Read La Bible en Sango courant – Mbeti ti Nzapa Sigingo 1 Bible Online

Sigingo 1 - La Bible en Sango courant – Mbeti ti Nzapa bible

Sigingo 1

¹So ayeke iri ti amolenge ti Jacob, so ti tene amolenge ti Israel na ala na lo ague na Ezipte, zo oko oko na asewa ti lo:

²Ruben, Siméon, Lévi na Juda.

³Isakar, Zabulon na Benjamin,

⁴Dan na Neftali, Gad na Aser.

⁵*Ahale ti Jacob kue ayeke balembarambara. Joseph, mbeni molenge ti Jacob asi ti lo na Ezipte kozoni.

⁶Na pekoni, Joseph akui, lo na a-ita ti lo nga na azo ti ngoi ni so.

⁷Azo ti Israel adu gbani si ala wu ahon ndoni, ngangu ti ala ayeke gue guengo na nduzu; ala si singo na ya ti kodro ni.

⁸Mbeni fini gbia so ahinga Joseph pepe ato nda ti le-gbia na ndö ti kodro ti Ezipte.

⁹Lo tene na azo ti lo, lo tene: “Ala baa, azo ti Israel awu ahon ndoni, ala yeke ngangu mingi ahon e.

¹⁰Alingbi e gi mbeni nzoni kode ti sara si ala kiri awu mingi pepe. Tongaso pepe, tongana mbeni bira alondo, fade ala yeke bongbi na awato ti e ti tiri na e si ala yeke sigigi na kodro ti e ti hon.”

¹¹Tongaso azo ti Ezipte azia amakonzi ti kua na ndö ti azo ti Israel titene a mu na ala akua ti ngbaa. Nilaa azo ti Israel asara agbata tongana Pitom na Ramses ndali ti batango akungba na akobe ti yaka ti Faraon.

¹²Me tongana a yeke sara pasi na ala mingi, ala kiri awu ahon ndoni si ala mu ndo mingi. Ndani laa be ti azo ti Ezipte ato nda ti ke azo ti Israel si ala sara mbeto ti ala.

¹³Tongaso azo ti Ezipte asara pasi na ala si ala ga tongana angbaa.

¹⁴Ala sara si dutingo ti azo ti Israel aga ngangu na lege ti angangu kua ti ngbaa: sarango potopoto ti pika na biriki, gbotongo abiriki nga na sarango akua kue ti yaka; so ti tene, azo ti Ezipte asara pasi mingi na azo ti Israel na lege ti sarango angangu kua nde nde.

¹⁵Ambeni wali use so ayeke mu amolenge na tere ti awali ti ahebro ayeke daa: iri ti mbeni ayeke Shifra si iri ti mbeni ayeke Pua. Gbia ti Ezipte amu yanga na ala, atene:

¹⁶“Tongana ala yeke mu molenge na tere ti awali ti ahebro, ala baa molenge so wali ni ayeke du lo so nzoni: tongana molenge ni ayeke koli, ala fâ lo, tongana ayeke wali, ala zia lo, lo ngba na fini.”

¹⁷Me awali so ayeke mu molenge na tere ti awali akpe mbeto ti Nzapa; ala ke ti sara ye alingbi na yanga so gbia ti Ezipte amu na ala. Tongaso ala zia amolenge-koli angba na fini.

¹⁸Tongaso gbia ti Ezipte airi awali ni si lo hunda ala, lo tene: “Ala sara ye tongaso ngbanga ti nyen? Ala zia amolenge-koli angba na fini ngbanga ti nyen?”

¹⁹Awali ni akiri tënë na gbia Faraon, atene: “Ye ni ayeke so: awali ti ahebro ayeke tongana awali ti Ezipte pepe. Ala yeke ngangu mingi; ala yeke du kozoni si wali so ayeke mu molenge na tere ti awali asi.”

²⁰Tongaso azo ti Israel akiri awu mingi si ala wara ngangu mingi. Ti awali ti mungo molenge na tere ti amba ti ala, Nzapa asara nzoni na ala:

²¹lo mu na ala *ahale, ngbanga ti so ala kpe mbeto ti lo.

²²Tongaso Faraon amu yanga na azo ti lo kue, atene: “Amolenge-koli so kue ahebro adu ala, ala bi ala na ya ti *bale ti Nil! Me ala zia amolenge-wali angba na fini.”