Read La Bible en Sango courant – Mbeti ti Nzapa Esdras 10 Bible Online

Esdras 10 - La Bible en Sango courant – Mbeti ti Nzapa bible

Esdras 10

¹So Esdras angba ti kuku na dawa ti kota da ti Nzapa, lo yeke toto si lo yeke sambela ti hunda titene Nzapa azi siokpari na li ti ala, gba ti azo ti Israel, akoli, awali na amolenge, abongbi na tere ti lo. Azo ni kue ayeke toto mingi.

²Tongaso Shekania, molenge ti Yehiel, mbeni zo ti kete mara ti Elam atene na Esdras: “E sara ye so ayeke sioni mingi na Nzapa ti e na lege so, na popo ti azo ti kodro ni, e mu awali so ayeke awande ti ga awali ti e. Me fadeso, mbeni ye so azo ti Israel alingbi ti zia be ti ala ti ku ayeke daa:

³E yeke deba yanga ti e na le ti Nzapa ti e ti tumba awali so kue ayeke awande, ala na amolenge ti ala. Tongaso, e yeke sara ye alingbi na wango so mo kota zo, mo mu ni, mo na azo so kue ayeke sara ye alingbi na atënë ti ndia ti Nzapa ti e. Ayeke nzoni e sara ye na lege ti ndia!

⁴Mo londo, ngbanga ti so tënë ni abaa mo. E yeke na peko ti mo; kiri na peko pepe, mo sara ye!”

⁵Esdras alondo. Lo hunda na ngangu na amakonzi ti awayango-sandaga, azo ti mara ti Lévi na azo ti Israel kue ti deba yanga ti ala, ti fa so ala yeke sara ye alingbi na tënë so Shekania atene. Tongaso azo ni kue adeba yanga ti ala.

⁶Tongaso Esdras alondo na dawa ti kota da ti Nzapa, lo gue na da ti Yohanan, molenge ti Eliashib si lo duti kâ. Lo ke ti te kobe, lo ke nga ti nyon ngu, ngbanga ti so vundu agbu lo mingi ndali ti sioni ye mingi so amba ti lo azo ti Israel asara, so ti tene ala so a gbu ala a gue na ala na kodro wande si ala kiri so.

⁷A to mbela na Juda nga na Jérusalem ti hunda na azo so kue a gbu ala lani, a gue na ala na kodro wande si ala kiri so titene ala bongbi tere ti ala na Jérusalem.

⁸Amakonzi na *akangba amu yanga atene, zo so aga pepe na ya ti lango ota, fade a yeke gbanzi akungba ti zo ni kue; na pekoni, a yeke tumba lo na ya ti bongbi ti azo so a gbu ala si a gue na ala na kodro wande.

⁹Tongaso, na peko ti lango ota, so ti tene na lango baleuse ti nze gumbaya ni, akoli kue ti sese ti Juda na ti Benjamin abongbi na Jérusalem. Azo ni aduti na kota le ti kodro ti ya ti gbagba ti kota da ti Nzapa, tere ti ala ayeke do ndali ti tënë so nga ndali ti ngu-Nzapa so ayeke pika.

¹⁰Wayango-sandaga Esdras alondo si lo tene na ala: “Azo ti Israel, ala sara ye so ayeke sioni mingi na lege so ala mu awali so ayeke awande ti ga awali ti ala. So ayeke mbeni siokpari so ala zia na ndö ti asiokpari so azo ni asara awe.

¹¹Fadeso, na le ti KOTA GBIA, Nzapa ti akotara ti ala, ala hinga sioni ti ala, ala sara ye so be ti lo aye. Ala kangbi na azo ti kodro ni nga na awali ti ala so ayeke awande.”

¹²Azo so kue aga na bongbi ni adekongo, atene: “Taa-tënë, alingbi e sara ye tongana ti so mo tene so!

¹³Me e yeke mingi, ngoi ti ngu-Nzapa laa; e lingbi ti ngba na gigi pepe. Na mbage, a lingbi ti leke tënë so gi na ya ti lango oko wala lango use pepe, ngbanga ti so azo mingi na popo ti e asara mara ti siokpari so awe.

¹⁴Ayeke nzoni amakonzi ti e aluti na ndo so na iri ti bongbi ti azo ni kue. Azo so kue na ya ti agbata ti e amu awali so ayeke awande, fade ala yeke ga ti luti na dawa ti amakonzi ni na lango so a yeke fa na ala. Azo ni na *akangba nga na awafango-ngbanga ti agbata oko oko ayeke ga nga. E yeke leke tënë ni ngbii ngonzo ti Nzapa so alondo tongana wâ na tere ti e so ade.”

¹⁵Jonatan, molenge ti Asael, lo na Yazia, molenge ti Tikva ake ti ala tënë ni so. Meshulam na Shabetai, zo ti mara ti Lévi aye gbe ti tënë ni na ala.

¹⁶Me tanga ti azo ti Israel so a gbu ala, a gue na ala lani na kodro wande ayeda na tënë so bongbi ti azo ni atene. Tongaso wayango-sandaga Esdras asoro ambeni makonzi ti asewa na ya ti akete mara oko oko, lo iri ala oko oko kue na iri ti ala. Na kozo lango ti nze baleoko ni, ala duti ti leke tënë ni.

¹⁷Na kozo lango ti kozo nze ti fini ngu ni, a hunzi ti leke tënë ti akoli so kue amu awali so ayeke awande.

¹⁸Na popo ti awayango-sandaga, akoli so amu awali so ayeke awande, ayeke so: ambeni koli ti kete mara ti Yeshua na a-ita ti lo, amolenge ti Yosadak: akoli ni ayeke Maaseya, Eliezer, Yarib na Gedalia.

¹⁹Ala deba yanga ti ala ti tumba awali ti ala; ala deba yanga ti ala nga ti mu koli-taba na *sandaga titene Nzapa azi siokpari ti ala.

²⁰Na popo ti *ahale ti Imer, akoli ni ayeke Hanani na Zebadia;

²¹na popo ti ahale ti Harim, akoli ni ayeke Maaseya, Elia, Shemaya, Yehiel na Uzia;

²²na popo ti ahale ti Pashehur, akoli ni ayeke Eliohenai, Maaseya, Ismael, Netaneel, Yozabad na Elasa.

²³Na popo ti azo ti mara ti Lévi, akoli ni ayeke Yozabad, Shimei, Kelaya, so mbeni iri ti lo ayeke Kelita, Petahia, Yehuda na Eliezer.

²⁴Na popo ti azo ti hengo bia, koli ni ayeke Eliashib. Na popo ti asanziri, akoli ni ayeke Shalum, Telem na Uri.

²⁵Na popo ti tanga ti azo ti Israel, akoli ni ayeke so: na popo ti azo ti kete mara ti Parosh: Ramia, Izia, Malkia, Miamin, Elazar, Malkia na Benaya;

²⁶na popo ti azo ti kete mara ti Elam: Matania, Zakarii, Yehiel, Abdi, Yeremot na Elia;

²⁷na popo ti azo ti kete mara ti Zatu: Eliohenai, Eliashib, Matania, Yeremot, Zabad na Aziza;

²⁸na popo ti azo ti kete mara ti Bebai: Yohanan, Hanania, Zabai na Atlai;

²⁹na popo ti azo ti kete mara ti Bani: Meshulam, Maluk, Adaya, Yashub, Sheal na Yeremot;

³⁰na popo ti azo ti kete mara ti Pahat-Moab: Adna, Kelal, Benaya, Maaseya, Matania, Besalel, Binui na Manase;

³¹na popo ti azo ti kete mara ti Harim: Eliezer, Isia, Malkia, Shemaya, Shimon,

³²Benjamin, Maluk na Shemaria;

³³na popo ti azo ti kete mara ti Hashum: Matenai, Matata, Zabad, Elifelet, Yeremai, Manase na Shimei;

³⁴na popo ti azo ti kete mara ti Bani: Maadai, Amram, Uel,

³⁵Benaya, Bedia, Keluhu,

³⁶Vania, Meremot, Eliashib,

³⁷Matania, Matenai, Yasai,

³⁸Bani, Binui, Shimei,

³⁹Shelemia, Natan, Adaya,

⁴⁰Maknadebai, Shashai, Sharai,

⁴¹Azarel, Shelemia, Shemaria,

⁴²Shalum, Amaria na Joseph;

⁴³na popo ti azo ti kete mara ti Nebo: Yeiel, Matitia, Zabad, Zebina, Yadai, Joël na Benaya.

⁴⁴Akoli so kue, ala mu awali so ayeke awande; ambeni wali ni adu na ala amolenge.