Read La Bible en Sango courant – Mbeti ti Nzapa 2 Mbai 36 Bible Online

2 Mbai 36 - La Bible en Sango courant – Mbeti ti Nzapa bible

2 Mbai 36

¹Azo ti kodro amu Yoakaz, molenge ti Yosias si ala zia lo gbia na Jérusalem na peko ti babâ ti lo.

²Yoakaz ayeke na ngu baleuse na ota si lo ga gbia; lo le-gbia nze ota na Jérusalem.

³Neko, gbia ti Ezipte azi lo na ndö ti mbata ti gbia ni na Jérusalem. Lo gbu azo ti kodro ti Juda na ngangu ti futa na lo lapo: kilo saki ota ti wen ti nginza, kilo baleota ti lôro.

⁴Na pekoni gbia ti Ezipte amu Eliakim, ita ti Yoakaz, azia lo gbia ti Juda na ti Jérusalem. Lo zia fini iri na ndö ti lo so atene Yoakim. Ti ita ti lo Yoakaz, Neko amu lo ague na lo na Ezipte.

⁵Yoakim ayeke na ngu baleuse na oku si lo ga gbia; lo le-gbia ngu baleoko na oko na Jérusalem. Lo sara ye so ayeke sioni na le ti *KOTA GBIA, Nzapa ti lo.

⁶Nabukodonosor, gbia ti Babilone aga ti tiri bira na lo. Lo kanga Yoakim na zingiri ti bengba wen si lo gue na lo na Babilone.

⁷Nabukodonosor amu ambeni ye nde nde so ayeke na ya ti kota da ti KOTA GBIA, lo gue na ni si lo zia na yangbo ti lo so ayeke na Babilone.

⁸Tanga ti tënë na ndö ti Yoakim, asioni ye so lo sara si zo alingbi ti baa na le ti lo fani use pepe nga na ye so asi na lo, a su tënë ni na ya ti mbeti ti agbia ti Israel na ti Juda. Molenge ti lo Yoakin laa aga gbia na peko ti lo.

⁹Yoakin ayeke na ngu na miombe si lo ga gbia; lo le-gbia nze ota na lango baleoko na Jérusalem. Lo sara ye so ayeke sioni na le ti KOTA GBIA.

¹⁰Na tongo nda ti fini ngu, gbia Nabukodonosor atokua aturugu ti mu lo ti gue na lo na Babilone, lo na aye ti ngangu ngere so ayeke na ya ti kota da ti KOTA GBIA. Na pekoni, lo mu Sedesias, mbeni sewa ti Yoakin, lo zia lo gbia ti Juda na ti Jérusalem.

¹¹Sedesias ayeke na ngu baleuse na oko si lo ga gbia; lo le-gbia ngu baleoko na oko na Jérusalem.

¹²Lo sara ye so ayeke sioni na le ti *KOTA GBIA, Nzapa ti lo. Lo sara tere ti lo kete pepe na dawa ti Jérémie, wayanga-Nzapa so ayeke tene tënë na iri ti KOTA GBIA.

¹³Lo tomboka na tere ti gbia Nabukodonosor so asara si Sedesias adeba yanga ti lo na iri ti Nzapa. Lo sara ngangu li, lo kpengba be ti lo, lo ke ti kiri na mbage ti KOTA GBIA, Nzapa ti Israel.

¹⁴Amakonzi kue ti awayango-sandaga na amakonzi ti azo ti kodro akiri asara sioni mingi ahon ndoni. Ala mu gi peko ti asioni sarango ye ti amara nde, asioni ye so zo alingbi ti baa na le ti lo fani use pepe. Ala sara si kota da ti KOTA GBIA aga *sioni, da so KOTA GBIA azia nde ndali ti lo si ayeke na Jérusalem so.

¹⁵KOTA GBIA, Nzapa ti akotara ti ala amu ngoi ti lo kue ti tokua azo ti gboto mê ti ala, ngbanga ti so lo baa mawa ti azo ti lo nga na da ti lo wani so ayeke nde si ayeke nzoni kue.

¹⁶Me azo ti Juda ahe awatokua ti Nzapa, ala baa atënë ti Nzapa tongana buba ye, ala he awayanga-Nzapa na ngia ngbii ngonzo ti KOTA GBIA ti wâ alondo na tere ti azo ti lo, ngonzo so ala lingbi ti sigigi na ya ni pepe.

¹⁷Tongaso, KOTA GBIA atokua gbia ti Babilone na tere ti ala; gbia ni afâ amaseka ti Israel taa na ndo ti ala so ayeke nde si ayeke nzoni kue. Maseka-koli wala maseka-wali wala kangba wala mbakoro, lo baa mawa ti zo oko pepe. KOTA GBIA azia ala kue na maboko ti gbia ni.

¹⁸Aye so kue ayeke na ya ti kota da ti Nzapa, akota ni wala akete ni, amosoro so a bata na ya ti kubu ti da ti KOTA GBIA, na amosoro so ayeke na ya ti da ti gbia nga na ti akota zo ti lo, gbia Nabukodonosor amu kue ague na ni na Babilone.

¹⁹Azo ti Babilone agbi kota da ti Nzapa, ala kungbi na sese gbagba ti bira so ayeke na Jérusalem, ala bi wâ na ayangbo ti gbia kue si ala buba aye ti ngangu ngere na ya ti gbata ni kue.

²⁰Azo so akpe si angba na fini, gbia agbu ala ague na ala na Babilone titene ala ga angbaa ti lo na ti amolenge ti lo; ala ngba na gbe ti ngbaa ni ngbii asi na lango so azo ti Perse amu kodro ni.

²¹Tongaso tënë so KOTA GBIA atene na lege ti wayanga ti lo Jérémie aga taa-tënë: “Fade azo ayeke ngba na ya ti kodro ni pepe na ya ti ngu balembarambara ngbii ngoi ti wungo tere ti kodro ni alingbi. Ye ni ayeke mu plase ti ngoi ti wungo tere so lani ala sara ye alingbi na ni pepe so.”

²²Na kozo ngu so Sirus ayeke gbia ti Perse, *KOTA GBIA aye ti sara si tënë ti lo so lo zia ando na yanga ti Jérémie ti tene, aga taa-tënë. Nilaa KOTA GBIA azia na be ti Sirus ti mu yanga titene a to mbela na tënë ti Sirus na ya ti kodro ti lo kue; a su nga atënë ni na mbeti, atene:

²³“Tënë so mbi Sirus, gbia ti Perse, mbi tene ayeke so: KOTA GBIA, Nzapa ti yayu azia na gbe ti mbi akodro-gbia kue ti sese. Lo mu yanga na mbi ti leke na lo da na Jérusalem, na sese ti Juda. Azo so kue na popo ti ala ayeke azo ti lo, ayeke nzoni ala gue kâ. Ayeke nzoni KOTA GBIA, Nzapa ti ala aduti na ala!”