Read La Bible en Sango courant – Mbeti ti Nzapa Néhémie 4 Bible Online

Néhémie 4 - La Bible en Sango courant – Mbeti ti Nzapa bible

Néhémie 4

¹Me so Sanebalat, Tobia, a-arabu, azo ti mara ti Amon na azo ti mara ti Asdod ama a tene, kua ti gbagba ti Jérusalem ayeke tambula nzoni si a to nda ti kanga adu ni, ngonzo agbu ala ngangu mingi.

²Ala kue ama tere na hondengo ni ti ga ti sara bira na Jérusalem nga ti bi wusuwusu na ya ti gbata ni.

³Tongaso e sambela Nzapa ti e si e zia asanziri ti duti bi na lâ ti kanga lege na ala.

⁴Me azo ti Juda atene: “Ngangu ti azo ti kua ni ahunzi kue awe, gba ti atêne so atuku ahon ndoni! E lingbi ande ti leke gbagba ni oko pepe!”

⁵Ti awato ti e, ala tene: “Kozoni si e si na popo ti ala, ala yeke hinga tënë ni oko pepe, ala yeke baa e oko pepe. Tongaso e yeke ti na ndö ti ala ti fâ ala si e yeke sara titene kua ni akai.”

⁶Andaa azuife so alango nduru na awato ti e si ala yeke na ando nde nde aga fani baleoko si atene na e: “Ala kiri na ndo ti e!”

⁷Tongaso mbi leke mbeni ndo so gbagba ni ayeke na gbeni, na peko ti gbagba ni, mbi zia azo ni na lege ti kete mara ti ala; ayongoro zeme, alikongo na akokora ayeke na maboko ti ala.

⁸Mbi baa ndo, na pekoni mbi londo, mbi tene na akota zo, amakonzi nga na tanga ti azo ni, mbi tene: “Ala sara mbeto ti awato ni pepe! Ala dabe ti ala so *KOTA GBIA so ayeke kota, lo yeke mu mbeto na zo. Ala tiri bira ndali ti a-ita ti ala, amolenge ti ala ti koli na ti wali, awali ti ala nga na ada ti ala.”

⁹So awato ti e ama a tene, e hinga tënë ni awe si Nzapa asara titene pialo ti ala ali ngu, e kue, e kiri na tere ti gbagba ni, zo oko oko na yanga ti kua ti lo.

¹⁰Ti londo na lango ni so, ndambo ti azo ti mbi ayeke sara kua ti gbagba ni; atanga ni agbu likongo, *vala, kokora si ala yu kazaka ti wen. Amakonzi ayeke baa ndo na ndö ti azo ti Juda kue.

¹¹Azo ti lekengo gbagba na azo ti yongo akungba ayeke sara kua na mbeni maboko oko si ala gbu aye ti bira na tanga ti maboko ni.

¹²Azo ti sarango gbagba, zo oko oko akanga yongoro zeme na ngbonda ti lo. Zo ti hurungo didi aluti na tere ti mbi.

¹³Mbi tene na akota zo, amakonzi nga na tanga ti azo ni kue, mbi tene: “Kua ni akono mingi si angba mingi. Me e yeke sara kua na ando nde nde si popo ti e ayo na amba ti e.

¹⁴Na ndo so kue ala yeke daa, tongana ala ma toto ti didi, ala bongbi na tere ti mbi. Fade Nzapa ti e ayeke tiri bira ndali ti e!”

¹⁵Lege so e yeke sara kua ni laa: ti londo na kota ndaperere ngbii asi na bi, ndambo ti azo na popo ti e agbu likongo na maboko ti ala.

¹⁶Na ngoi ni so, mbi mu yanga na azo ti li ti kua ni titene ala oko oko na azo ti kua ti ala alango na ya ti Jérusalem, tongaso si na bi, ala baa ndo na tere ti e si na kota lâ, ala kiri na yanga ti kua.

¹⁷Ataa mbi, ataa a-ita ti mbi, ataa azo ti mbi, ataa asanziri so ayeke mu peko ti mbi, zo oko azi bongo ti lo pepe. Zo oko oko ayeke na ye ti bira ti lo na maboko ti lo.