Read La Bible en Sango courant – Mbeti ti Nzapa Esdras 8 Bible Online

Esdras 8 - La Bible en Sango courant – Mbeti ti Nzapa bible

Esdras 8

¹Na ngoi so Artakzerses ayeke le-gbia, azo ti li ti asewa so ala na mbi, Esdras, e londo na Babilone e kiri na Jérusalem, iri ti ala na lege ti akotara ti ala ayeke so:

²Gershom, zo ti kete mara ti Pinas; Daniel, zo ti kete mara ti Itamar; Hatush, zo ti kete mara ti David;

³mbeni molenge oko ti Shekania; Zakarii, zo ti kete mara ti Parosh; akoli 150 ti ya ti sewa ti lo amu peko ti lo;

⁴Eliohenai, molenge ti Zeraya, zo ti kete mara ti Pahat-Moab; akoli 200 amu peko ti lo;

⁵Shekania, molenge ti Yaziel, zo ti kete mara ti Zatu; akoli 300 amu peko ti lo;

⁶Ebed, molenge ti Jonatan, zo ti kete mara ti Adin; akoli 50 laa amu lani peko ti lo;

⁷Yeshaya, molenge ti Atalia, zo ti kete mara ti Elam; akoli 70 amu peko ti lo;

⁸Zebadia, molenge ti Mikael, zo ti kete mara ti Shefatia; akoli 80 amu lani peko ti lo;

⁹Obadia, molenge ti Yehiel, zo ti kete mara Yoab; akoli 218 amu peko ti lo;

¹⁰Shelomit, molenge ti Yosifia, zo ti kete mara ti Bani; akoli 160 amu lani peko ti lo;

¹¹Zakarii, molenge ti Bebai, zo ti kete mara ti Bebai; akoli 28 amu peko ti lo;

¹²Yohanan, molenge ti Hakatan, zo ti kete mara ti Azgad; akoli 110 amu peko ti lo;

¹³Elifelet, Yeiel na Shemaya, andangba molenge ti azo ti kete mara ti Adonikam; akoli 60 amu peko ti ala;

¹⁴Utai na Zakur, azo ti kete mara ti Bigvai; akoli 70 amu peko ti ala.

¹⁵Mbi bongbi azo ni na tere ti ngu so ayeke sua, ague na mbage ti Ahava; e duti na ndo so lango ota. Na popo ti azo ni, mbi baa so asenge zo ayeke daa, ala na awayango-sandaga; me zo ti mara ti Lévi oko ayeke daa pepe.

¹⁶Tongaso mbi iri amakonzi Eliezer, Ariel, Shemaya, Elnatan, Yarib, Elnatan, Natan, Zakarii, Meshulam na awafango-ndia use, Yoyarib na Elnatan.

¹⁷Mbi mu yanga na ala ti gue na ndo ti Ido, makonzi so ayeke lango na Kasifia. Mbi tene na ala tënë so ala lingbi ti tene na Ido nga na amba ti lo, azo ti kua ti kota da ti Nzapa si ala yeke lango na Kasifia. Mbi tokua ala titene ala gue, aga na azo ndali ti kua ti kota da ti Nzapa ti e.

¹⁸Ndali ti so maboko ti Nzapa ti e ayeke na ndö ti e, azo so mbi tokua ala so ague, aga na Sherebia, mbeni zo so le ti lo ahan mingi; Sherebia ayeke zo ti kete mara ti Mali, mbeni *hale ti azo ti mara ti Lévi, molenge ti Jacob. Sherebia na amolenge ti lo nga na a-ita ti lo laa aga; akoli kue ayeke 18.

¹⁹Ala ga nga na Hashabia; Yeshaya, zo ti kete mara ti Merari amu peko ti lo, lo na a-ita ti lo na amolenge ti ala; akoli kue ayeke 20.

²⁰Ala ga nga na akoli 220 so ayeke azo ti sarango kua ti kota ti Nzapa; a soro ala na lege ti iri ti ala. David na amakonzi amu ando ala titene ala sara kua na azo ti mara ti Lévi.

²¹Kâ na tere ti ngu ti Ahava, mbi mu yanga titene e ke kobe, e sara tere ti e kete na gbe ti Nzapa. Tongaso si e, na asewa ti e, e hunda na lo ti sara si tambula ti e ague nzoni si ye asara akungba ti e pepe.

²²Tongana mbi hunda fade na gbia titene lo mu na e aturugu na azo ti kpengo na ambarata titene ala bata e na lege ndali ti awato ti e, ka kamene asara mbi. Biani, lani e tene na gbia, e tene: “Maboko ti Nzapa ti e ayeke na ndö ti azo so kue ayeke gi lo; me ngonzo ti lo ayeke londo ngangu na tere ti azo so azia lo.”

²³Ndani laa e ke kobe, e hunda na Nzapa ti e ti bata e; tongaso lo ma sambela ti e.

²⁴Na pekoni, mbi soro akota zo ti awayango-sandaga baleoko na use, ala na Sherebia, Hashabia na amba ti ala baleoko, mbi zia ala nde.

²⁵Na le ti ala, mbi haka wen ti nginza, lôro na aye nde nde ti ngangu ngere so lani gbia, awamungo-wango ti lo, agbenyogbia ti lo na azo ti Israel so ayeke na ya ti kodro ni amu ndali ti kota da ti Nzapa ti e.

²⁶Mbi mu na ala wen ti nginza so nengo ni kilo 20 000, aye ti ngangu ngere so a sara ni na wen ti nginza, nengo ni kilo 3 000 na lôro so nengo ni kilo 3 000.

²⁷Mbi mu na ala kota sembe ti lôro so ngere ni alingbi na ale ti lôro 1 000; ata use so a sara ni na bengba wen si ayeke za zango, apendere mingi si ayeke nga ye ti ngangu ngere tongana lôro.

²⁸Mbi tene na ala: “A zia ala nde ndali ti kua ti *KOTA GBIA awe. Legeoko nga a zia aye so nde ndali ti lo awe. Wen ti nginza na lôro so ayeke aye so azo amu na be ti ala wani na KOTA GBIA, Nzapa ti akotara ti ala.

²⁹Le ti ala akpengba, ala bata amosoro so nzoni ngbii ala si na ni na Jérusalem. Kâ, na ya ti ada so ayeke na ya ti gbagba ti kota da ti KOTA GBIA, fade ala yeke haka ni na kilo na le ti akota wayango-sandaga, azo ti mara ti Lévi nga na azo ti li ti asewa.”

³⁰Tongaso awayango-sandaga na azo ti mara ti Lévi amu wen ti nginza, lôro na aye ti ngangu ngere so a haka so titene ala gue na ni na Jérusalem, na ya ti kota da ti Nzapa ti e.

³¹Na lango baleoko na use ti kozo nze ni, e londo na tere ti ngu ti Ahava ti gue na Jérusalem. Na lege, maboko ti Nzapa ti e ayeke na ndö ti e, lo bata e na maboko ti awato ti e nga na maboko ti azaragina so ayeke ku e na lege ti sara sioni na e.

³²So e si na Jérusalem, e wu tere ti e na ya ti lango ota.

³³Na lango osio ni, e gue na ya ti kota da ti Nzapa ti e, e haka wen ti nginza, lôro na aye ti ngangu ngere ni. Na pekoni, e mu aye ni na wayango-sandaga Meremot, molenge ti Uria; wayango-sandaga Elazar, molenge ti Pinas, lo na azo ti mara ti Lévi Yozabad, molenge ti Yeshua, na Noadia, molenge ti Binui laa amu peko ti Meremot.

³⁴So a diko aye ni kue si a haka ni awe, a su nengo ni kue na mbeti.

³⁵Azo so a gbu ala lani, a gue na ala na kodro wande si ala kiri so, ala mu *asandaga so a yeke gbi ni kue na wâ na Nzapa ti Israel: ala mu na lo akoli-bagara baleoko na use ndali ti azo ti Israel kue, akoli-taba balegumbaya na omene, amolenge ti taba balembarambara na mbarambara. Ala mu nga akoli-ngasa baleoko na use ndali ti zingo siokpari na li ti ala wani. Ala mu anyama so kue na sandaga so a yeke gbi ni kue na wâ ndali ti *KOTA GBIA.

³⁶Na pekoni, mbeti ti ndia so gbia amu lani na ala so, ala mu ni na akota komanda ti gbia nga na agovoronere so ayeke na Do ti ngu ti Efrate. Akota zo ni so amu maboko na azo ti Israel nga na kota da ti Nzapa.