ala. Gi tanga ti molenge ti lo ti koli oko, Ahazia laa angba na lo.

¹⁸Na peko ti aye so kue, KOTA GBIA abi kobela so alingbi ti kai pepe na vi ti Yoram.

¹⁹Kobela ni aninga mingi; na peko ti ngu use, ndali ti songo ti kobela ni, avi ti lo kue asigigi si lo kui na ya ti kota pasi. Azo ti kodro ti lo azö dukani ndali ti kuâ ti lo pepe, tongana ti so ala sara ndali ti kuâ ti ababâ ti lo so.

²⁰Yoram ayeke na ngu baleota na use si lo ga gbia; lo le-gbia ngu miombe na Jérusalem. So lo kui, be ti zo oko aso pepe. A lu lo na Gbata ti David, me a lu lo pepe na ndo so a yeke lu agbia daa.