Read La Bible en Sango courant – Mbeti ti Nzapa Esther 7 Bible Online

Esther 7 - La Bible en Sango courant – Mbeti ti Nzapa bible

Esther 7

¹Gbia na Haman akiri ague na ndo ti Esther, wali ti gbia, ti te, ti nyon

²ti fani use ni. So ala hunzi ti te kobe awe, gbia akiri ahunda Esther, atene: “Esther, wali ti gbia, mo ye nyen? Fade a yeke mu ni na mo. Nyen laa mo hunda, nyen? Mbi yeke nduru ti mu na mo ye kue, ataa ndambo ti kodro ti mbi!”

³Esther, wali ti gbia, akiri tënë, lo tene: “Babâ gbia, tongana mo ye ti sara nzoni be na mbi, wala tongana be ti mo aye, ye so mbi hunda na mo ayeke so: mbi ye gi fini ti mbi na fini ti azo ti mara ti mbi; gi ye so mbi ye ti hunda na mo laa!

⁴Biani, azo aka e, mbi na azo ti mara ti mbi titene a fâ e a hunzi e kue, mbeni zo oko angba pepe! Tongana fade ayeke gi senge kango e tongana angbaa ti koli na ti wali, ka mbi lingbi ti zi yanga daa pepe, ngbanga ti so mara ti tënë tongaso laa zo alingbi ti so li ti gbia daa pepe.”

⁵Gbia Zerses ahunda wali ti lo Esther, atene: “Zo wa laa aleke na be ti lo ti sara mara ti ye tongaso so, zo wa? Zo ni ayeke na ndo wa?”

⁶Esther akiri tënë: “Zo so asara ngangu na e so, wato ti e so… Haman laa, sioni zo so!” Na dawa ti gbia nga na ti wali ti lo, kota mbeto agbu Haman.

⁷Wâ ti ngonzo amu gbia, lo londo hio na ndo so ala yeke sara matanga ni daa so si lo gue na ndo so a lu apendere kongo daa na ya ti yangbo ni. So Haman ahinga atene, gbia aye gi kuâ ti lo, lo ngba na ndo so ti gbu gere ti Esther, wali ti gbia, titene Esther asoo fini ti lo.

⁸Gbia alondo na ndo so a lu apendere kongo daa so si lo kiri, lo ga na kota ya ti da ti tengo kobe ni. Tongaso, lo baa Haman so ati na tere ti Esther na ya ti kota ngende so Esther ayeke daa. Ngonzo ti gbia akiri alondo ngangu si lo dekongo atene: “Na ndö ni kue, lo ye ti gbu wali ti mbi na ngangu ti lango na lo taa na le ti mbi na ya ti yangbo ti mbi?” Gi so lo tene tënë ni tongaso, azo ti kua ti gbia agbu Haman si ala kanga le ti lo na bongo.

⁹Harbona, oko ti *ambaiwa atene na gbia, atene: “Babâ gbia, Haman wani aleke mbeni kota keke so ayo na nduzu metere baleuse na oku; lo leke ni titene a kanga go ti Mardochée daa na nduzu; keke ni ayeke na yanga ti da ti lo. Mardochée ayeke zo so lani atene nzoni tënë si asoo fini ti mo so.” Gbia amu yanga, lo tene: “Ala kanga go ti Haman na tere ti keke ni na nduzu!”

¹⁰Ala kanga go ti Haman na nduzu na tere ti keke so lo wani, lo leke ndali ti Mardochée. Na pekoni, ngonzo ti gbia ade.