Read La Bible en Sango courant – Mbeti ti Nzapa Néhémie 1 Bible Online

Néhémie 1 - La Bible en Sango courant – Mbeti ti Nzapa bible

Néhémie 1

¹Mbai ti Néhémie, molenge ti Hakalia. Na ngu baleuse ni so Artakzerses ayeke le-gbia na Perse, na nze ti Kisleu, mbi, Néhémie, mbi yeke na Suze, kota gbata so a sara ngangu gbagba na tere ni.

²Hanani, mbeni oko ti a-ita ti mbi, alondo na Juda aga, lo na ambeni koli na tere ti lo. Mbi hunda ala na ndö ti azuife so angba, ala so a gue na ala lani na Babilone pepe; mbi hunda nga ala na ndö ti Jérusalem.

³Ala kiri tënë na mbi, atene: “Tanga ti azo so angba, ala so a gbu ala, a gue na ala na kodro wande pepe so, ala yeke na ya ti kota mawa nga na ya ti kota kamene. A koro adu na tere ti dere ti gbagba ti Jérusalem kirikiri; wâ agbi ayanga ti gbagba ni kue.”

⁴So mbi ma atënë so, mbi duti na sese, mbi toto; na ya ti ambeni lango, mbi sara mawa, mbi ke kobe, mbi sambela Nzapa ti yayu,

⁵mbi tene: “*KOTA GBIA, Nzapa ti yayu, mo yeke kota, mo yeke mu mbeto na zo! Mo yeke bata tënë ti *mbuki ti mo na azo so ayeke sara ye alingbi na atënë ti ndia ti mo; mo yeke sara nzoni be na azo so aye mo.

⁶Mbi gbu gere ti mo, ayeke nzoni mo bi le ti mo na mbage ti mbi, mo zi mê ti mo, mo ma sambela so mbi yeke ya na mo, mbi, zo ti kua ti mo. Ti ndembe so, bi na lâ, mbi ngba na gbe ti mo ti sambela ndali ti e, azo ti Israel, azo ti kua ti mo. Mbi hunda na mo ti zi na li ti e asiokpari so e sara ti ke mo. Biani, mbi na akotara ti mbi, e sara siokpari.

⁷E sara ye so ayeke sioni mingi ti ke mo; e ke ti sara ye alingbi na atënë ti ndia ti mo, andia ti mo nga na aye so mo fa na e na lege ti Moïse, zo ti kua ti mo.

⁸Mbi gbu gere ti mo, ayeke nzoni mo dabe ti mo na tënë ti mo so mo zia na yanga ti Moïse ti tene na e, mo tene: ‘Tongana ala ke ti zia be ti ala na ndö ti mbi, fade mbi yeke kangbi ala na popo ti amara nde.

⁹Me tongana mbeni lâ, ala kiri na mbi, tongana ala bata atënë ti ndia ti mbi, tongana ala sara ye alingbi na ni, fade mbi yeke bongbi ala na ndo oko. Ataa a gbu ala si a gue na ala na mbeni kodro so ayeke na nda ti sese, mbi yeke kiri na ala na ndo so mbi soro titene iri ti mbi aduti daa.’

¹⁰KOTA GBIA, e yeke azo ti kua ti mo, e yeke azo ti mo! E laa mo zi e na gbe ti ngbaa na lege ti kota ngangu ti mo nga na lege ti ngangu ti maboko ti mo.

¹¹KOTA GBIA, mbi gbu gere ti mo, mo zi mê ti mo, mo ma sambela ti mbi, zo ti kua ti mo. Mo ma nga sambela ti azo ti kua ti mo, ala so ayeke na ngia ti ne iri ti mo. Mo sara si aye ti mbi, zo ti kua ti mo, aga nzoni laso. Mo sara si ye so mbi yeke hunda na gbia, lo kiri tënë na mbi na nzoni be.” Biani, mbi yeke lani zo ti mungo samba na gbia.