Read La Bible en Sango courant – Mbeti ti Nzapa 2 Mbai 34 Bible Online

2 Mbai 34 - La Bible en Sango courant – Mbeti ti Nzapa bible

2 Mbai 34

¹Yosias ayeke na ngu miombe si lo ga gbia; lo le-gbia ngu baleota na oko na Jérusalem.

²Lo sara ye so ayeke mbirimbiri na le ti *KOTA GBIA. Lo mu peko ti sarango ye ti kotara ti lo David; lo zia lege ni ti hon mbage na mbage pepe.

³Na ya ti ngu miombe so Yosias ale-gbia, so lo de maseka, lo to nda ti gi Nzapa ti kotara ti lo David. Na ngu baleoko na use ni, lo to nda ti sara si Juda na Jérusalem aga *nzoni: lo zi ando so azo aleke na ndö ti ahoto ti voro anzapa nde daa, akeke so a leke si aluti na nduzu ndali ti nzapa-wali *Ashera nga na ayanda so a leke na keke na ayanda so a kporo wen si a leke na ni.

⁴Na dawa ti lo, a kungbi na sese agbalaka ti anzapa *Baal; a kungbi na sese aye ti zongo na yombo so ayeke na ndö ti agbalaka ni; a fâ ya ti akeke so a leke aluti na nduzu ndali ti nzapa-wali Ashera nga na ayanda so a leke na keke na ayanda so a kporo wen si a leke na ni. A nika aye ni aga fuku si a tuku ni na ndö ti adu ti kuâ ti azo so amu *sandaga na ayanda ni.

⁵A gbi abio ti awayango-sandaga ni na ndö ti agbalaka. Lege so Yosias asara si Juda na Jérusalem aga *nzoni laa.

⁶Lo sara gi mara ti ye so na ya ti agbata ti Manase, ti Efraim, ti Siméon, ataa na sese ti Neftali nga na abubango kodro so ayeke na tere ni.

⁷Lo kungbi na sese agbalaka, lo fâ akeke so a leke aluti na nduzu ndali ti nzapa-wali Ashera nga na ayanda, lo nika ni aga fuku; lo kungbi na sese aye ti zongo na yombo na ya ti kodro ti Israel kue. Na pekoni, lo kiri na Jérusalem.

⁸Na ngu baleoko na miombe ni so Yosias ayeke le-gbia, so lo yeke sara si kodro na kota da ti Nzapa aga *nzoni, lo tokua Shafan, molenge ti Asalia, na Maaseya, govoronere ti gbata ni, na Yoa, molenge ti Yoakaz, zo ti tenengo peko ti tënë ti gbia titene ala gue, aleke kota da ti *KOTA GBIA, Nzapa ti lo.

⁹Azo ni ague, awara Hilkia, kota wayango-sandaga si ala mu na lo nginza so azo aga na ni na ya ti kota da ti Nzapa. Azo ti mara ti Lévi so ayeke bata yanga ti kota da ni amu fade nginza ni na maboko ti azo ti Manase, ti Efraim na ti tanga ti azo ti Israel kue, ti azo ti Juda kue na ti azo ti Benjamin si ala kiri na ni na Jérusalem.

¹⁰Ala zia nginza ni na maboko ti awakode-kua so ayeke baa ndo na ndö ti akua ti lekengo kota da ti KOTA GBIA. Awakode-kua ni amu nginza ni na azo so ayeke leke aye so abuba na ya ti kota da ti KOTA GBIA titene ala sara si da ni akpengba.

¹¹Tongaso ala futa na asarapande nga na amason, ala vo atêne so a de tere ni dengo na akeke ti leke na li ti ada so agbia ti Juda azia si abuba so.

¹²Azo ni asara kua ti ala lakue na legeni. Azo ti mara ti Lévi Yahat na Abdias, *ahale ti Merari, ala na Zakarii na Meshulam, ahale ti Kehat, ala laa ayeke na ndö ti azo ti sarango kua ni. Azo ti mara ti Lévi so kue ahinga ti pika aye ti mozoko.

¹³Ala yeke baa ndo na ndö ti azo ti yongo akungba nga na ndö ti azo ti kua ni kue, zo oko oko na kua so lo hinga ti sarango ni. Na popo ti azo ti mara ti Lévi, ambeni ayeke awakuasu, ambeni ayeke baa ndo na ndö ti akua si ambeni ayeke azo ti batango yanga ti da.

¹⁴Na ngoi so ala yeke sigigi na nginza so azo aga na ni na ya ti kota da ti KOTA GBIA, wayango-sandaga Hilkia awara mbeti ti *Ndia ti KOTA GBIA so KOTA GBIA amu na azo ti lo na lege ti Moïse.

¹⁵Hilkia atene na wakuasu Shafan: “Mbi wara mbeti ti Ndia na ya ti kota da ti KOTA GBIA.” Hilkia amu mbeti ni na Shafan.

¹⁶Shafan ague na mbeti ni na gbia si lo fa nga na gbia peko ti aye so ala sara, lo tene: “Kua so kue mo mu na azo ti kua ti mo ti sarango ni, ala yeke kâ na yanga ni.

¹⁷Nginza so ayeke na ya ti kota da ti KOTA GBIA, ala mu ni na azo so ayeke na ndö ti kua ni nga na azo ti sarango kua ni.”

¹⁸Na pekoni, wakuasu Shafan akiri atene na gbia: “Wayango-sandaga Hilkia amu na mbi mbeni mbeti.” Tongaso lo diko mbeti ni na dawa ti gbia.

¹⁹So gbia ama atënë ti ya ti mbeti ti *Ndia ni, lo suru bongo na tere ti lo ti fa kota mbeto ti be ti lo.

²⁰Na pekoni, lo mu yanga na Hilkia, na Ahikam, molenge ti Shafan, na Abdon, molenge ti Mika na wakuasu Shafan nga na Asaya, zo ti kua ti gbia, lo tene:

²¹“Ala gue, ahunda *KOTA GBIA ndali ti mbi, ndali ti tanga ti azo ti Israel nga ndali ti azo ti Juda, ndali ti atënë ti ya ti mbeti so a wara so. Biani, KOTA GBIA asara ngonzo mingi si ngonzo ni atuku na ndö ti e, ngbanga ti so akotara ti e abata tënë ti lo pepe, ala sara ye pepe alingbi na atënë so a su na ya ti mbeti so.”

²²Hilkia na azo so gbia asoro ala so ague na ndo ti Hulda, wayanga-Nzapa so ayeke lango na Fini Vaka ti Jérusalem. Lo yeke wali ti Shalum; Shalum ayeke molenge ti Tokehat, molenge ti Hasra. Shalum ayeke zo ti batango abongo ti ya ti kota da ti Nzapa. Azo ni afa peko ti tënë ni na wayanga-Nzapa ni.

²³Hulda atene na ala: “Tënë so KOTA GBIA, Nzapa ti Israel atene ayeke so: Ala tene na koli so atokua ala na mbi so, atene:

²⁴‘Tënë so KOTA GBIA atene ayeke so: Mbi yeke sara titene sioni kpale aga na ndö ti gbata so nga na ndö ti azo ti gbata ni, alingbi na atënë ti dengo ba so kue a su na ya ti mbeti so a diko na dawa ti gbia ti Juda so.

²⁵Azo ti gbata ni azia mbi awe si ala zö dukani na anzapa nde; anzapa nde so ala leke so azia ngonzo na be ti mbi. Ndani laa ngonzo ti mbi ti wâ ayeke tuku na ndö ti gbata so; ngonzo ni ayeke kai ande pepe.

²⁶Me ti gbia ti Juda so atokua ala ti hunda mbi KOTA GBIA so, fade ala yeke tene na lo: Tënë so KOTA GBIA, Nzapa ti Israel atene ayeke so: Mo ma tënë ti ya ti mbeti so nzoni awe.

²⁷Tënë so mbi tene na ndö ti gbata so nga na ndö ti azo ti gbata ni apika be ti mo si mo sara tere ti mo kete na gbe ti Nzapa. Na mango tënë so, mo sara tere ti mo kete na gbe ti mbi, mo suru bongo na tere ti mo si mo toto na dawa ti mbi. Mbi nga, mbi ma mo awe; so tënë ti yanga ti KOTA GBIA laa.

²⁸Mbi yeke zia mo ti gue na tere ti akotara ti mo na siriri; a yeke lu nga mo na siriri na ya ti du ti kuâ ti mo. Sioni kpale so kue mbi yeke sara titene aga na ndö ti gbata so nga na ndö ti azo ti gbata so, fade mo yeke baa ni pepe.’ ” Kota wayango-sandaga na amba ti lo akiri ague, atene peko ti tënë ni na gbia Yosias.

²⁹Gbia Yosias airi *akangba kue ti Juda na ala ti Jérusalem ti bongbi.

³⁰Na pekoni, lo gue na ya ti kota da ti *KOTA GBIA, lo na azo ti Juda kue, na ala ti Jérusalem kue, awayango-sandaga, azo ti mara ti Lévi nga na azo ti kodro kue, ti londo na akota zo asi na akete zo. Gbia adiko na mê ti ala atënë kue ti ya ti mbeti ti *mbuki so a wara na ya ti kota da ti KOTA GBIA so.

³¹Gbia aluti na nduzu na ndo so lo yeke daa si lo kiri lo sara mbuki na KOTA GBIA. Alingbi fade zo oko oko amu zendo ti tambula na peko ti KOTA GBIA, ti sara ye na be ti lo kue nga na tënë ti be ti lo kue alingbi na atënë ti ndia ti KOTA GBIA, na ambela ti lo na aye so lo fa. Alingbi fade zo oko oko asara ye alingbi na atënë ti mbuki so a su na ya ti mbeti so.

³²Gbia asara si azo so ayeke na Jérusalem na azo ti Benjamin ayeda na tënë ti mbuki ni. Nilaa azo ti Jérusalem asara ye alingbi na tënë ti mbuki ti Nzapa, Nzapa ti akotara ti ala.

³³Na pekoni, asioni sarango ye so kue zo alingbi ti baa na le ti lo fani use pepe, Yosias azi ni na sese ti Israel kue. Lo gbu azo so kue ayeke na sese ti Israel na ngangu ti sara kua na KOTA GBIA, Nzapa ti ala. Na lango ti fini ti lo kue, azo ni azia lege ti KOTA GBIA, Nzapa ti akotara ti ala pepe.