Read La Bible en Sango courant – Mbeti ti Nzapa Esdras 7 Bible Online

Esdras 7 - La Bible en Sango courant – Mbeti ti Nzapa bible

Esdras 7

¹Na peko ti aye so, na ngoi so Artakzerses ayeke gbia na kodro ti Perse, mbeni zo alondo na Babilone asi; iri ti lo Esdras. Esdras ayeke mbeni *hale ti kota wayango-sandaga Aaron. Molongo ti ahale ti Esdras ayeke tongaso: Esdras ayeke molenge ti Seraya; Seraya ayeke molenge ti Azaria; Azaria ayeke molenge ti Hilkia; Hilkia ayeke molenge ti Shalum; Shalum ayeke molenge ti Sadok; Sadok ayeke molenge ti Ahitub; Ahitub ayeke molenge ti Amaria; Amaria ayeke molenge ti Azaria; Azaria ayeke molenge ti Merayot; Merayot ayeke molenge ti Zeraya; Zeraya ayeke molenge ti Uzi; Uzi ayeke molenge ti Buki; Buki ayeke molenge ti Abishua; Abishua ayeke molenge ti Pinas; Pinas ayeke molenge ti Elazar; Elazar ayeke molenge ti Aaron. Esdras ahinga mbeti mingi, lo hinga nga *Ndia ti *KOTA GBIA mingi, Ndia so KOTA GBIA, Nzapa ti Israel afa na Moïse so. Ndali ti so maboko ti KOTA GBIA Nzapa ti Esdras ayeke na ndö ti lo, gbia ayeke mu na lo aye so kue lo hunda.

⁷Na ya ti ngu mbarambara so Artakzerses ayeke gbia, ambeni zo ti Israel, ambeni wayango-sandaga, ambeni zo ti mara ti Lévi, ambeni zo ti hengo bia, ambeni sanziri na ambeni zo ti kua ti kota da ti Nzapa, akiri na Jérusalem.

⁸Esdras na azo ni asi oko na Jérusalem na ya ti nze oku ti ngu mbarambara ni.

⁹Lo fa lango ti guengo ni na Babilone na kozo lango ti kozo nze ni; lo si na Jérusalem na kozo lango ti nze oku ni, ngbanga ti so maboko ti Nzapa ti lo ayeke lani na ndö ti lo ti bata lo.

¹⁰Biani, Esdras azia be ti lo kue ti gi nda ti *Ndia ti KOTA GBIA, ti sara ye alingbi na ni. Lo ye nga ti fa na azo ti Israel atënë ti ndia ni nga na aye so ndia afa.

¹¹Esdras ayeke kota wafango-ndia so ahinga andia na atënë ti ndia so *KOTA GBIA amu na azo ti Israel. Tënë ti ya ti mbeti so gbia Artakzerses amu na Esdras ayeke so:

¹²“Mbi Artakzerses, gbia ti agbia, mbi tokua mbeti so na Esdras, wayango-sandaga na wafango-ndia ti Nzapa ti yayu…

¹³“Mbela so mbi mu ayeke so: azo ti Israel so kue ayeke na ya ti kodro ti mbi, ataa awayango-sandaga, ataa azo ti mara ti Lévi, ataa asenge zo so aye ti kiri na Jérusalem, mo na ala alingbi ti gue senge!

¹⁴Mbi na awamungo-wango ti mbi mbarambara, e tokua mo na Jérusalem nga na kete kodro ti Juda ti baa wala azo ayeke sara ye alingbi na Ndia ti Nzapa so mbeti ni ayeke na maboko ti mo.

¹⁵Na mbage, e tokua mo ti gue na wen ti nginza nga na lôro so mbi na awamungo-wango ti mbi, e ye ti mu na Nzapa ti Israel, lo so ndo ti dutingo ti lo ayeke na Jérusalem.

¹⁶Fade mo yeke gue nga na wen ti nginza na lôro so kue mo yeke wara na maboko ti azo na sese ti Babilone, aye so azo ti mara ti mo, na awayango-sandaga amu na be ti ala wani ndali ti kota da ti Nzapa ti ala so ayeke na Jérusalem.

¹⁷Kâ, mo yeke mu nginza so ti vo na akoli-bagara, akoli-taba, amolenge ti taba nga na aye ndali ti asandaga ti farini na ti samba. Fade mo yeke ya aye so kue na sandaga na Nzapa ti ala na ndö ti gbalaka ti ya ti kota da ti Nzapa so ayeke na Jérusalem.

¹⁸Na pekoni, mo na amba ti mo, ala yeke mu tanga ti wen ti nginza ni na tanga ti lôro ni ti sara na ye so ala baa nzoni na le ti ala ti sara, alingbi na ye so be ti Nzapa ti ala aye.

¹⁹Akungba nde nde so a yeke mu na mo ndali ti akua ti da ti Nzapa ti mo, fade mo yeke zia ni na ya ti kota da ti Nzapa so ayeke na Jérusalem.

²⁰Tongana ambeni ye atia ndali ti kota da ni si mo ye ti vo ni, fade mo yeke mu nginza ni na ya ti da ti mosoro ti gbia.

²¹“Mbi, gbia Artakzerses, mbi mu yanga na awabatango-nginza ti sese ti mbage ti Do ti ngu ti Efrate titene aye so kue Esdras, wayango-sandaga na wafango-ndia ti Nzapa ayeke hunda na ala, fade ala yeke mu ni kue na legeni.

²²Ala yeke mu na Esdras wen ti nginza ngbii alingbi kilo 3 000, *ble so alingbi kilo 30 000, vin so alingbi litere 4 000, mafuta so alingbi litere 4 000 na ingo so a lingbi ti fa wungo ni fango pepe.

²³Aye so kue Nzapa ti yayu ayeke mu yanga daa ndali ti kota da ti lo, alingbi ala sara ni na taa legeni. Tongaso si ngonzo ti Nzapa alondo na tere ti kodro-gbia ti mbi, wala na tere ti mbi wani wala na tere ti amolenge ti mbi pepe.

²⁴E ye nga ti fa na awabatango-nginza, e tene: fade awayango-sandaga, azo ti mara ti Lévi, azo ti hengo bia, asanziri na azo ti kua ti kota da ti Nzapa, na tanga ti azo ti kua kue, ndia amu lege pepe titene ala futa lapo, nginza na ndö ti akungba nga na lapo ti lege.

²⁵“Ti mo Esdras, na lege ti ndara so Ndia ti Nzapa amu na mo si mbeti ni ayeke na maboko ti mo so, ayeke nzoni mo soro ambeni makonzi na ambeni wafango-ngbanga so fade kua ti ala ayeke ti fâ ngbanga ti azo so kue ahinga andia ti Nzapa ti mo; so ti tene azo so kue ayeke na sese ti mbage ti Do ti ngu ti Efrate. Ala yeke fa nga andia ni na azo so ahinga ni pepe.

²⁶Tongana mbeni zo ake ti sara ye alingbi na Ndia ti Nzapa ti mo si lo ke ti sara ye alingbi na ndia ti gbia, fade a yeke fâ ngbanga na li ti lo alingbi na ni: ngbanga ti kuâ, wala a yeke tumba lo na ya ti kodro ni, wala a yeke gbu aye ti lo wala a yeke bi lo na da ti kanga.”

²⁷Esdras atene: “Mbi mu singila na *KOTA GBIA, Nzapa ti akotara ti e! Lo laa lo zia na be ti gbia titene lo ne kota da ti Nzapa ti Jérusalem.

²⁸KOTA GBIA laa asara nzoni be na mbi na le ti gbia na awamungo-wango ti lo, nga na le ti akota zo so kue angoro lo. Be ti mbi awara ngangu ndali ti so maboko ti KOTA GBIA Nzapa ti mbi ayeke na ndö ti mbi, nilaa mbi wara lege ti bongbi ambeni kota zo ti Israel si mbi na ala, e gue so.”