Read La Bible en Sango courant – Mbeti ti Nzapa Néhémie 6 Bible Online

Néhémie 6 - La Bible en Sango courant – Mbeti ti Nzapa bible

Néhémie 6

¹Sanebalat, Tobia, Geshem so ayeke arabu, ala na ambeni wato ti e ama a tene, mbi leke gbagba ti gbata ni awe si adu ayeke na ya ni mbeni pepe. Na ndembe ni so, mbi de ti zia ayanga ti gbagba ni daa pepe.

²Tongaso Sanebalat, lo na Geshem atokua mbeni zo na mbi titene mbi gue, mbi wara ala na Kefirim, na popo-hoto ti Ono titene mbi na ala e leke mbeni tënë. Andaa ala yeke gi lege ti sara sioni na mbi.

³Mbi tokua azo na ala, mbi tene: “Mbi yeke na kua mingi ti sarango ni; mbi lingbi ti gue pepe. Tongana mbi londo ti gue na ala kâ, fade kua ni ayeke luti.”

⁴Ala tokua na mbi fani osio ti tene na mbi gi oko tënë so; fani osio nga, mbi kiri na ala gi oko tënë.

⁵Ti fani oku ni, Sanebalat atokua na mbi mbeni zo ti kua ti lo ti ga na mbeni mbeti so a kanga yanga ni pepe.

⁶Tënë ti ya ti mbeti ni atene: “A yeke ma â-atene na popo ti amara nde atene, mo na a-ita ti mo azuife, ala yeke gi lege ti tomboka na tere ti gbia. Tënë so Geshem atene nga na e laa. Ndani laa mo yeke leke gbagba ti gbata ni so. Mo ye nga ti ga gbia ti azuife ni.

⁷E ma nga atene, mo mu ambeni wayanga-Nzapa titene ala to mbela na ya ti Jérusalem atene: ‘Mbeni gbia ayeke fadeso na Juda!’ Tënë ni ayeke ninga ande pepe ti si na mê ti gbia. Nilaa, ayeke nzoni mo ga, mbi na mo, e gbu li ti e daa.”

⁸Mbi kiri tënë na lo, mbi tene: “Tënë so mo tene so ayeke taa-tënë pepe; so atënë ti ya ti li ti mo wani laa!”

⁹Biani, azo so kue aye ti bi mbeto na ya ti e; nilaa ala tene: “Gbaa, fade be ti ala ayeke woko si ala yeke do lege ti kua ni ti zia.” KOTA GBIA, mo mu na mbi ngangu ndali ti kua ni!

¹⁰Mbeni lâ, mbi gue, mbi baa Shemaya, molenge ti Delaya, molenge ti Metabeel. Biani, Shemaya awara lege lani pepe ti si na ndo ti mbi. Lo tene na mbi, lo tene: “E li na ya ti kota da ti Nzapa, e duti na ndo so ayeke nde si ayeke nzoni kue; e kanga yanga ti da ni na ndö ti e, ngbanga ti so awato ti mo ayeke ga na bi so ti fâ mo.” —

¹¹Mbi kiri tënë na lo, mbi tene: “Zo tongana mbi so laa alingbi ti kpe? Zo tongana mbi so alingbi ti li na ndo so ayeke nde si ayeke nzoni kue si lo ngba na fini? Mbi yeke li kâ oko pepe!”

¹²Mbi ma ya ni si mbi hinga so Nzapa laa atokua lo ti tene tënë na mbi so pepe. Me Tobia na Sanebalat laa apete goro na lo titene lo ga lo tene tënë so na mbi.

¹³Ala pete na lo goro ni ngbanga ti nyen? Ala pete na lo goro ni titene mbeto agbu mbi, mbi sara ye alingbi na wango ti lo si mbi sara siokpari. Tongaso si ala bi buba na tere ti mbi si ala zia kamene na le ti mbi.

¹⁴“Nzapa ti mbi, mo dabe ti mo na ye so Tobia na Sanebalat asara, nga na Noadia, wayanga-Nzapa ti wali, lo na tanga ti awayanga-Nzapa so aye ti bi mbeto na ya ti mbi!”

¹⁵Kua ti gbagba ni ahunzi na lango baleuse na oku ti nze ti Elul, so ti tene na peko ti lango baleoku na use.

¹⁶So awato ti e kue ama tënë ni, mbeto agbu amara so kue angoro e, kamene ahon ndö ti ala. Ala hinga atene, Nzapa ti e laa amu maboko na e si kua ti gbagba ni ahunzi so.

¹⁷Na ngoi ni so kue, akota zo ti Juda angba ti tokua ambeti mingi na Tobia; Tobia nga ayeke tokua ambeti na ala.

¹⁸Biani, azuife mingi so ayeke na Juda adeba yanga ti ala ti sara kua na gbe ti Tobia, ngbanga ti so lo yeke kogara ti Shekania, molenge ti Ara; molenge ti Shekania so iri ti lo Yohanan amu molenge ti Meshulam ti ga wali ti lo; Meshulam ayeke molenge ti Berekia.

¹⁹Azo ayeke gonda Tobia na le ti mbi; ala yeke mu nga atënë ti mbi ti tene na lo. Tobia ayeke tokua nga ambeti ti bi mbeto na ya ti mbi.