Read La Bible en Sango courant – Mbeti ti Nzapa 2 Mbai 24 Bible Online

2 Mbai 24 - La Bible en Sango courant – Mbeti ti Nzapa bible

2 Mbai 24

¹Yoas ayeke na ngu mbarambara si lo ga gbia; lo le-gbia ngu baleosio na Jérusalem. Iri ti mama ti lo ayeke Sibia, zo ti Bersheba.

²Yoas asara ye so ayeke mbirimbiri na le ti *KOTA GBIA na lango so kue wayango-sandaga Yoyada angba na fini.

³Yoyada amu awali use na Yoas. Yoas na awali ni adu amolenge-koli na amolenge-wali.

⁴Na pekoni, Yoas aleke na be ti lo ti kiri ti leke kota da ti KOTA GBIA.

⁵Lo bongbi awayango-sandaga na azo ti mara ti Lévi si lo tene na ala: “Ala gue na ya ti agbata ti Juda si ala ro nginza na maboko ti azo ti Israel kue titene na ya ti ngu oko oko a kiri aleke na kota da ti Nzapa ti ala. Ala mu be ti ala ti sara kua ni hio!” Me azo ti mara ti Lévi amu be ti ala na kua ni hio pepe.

⁶Nilaa gbia airi Yoyada, kota wayango-sandaga si atene na lo: “Moïse, zo ti kua ti KOTA GBIA na bongbi ti azo ti Nzapa afa ando wungo ti nginza na azo ti Jérusalem nga na azo ti Juda titene ala futa si a leke na da ti Nzapa so mbeti ti *mbuki ayeke daa. Ngbanga ti nyen si mo hunda na ngangu na azo ti mara ti Lévi ti ro nginza ni pepe so?”

⁷Âdu ti Atalii, sioni wali so, lo na azo so amu peko ti lo azia kota da ti Nzapa abuba. Na ndö ni, aye so kue a zia nde ndali ti Nzapa si ayeke na ya ti kota da ti KOTA GBIA so, ala mu ni ti sara na kua ti nzapa *Baal.

⁸Gbia amu yanga titene a leke mbeni sanduku, a zia na yanga ti kota da ti KOTA GBIA, na mbage ti gigi.

⁹Na pekoni, a to mbela na ya ti Jérusalem nga na ya ti Juda kue titene azo aga na KOTA GBIA nginza so Moïse, zo ti kua ti KOTA GBIA ahunda na azo ti Israel ti mu ni; lo hunda ni na ngoi so ala yeke ando na benyama.

¹⁰Amakonzi kue na azo kue ayeke na ngia, ala ga na nginza ni si ala tuku na ya ti sanduku ngbii sanduku ni asi.

¹¹Tongana azo ti mara ti Lévi abaa so sanduku ni atara ti si — so ngoi titene ala gue na sanduku ni na akota zo ti kua ti gbia laa — wakuasu ti gbia na zo so ayeke baa ndo na ndö ti aye ti kota wayango-sandaga ayeke ga atuku nginza ni si akiri na sanduku ni na plase ni. Ala yeke sara gi tongaso na ya ti lango oko oko si ala wara gba ti nginza.

¹²Gbia na Yoyada amu nginza ni na azo so ayeke na ndö ti kua ti lekengo kota da ti KOTA GBIA. Azo ni ayeke futa na azo ti dengo tere ti têne nga na asarapande. Ala futa nga azo so ayeke sara kua ti wen na ti bengba wen ti leke na kota da ni si akpengba.

¹³Azo ti kua ni ato nda ti sara kua ni si ndali ti ala, kua ni atambula nzoni. Ala kiri aleke kota da ti Nzapa, ala sara si da ni akiri akpengba tongana ti kozo.

¹⁴So ala hunzi kua ni awe, ala ga na tanga ti nginza ni na gbia nga na Yoyada. Azo so ayeke baa ndo na ndö ti kua ni amu nginza ni si asara na akungba ndali ti kota da ti KOTA GBIA: asembe ti sarango na kua ti KOTA GBIA, asembe ndali ti *asandaga so a yeke gbi ni kue na wâ, akopo nga na ambeni kungba so a sara na lôro nga na wen ti nginza. Na lango so kue Yoyada angba na fini, a yeke mu asandaga so a yeke gbi ni kue na wâ lakue lakue na ya ti kota da ti KOTA GBIA.

¹⁵Yoyada aga mbakoro, lo te gigi alingbi na lo; lo yeke na ngu ngbangbo oko na baleota si lo kui.

¹⁶A lu lo na Gbata ti David, na ndo so a yeke lu agbia daa. Biani, lo sara nzoni na azo ti Israel, lo sara nzoni ndali ti Nzapa nga ndali ti kota da ti Nzapa.

¹⁷Na peko ti kuâ ti Yoyada, amakonzi ti Juda aga akuku na gbe ti gbia, Yoas; gbia ayeda na tënë ti ala.

¹⁸Azo ti Israel azia kota da ti *KOTA GBIA, Nzapa ti akotara ti ala si ala voro akeke so a leke aluti na nduzu ndali ti nzapa-wali *Ashera, ala voro nga ayanda. Nilaa ngonzo ti Nzapa alondo na tere ti azo ti Juda na ti Jérusalem ndali ti sioni so ala sara so.

¹⁹Na pekoni, KOTA GBIA atokua awayanga ti lo na popo ti azo ni ti mu wango na ala titene ala kiri na mbage ti lo; me zo oko ama tënë ti ala pepe.

²⁰Tongaso, yingo ti Nzapa aga na ndö ti Zakarii, molenge ti Yoyada; Zakarii aluti na dawa ti azo ni si lo tene na ala: “Tënë so Nzapa atene ayeke so: ‘Ala ke ti sara ye alingbi na andia ti mbi KOTA GBIA, ngbanga ti nyen? Fade aye ti ala ayeke ga nzoni pepe. So ala zia mbi KOTA GBIA awe so, mbi nga, mbi yeke zia ala.’ ”

²¹Tongaso azo ni ama tere na hondengo ni na tere ti Zakarii; gbia amu yanga na ala si ala bo lo na têne, ala fâ lo na ya ti gbagba ti kota da ti KOTA GBIA.

²²Gbia Yoas agirisa nzoni be so Yoyada, babâ ti Zakarii asara lani na lo si lo mu yanga titene a fâ Zakarii ni. Kozoni si Zakarii akui, lo dekongo, lo tene: “Ayeke nzoni KOTA GBIA abaa ye so mo sara so si lo hunda peko ni na mo.”

²³Na hunzingo ti ngu ni, aturugu ti Sirii aga ti tiri bira na Yoas. Ala si na kodro-gbia ti Juda nga na Jérusalem. Ala fâ amakonzi kue ti azo ni si aye so kue ala gbu na peko ti bira, ala tokua ni na gbia ti ala, na gbata ti Damas.

²⁴Aturugu ti Sirii so aga so ayeke mingi pepe; me *KOTA GBIA azia gba ti aturugu ti Juda na maboko ti ala, ngbanga ti so azo ti Juda azia KOTA GBIA, Nzapa ti akotara ti ala. Ngbanga so a de na li ti Yoas laa.

²⁵Na pekoni, azo ti Sirii akiri si ala zia lo na ya ti kota pasi. Tongaso aturugu ti Yoas ama tere na hondengo ni na tere ti lo ndali ti kuâ ti molenge ti wayango-sandaga Yoyada. Ala fâ Yoas na ndö ti gbogbo ti lo. A lu lo na Gbata ti David; me a lu lo pepe na ndo so a yeke lu agbia daa.

²⁶Azo so ama tere na hondengo ni na tere ti Yoas ayeke Zabad, molenge ti mbeni wali ti kodro ti Amon so iri ti lo Shimeat nga na Yozabad, molenge ti mbeni wali ti kodro ti Moab so iri ti lo Shimrit.

²⁷Iri ti amolenge ti Yoas, gba ti anengo tënë so awayanga-Nzapa atene na tere ti lo nga na atënë ti lekengo kota da ti Nzapa, a su tënë ni kue na ya ti “Mbeti so asigigi na nda ti mbeti ti agbia”. Molenge ti lo Amasia laa aga gbia na peko ti lo.