Read La Bible en Sango courant – Mbeti ti Nzapa Esdras 6 Bible Online

Esdras 6 - La Bible en Sango courant – Mbeti ti Nzapa bible

Esdras 6

¹Tongaso gbia Darius amu yanga titene a gi ndo na Babilone na ya ti da ti batango angbene buku na ti amosoro ti gbia.

²Me na Ekbatane, gbata so ngangu gbagba ayeke na tere ni, na sese ti Medii laa a wara mbeni *rulo so a su mbeti daa atene: “Tondo ni ayeke so:

³“Na ya ti kozo ngu so Sirus ayeke gbia, lo mu mbela so, lo tene: Kota da ti Nzapa so ayeke na Jérusalem, alingbi a leke ni titene aga ndo ti yango asandaga na Nzapa. A yeke leke ni na ndo so akozo gere ni ayeke ando daa. Yongo ti da ni na nduzu ayeke duti metere baleota si konongo ni metere baleota.

⁴A yeke leke ni na akota têne so a de tere ni dengo; a yeke zia molongo ti atêne ni ota; na peko ni, a yeke zia molongo ti yongoro keke oko. Ala yeke futa akua ni na nginza ti da ti mosoro ti gbia.

⁵Akungba so a sara na lôro nga na wen ti nginza si ayeke ando na ya ti kota da ti Nzapa na Jérusalem, so lani gbia Nabukodonosor amu na ya ti kota da ni si ague na ni na Babilone, fade a yeke kiri na ni si a yeke zia ni na ya ti kota da ti Nzapa na Jérusalem. A yeke zia kungba oko oko na ndo so ayeke daa kozoni.”

⁶Tongaso, gbia Darius asu mbeti si lo tokua na Tatenai, govoronere ti sese so ayeke na Do ti ngu ti Efrate, lo na Shetar-Boznai nga na amba ti ala, akota komanda ti sese ni; lo tene: “Ala zia tënë so!

⁷Ala zia akua ti lekengo kota da ti Nzapa titene atambula: fade agovoronere ti azuife, na *akangba ti azuife ayeke leke kota da ni na kozo ndo so a sara ni ando daa.

⁸Mbela so mbi mu ndali ti agovoronere ti azuife na akangba ti azuife so ayeke leke kota da ti Nzapa ayeke so: a yeke futa azo ti kua ni na nginza so a zi ni na ndö ti amosoro ti gbia; so ti tene, nginza ti alapo so azo ti sese ti mbage ti Do ti ngu ti Efrate afuta. Ala mu nginza ni na azo so; tongaso si akua ni alingbi ti luti na lege pepe.

⁹Na lango oko oko, fade ala yeke mu na awayango-sandaga so ayeke na Jérusalem ye so alingbi ndali ti kua ti ala, tongana ti so ala fa: akoli-bagara, akoli-ngasa na amolenge ti taba ndali ti *asandaga so a yeke gbi ni kue na wâ na Nzapa ti yayu. Ala yeke mu nga na awayango-sandaga ni *ble, ingo, vin na mafuta.

¹⁰Tongaso si fade awayango-sandaga ni ayeke ya na Nzapa ti yayu asandaga so fion ni anzere na lo, ala yeke sambela ndali ti fini ti gbia na ti amolenge ti lo.

¹¹Zo so ake ti sara ye alingbi na ambela so, yanga so mbi mu ayeke so: fade a yeke gboto mbeni yongoro keke ti da ti lo, a yeke kpo ni na nduzu si a yeke bi zo ni na yanga ni. Na pekoni, fade da ti zo ni ayeke ga ndo ti gba ti azende.

¹²Gbia so kue wala mara so kue ake andia ti mbi so si lo tara ti buba kota da ti Nzapa so ayeke na Jérusalem, ndo so Nzapa asoro titene iri ti lo aduti daa, ayeke nzoni Nzapa a pika gbia ni nga na mara ni. Mbi Darius laa mbi mu yanga so: alingbi azo kue asara ye alingbi na ni!”

¹³Tatenai, govoronere ti sese so ayeke na Do ti ngu ti Efrate, lo na Shetar-Boznai na amba ti ala asara ye kue alingbi gi na peko ti yanga ti gbia Darius.

¹⁴*Akangba ti azuife angba ti sara kota da ni si akua ni ayeke tambula nzoni, alingbi na atënë ti mungo ngangu na be so wayanga-Nzapa Aggée na Zakarii, molenge ti Ido atene na ala. Ala hunzi ti sara da ni, alingbi na yanga so Nzapa ti Israel amu nga alingbi na ambela ti agbia ti Perse so ayeke Sirus, Darius na Artakzerses.

¹⁵Kota da ni ahunzi na lango baleuse na ota ti nze ti Adar ti ngu omene ni so Darius ayeke le-gbia.

¹⁶Azo ti Israel, awayango-sandaga, azo ti mara ti Lévi na tanga ti azo so a gbu ala, a gue na ala na kodro wande si ala kiri so, ala kue asara matanga ti ziango kota da ni na maboko ti Nzapa na ngia.

¹⁷Ndali ti matanga ni, ala mu na *sandaga akoli-bagara ngbangbo oko, akoli-taba ngbangbo use, amolenge ti taba ngbangbo osio. Ndali ti sandaga ti zingo siokpari na li ti ala, ala mu akoli-ngasa baleoko na use alingbi na wungo ti amara ti Israel.

¹⁸A kangbi ya ti awayango-sandaga na azo ti mara ti Lévi si ala duti na ya ti abongbi nde nde, tongaso si ala lingbi ti sara kua ti Nzapa na Jérusalem, alingbi na tënë so a su na ya ti mbeti ti Moïse.

¹⁹Azo so kue a gbu ala, a gue na ala na kodro wande si ala kiri so, ala sara *matanga ti Pake na lango baleoko na osio ti kozo nze ti ngu ti peko ni.

²⁰Awayango-sandaga na azo ti mara ti Lévi abongbi oko si *asukula sioni na tere ti ala. So azo ti mara ti Lévi aga *nzoni awe, ala fâ amolenge ti taba ti Pake ndali ti azo kue, ndali ti a-ita ti ala awayango-sandaga nga ndali ti ala wani.

²¹Tongaso, azo ti Israel so alondo na kodro wande akiri, ala kue ate kobe ti Pake legeoko na azo so angba na kodro, ala so azia lani lege ti sarango ye ti akotara ti amara nde ti sese ni so aga *sioni so. Azo ni abongbi oko na a-ita ti ala, atanga ti azuife ti voro *KOTA GBIA Nzapa ti Israel.

²²Na pekoni, na ya ti lango mbarambara, ala sara na ya ti ngia, matanga ti Mapa so a sara na mama ni pepe. KOTA GBIA azia ngia na be ti ala, ngbanga ti so lo sara si be ti gbia Darius aga nzoni na mbage ti ala; ye so asara lani si be ti azo ti Israel awara ngangu si ala kiri ti gbu kua ti lekengo kota da ti Nzapa ti Israel.