Read La Bible en Sango courant – Mbeti ti Nzapa Esther 8 Bible Online

Esther 8 - La Bible en Sango courant – Mbeti ti Nzapa bible

Esther 8

¹Gi na lango ni so, gbia Zerses amu na wali ti lo Esther akungba ti da ti Haman kue; Haman so ayeke zo ti sarango ngangu na azuife so. Andaa Esther afa na gbia ni kozoni awe so Mardochée ayeke mbeni songo ti lo. Nilaa Mardochée aga na dawa ti gbia.

²Bage ti gbia so ayeke lani na li ti maboko ti Haman so, gbia azi ni si amu na Mardochée. Esther amu Mardochée si azia lo ti baa ndo na ndö ti akungba kue ti da ti Haman.

³Esther akiri atene tënë na gbia. Lo ti na gbe ti gere ti lo na toto, lo voro gbia titene lo kanga lege na sioni ye so Haman, mbeni *hale ti Agag, aleke na be ti lo ti sara na azuife so.

⁴Gbia ayoro na Esther keke ti gbia so a sara na lôro. Tongaso Esther alondo si lo luti na dawa ti gbia,

⁵lo tene: “Gbia, tongana be ti mo aye, tongana mo ye ti sara nzoni be na mbi; tongana mo baa nzoni na le ti mo, tongana mbi nzere na le ti mo, ayeke nzoni a su mbeni mbeti nde ti mingo ngangu ti ambeti so Haman, molenge ti Hamedata, zo ti mara ti Agag, asu ni titene a fâ azuife so ayeke lango na ya ti akodro-sese ti mo oko oko kue so.

⁶Fade mbi kanga be ti mbi tongana nyen ti duti ti baa sioni ye so ayeke ga ti ti na ndö ti azo ti mbi so? Fade mbi kanga be ti mbi tongana nyen ti duti ti baa azo ti mara ti mbi so a yeke fâ ala kue so?”

⁷Gbia Zerses akiri tënë na wali ti lo Esther nga na Mardochée, zuife ni, atene: “Ala baa, mbi mu akungba ti da ti Haman kue na Esther awe. Ti Haman, ndali ti so lo ye ti fâ azuife kue, a kanga go ti lo na tere ti keke na nduzu si lo kui.

⁸Me lege ayeke daa pepe titene mbeni mbeti so a su iri ti mbi daa si a kpo nzoroko ti mbi na ndö ni, a kiri a mingo ngangu ni. Tongaso, ayeke nzoni ala wani asu ti ala mbeti ni tongana ti so be ti ala aye ndali ti azuife. Fade ala su iri ti mbi daa si ala kpo nzoroko ti mbi na ndö ni.”

⁹Gi na oko lango ni so, so ti tene na lango baleuse na ota ti ota nze ni, so ti tene nze ti Sivan si a tisa awakuasu ti gbia ti ga. Ala ga si ala su ambeti ni alingbi gi na yanga so Mardochée amu na ala ndali ti azuife; ala tokua ambeti ni na akota komanda, agovoronere nga na akota zo ti akodro-sese ngbangbo oko na baleuse na mbarambara ti kodro ni kue, ti londo na Inde ngbii asi na Etiopii. Ala su ambeti ni na lege ti kode ti sungo mbeti ti azo ti akodro-sese oko oko nga na yanga ti kodro ti amara oko oko. Ala su nga ambeti ni na lege ti kode ti sungo mbeti ti azuife nga na yanga ti kodro ti ala.

¹⁰Ala su iri ti gbia Zerses daa si ala kpo nzoroko ti lo na ndö ni. Na pekoni ala mu ambeti ni na azo ti tokua ti gbia si ala gue na ni. Azo ti tokua ni ako na ndö ti ambarata so ahinga ti mu loro mingi; ambarata so a bata ala nzoni ndali ti gbia.

¹¹Tënë ti ya ti ambeti ni ayeke tongaso: “Gbia amu yanga na azuife so ayeke na ya ti agbata oko oko kue ti bongbi tere ti ala ti luti ti bata fini ti ala. Lo mu yanga na ala ti fâ aturugu kue ti mbeni mara wala ti mbeni kodro-sese so aye ti tiri bira na ala; ala fâ azo ni kue a hunzi ala, mbeni oko angba pepe, ataa awali na amolenge ti ala; ala gbu akungba ti azo ni si aga ti ala.

¹²Ala sara aye so kue gi na ya ti lango oko na ya ti kodro ti gbia Zerses ni kue, mbirimbiri na lango baleoko na ota ti nze baleoko na use ni so a iri ni nze ti Adar.

¹³Na ya ti kodro-sese oko oko so ambeti ni asi daa, alingbi tënë ti ya ni aga tongana ndia; ayeke nzoni a fa tënë ni na azo kue titene ala hinga ni, tongaso si azuife aleke tere ti ala ti fâ awato ti ala tongana lango ni so alingbi.”

¹⁴Gi so gbia amu yanga tongaso, azo ti tokua ni asigigi na loro; ala ko na ndö ti ambarata so ahinga ti mu loro mingi si ala gue; ambarata so a bata ala nzoni ndali ti gbia. Azo akangbi nga tënë ti mbela ni na ya ti Suze, kota kodro ni kue.

¹⁵Mardochée asigigi na yangbo ti gbia; lo yu bongo ti gbia so nzoroko ni akpa ngu ti karakanzi si mbeni avuru vurungo. Lo yu nga mbeni kota bongo so abe bengo si lo zia na li ti lo kpoto ti gbia so a sara na lôro. Be ti azo ti gbata ti Suze kue asi na kota ngia si ala yeke dekongo na ngia.

¹⁶Ti azuife, lango ni so ayeke lango ti lumiere, lango so be ti ala asi singo na ngia, lango ti kota ngia nga na lango so azo ayeke ne ala.

¹⁷Na kodro-sese oko oko wala na ya ti gbata oko oko so ndia ni wala mbela ni asi daa, be ti azuife kue asi singo na ngia, ala yeke dodo na ngia si ala yeke sara amatanga gbani gbani. Azo mingi ti ambeni kodro so abaa aye ni tongaso, kota mbeto agbu ala sara tere ti ala tongana azuife.