Read La Bible en Sango courant – Mbeti ti Nzapa Néhémie 2 Bible Online

Néhémie 2 - La Bible en Sango courant – Mbeti ti Nzapa bible

Néhémie 2

¹Na ngu baleuse ni so Artakzerses ayeke le-gbia, na nze ti Nisan, na ndembe so gbia aduti ti te kobe, mbi mu samba mbi tuku ni na lo. Mbi yeke na vundu; laoko mbi si na dawa ti lo tongaso pepe.

²Tongaso gbia ahunda mbi, atene: “Ngbanga ti nyen si le ti mo ayeke na ngia pepe so? Ka so tere ti mo aso pepe so! Mbeni ye ayeke so be ti mo?” Mbeto asara mbi mingi.

³Me mbi kiri tënë na gbia, mbi tene: “Gbia na nduzu! Le ti mbi alingbi ti duti na ngia tongana nyen? Gbata so a lu akotara ti mbi daa ati awe si wâ agbi ayanga ti gbagba ni kue awe so!”

⁴Gbia atene na mbi: “Mo ye nyen?” Mbi sambela Nzapa ti yayu.

⁵Na pekoni, mbi tene na gbia, mbi tene: “Gbia, tongana mo yeda, tongana mo ye ti sara nzoni be na mbi, zo ti kua ti mo, ayeke nzoni mo mu lege na mbi ti gue na sese ti Juda, na ya ti gbata so a lu akotara ti mbi daa titene mbi kiri mbi leke ni.”

⁶Wali ti gbia aduti na tere ti lo; gbia ahunda mbi, atene: “Tambula ti mo ni ayeke ninga lango oke? Mo yeke kiri lawa?” Tongaso gbia ayeda ti zia na mbi lege ti gue; nilaa mbi fa na lo lango ti kiringo ti mbi.

⁷Mbi kiri mbi tene na gbia: “Gbia, tongana mo baa nzoni na le ti mo, ayeke nzoni mo sara titene a mu na mbi mbeni mbeti so mbi yeke gue na ni na agovoronere so ayeke na Do ti ngu ti Efrate, tongaso si ala lingbi ti zia lege na mbi ti hon ti gue na Juda.

⁸Ayeke nzoni a mu nga na mbi mbeni mbeti so mbi yeke gue na ni na Asaf, wabatango-gbako ti gbia. Tongaso, fade lo yeke mu na mbi akeke so alingbi titene a sara na ayanga ti gbagba ti bira so ayeke na tere ti kota da ti Nzapa. Mbi yeke mu nga akeke ni ti leke na agbagba ti gbata ni nga na da so mbi yeke lango ande na ya ni.” Gbia amu na mbi ambeti ni, ngbanga ti so maboko ti Nzapa ti mbi ayeke na ndö ti mbi ti bata mbi.

⁹Mbi gue, mbi baa agovoronere so ayeke na Do ti ngu ti Efrate, mbi mu na ala ambeti ti gbia. Gbia azia ambeni turugu ti kota kamba na azo ti kpengo na ambarata titene ala bata mbi na lege.

¹⁰Sanebalat, zo ti gbata ti Horon, lo na Tobia, zo ti mara ti Amon so ayeke mu maboko na lo ama a tene, mbeni zo ayeke ga ti sara mbeni ye ti nzoni ndali ti azo ti Israel, be ti ala aso mingi.

¹¹So mbi si na Jérusalem, mbi duti kâ lango ota.

¹²Ye so Nzapa azia na be ti mbi ti sara ndali ti Jérusalem, mbi tene tënë ni na zo oko pepe. Na pekoni, mbi londo na bi, mbi na ambeni zo so mbi mu ala na tere ti mbi. Mbi gue na mbeni nyama nde pepe, gi lele so mbi duti na ndö ti lo ti tambula na lo.

¹³Na bi, mbi sigigi na yanga ti gbata so iri ni Ti-popo-hoto, mbi gue na mbage ti li ti ngu so iri ni Ti-nyama-so-akpa-ngunde nga na mbage ti yanga ti gbata so iri ni Ti-puru. Mbi baa mbage ti afango gbagba ti Jérusalem nzoni; mbi baa so a koro adu kirikiri na ya ti gbagba ni si wâ agbi ayanga ti gbagba ni kue.

¹⁴Mbi gue, mbi si na yanga ti gbata so iri ni Ti-li-ti-ngu nga na mbage ti *lende ti gbia. Me lele so mbi duti na ndö ti lo so agi lege ti hon daa gbaa.

¹⁵Tongaso, gi na bi, mbi gue na mbage ti nduzu, na lege ti kete ngu so iri ni Sedron si mbi baa mbage ti afango gbagba ni nzoni. Na pekoni, mbi kiri, mbi si na yanga ti gbata so iri ni Ti-popo-hoto; tongaso mbi kiri na ya ti gbata ni.

¹⁶Amakonzi ti gbata ni ahinga ndo so mbi gue daa pepe, wala ye so mbi sara ni pepe. Ngbene ye so mbi si na gbata ni ngbii asi fadeso, tënë so ayeke na be ti mbi, mbi de ti fa ni na zo oko pepe, ataa na azuife, wala na awayango-sandaga, wala na akota zo, wala na amakonzi, wala na azo ti sarango kua.

¹⁷Tongaso, mbi tene na ala: “Ala baa mawa so e yeke na ya ni so! Gbata ti Jérusalem ati awe, wâ agbi ayanga ti gbagba ni kue awe. E londo, e kiri e leke gbagba ti Jérusalem, tongaso si e zi kamene na le ti e!”

¹⁸Mbi fa na ala lege so maboko ti Nzapa aduti na ndö ti mbi ti bata mbi nga na tënë so gbia atene na mbi. Tongaso ala tene: “E londo, e leke gbata ni!” Ala yeke na ngangu kue ti sara nzoni kua ni.

¹⁹Me so Sanebalat, zo ti gbata ti Horon, lo na Tobia, zo ti mara ti Amon so ayeke mu maboko na lo, na Geshem so ayeke arabu ama tënë ni, ala to nda ti he e na ngia; ala baa e tongana ambumbuse zo, ala tene: “Nyen laa ala yeke sara so, nyen? Ala ye ti tomboka na tere ti gbia laa ma?”

²⁰Mbi kiri tënë na ala: “Nzapa ti yayu wani laa ayeke sara titene kua ni aga nzoni. E yeke azo ti kua ti lo, e yeke londo ti kiri ti leke gbata ni. Me ti ala, mbeni ye ti ala oko ayeke na ya ti gbata ni pepe, ala yeke nga na komandema na ya ti gbata ni pepe. Zo ayeke kiri ti dabe ti lo na ala pepe!”