Read La Bible en Sango courant – Mbeti ti Nzapa Sigingo 12 Bible Online

Sigingo 12 - La Bible en Sango courant – Mbeti ti Nzapa bible

Sigingo 12

¹Na kodro ti Ezipte, KOTA GBIA atene na Moïse na Aaron:

²“Nze so ayeke duti ande kozo nze ti ala. Nze so laa ayeke duti kozo nze ti ngu oko oko.

³Ala tene na bongbi ti azo ti Israel kue, atene: Na lango baleoko ti nze so, ala mu kete taba oko wala kete ngasa oko ndali ti azo ti sewa oko oko, wala ndali ti azo ti da oko oko.

⁴Tongana azo ti sewa ni ayeke mingi pepe ti te ngbongboro nyama oko kue, fade ala yeke ma tere na azo ti sewa so alango nduru na ala, alingbi na wungo ti azo ni. Na pekoni, ala yeke soro nyama ni alingbi na ti so zo oko oko alingbi ti te.

⁵Ala yeke soro kete koli-taba wala kete koli-ngasa ti ngu oko so mbeni mbage ti tere ti lo abuba pepe.

⁶Ala yeke bata nyama ni ngbii asi na lango baleoko na osio ti nze ni. Na lakui ti lango ni so, bongbi ti azo ti Israel kue ayeke fâ go ti nyama ni.

⁷Fade ala yeke mu mene ti nyama ni, ala sara na tere ti akadere ti yanga ti da nga na tere ti kadere ti nduzu ti da so a yeke te nyama ni daa.

⁸Na bi ni so, ala yeke zö kasa ti nyama ni zongo si ala te ni na mapa so a sara na mama ni pepe; ala yeke te nga kasa ni na pere so asee sengo.

⁹Ala yeke te kasa ni na fini ni pepe, wala ala to ni tongo pepe. Me ala yeke zö nyama ni zongo, ala yeke te li ni, na agere ni nga na ya ni kue.

¹⁰Ala yeke bata mbeni ye oko asi na ndaperere pepe. Tongana mbeni ye angba asi na ndaperere, ala gbi ni.

¹¹Lege so ala yeke te na nyama ni ayeke so: ala kanga kamba na ndö ti bongo ti ala, ala yu poro na gere ti ala, ala gbu keke na maboko ti ala. Ala te ni na loro. So ayeke *matanga ti Pake so ala yeke sara ndali ti mbi, KOTA GBIA laa.

¹²“Na bi ni so, fade mbi yeke hon na ya ti kodro ti Ezipte kue. Mbi yeke fâ akozo molenge-koli kue ti azo na ti anyama ti kodro ni. Mbi yeke fâ ngbanga na li ti anzapa kue ti Ezipte. Mbi laa mbi yeke KOTA GBIA.

¹³Me ti ada so ala yeke lango daa, mene ayeke duti tongana mbeni nzoroko ndali ti ala. Fade mbi yeke baa ni si mbi yeke hon hongo na ndö ti ada ni, mbi yeke luti pepe. Tongaso kpale so ayeke buba ndo ayeke wara ala pepe, na ndembe so mbi yeke fâ azo ti Ezipte.

¹⁴“Fade lango ni so ayeke duti lango ti dango be. Ala yeke sara kota matanga ndali ti mbi, KOTA GBIA: matanga ni ayeke duti mbeni ndia so ayeke ngba ngu na ngu ndali ti *ahale ti ala ti angoi kue.”

¹⁵KOTA GBIA akiri atene na Moïse na Aaron: “Na ya ti lango mbarambara, fade ala yeke te mapa so a sara na mama ni pepe. Gi na kozo lango ni, ala zi mama ti mapa na ya ti ada ti ala. Ti londo na kozo lango ni ti si na mbarambara lango ni, zo so ate mapa so a sara na mama ni, fade a yeke tumba lo na popo ti azo ti Israel.

¹⁶Na kozo lango ni nga na mbarambara lango ni, ala yeke bongbi azo ti voro Nzapa. Na ya ti alango so, ala yeke sara mbeni kua oko pepe. Gi kobe laa ala lingbi ti to ndali ti zo oko oko.

¹⁷“Fade ala yeke bata lango ti matanga ti Mapa so a sara na mama ni pepe so, ngbanga ti so na lango ni so laa mbi sara si ala sigigi na kodro ti Ezipte, na lege ti molongo ti mara ti ala. Ala yeke bata lango so ngu na ngu; ndia so ayeke ngba ngu na ngu ndali ti *ahale ti ala ti angoi kue.

¹⁸Na kozo nze ni, na lango baleoko na osio ti nze ni, na lakui, fade ala yeke te mapa so a sara na mama ni pepe, ngbii asi na lakui ti lango baleuse na oko ti nze ni.

¹⁹Na ya ti lango mbarambara, alingbi a wara mama ti mapa na ya ti ada ti ala pepe. Zo so ate mapa so a sara na mama ni, ataa lo yeke wande wala lo yeke molenge ti kodro, fade a yeke tumba lo na ya ti bongbi ti azo ti Israel.

²⁰Mapa so a sara na mama ni, alingbi ala te ni pepe. Na ndo so kue ala yeke lango daa, fade ala yeke te mapa so a sara na mama ni pepe.”

²¹Moïse airi *akangba ti Israel kue si lo tene na ala: “Ala gue, amu kete taba wala kete ngasa ndali ti asewa ti ala, ala fâ ni ti sara na *matanga ti Pake.

²²Fade ala yeke mu maboko ti *izope, ala yoro na ya ti mene so ayeke na ya ti kota sembe, ala kpaka na tere ti akadere ti yanga ti da ni nga na tere ti kadere ti nduzu. Na pekoni, alingbi zo oko na popo ti ala alondo na ya ti da ti lo asigigi pepe ngbii ndo ahan si.

²³Fade KOTA GBIA ayeke hon na ya ti Ezipte kue ti sara ye ti ngangu na kodro ni. Me tongana lo yeke baa mene so ayeke na tere ti akadere ti yanga ti da nga na tere ti kadere ti nduzu, fade lo yeke hon hongo, lo yeke zia lege pepe na kpale ti bubango ndo ti li na ya ti da ti ala ti fâ ala.

²⁴Ala na *ahale ti ala, fade ala yeke sara ye alingbi na ambela so kue; ambela ni ayeke ngba ndali ti ala kpu na kpu.

²⁵Tongana ala si ande na ya ti kodro so KOTA GBIA amu zendo ti mu na ala, fade ala yeke sara ye ni tongaso.

²⁶Tongana amolenge ti ala ahunda ala, atene: ‘Nda ti matanga so ala yeke sara so ayeke nyen?’

²⁷Fade ala kiri tënë na ala, atene: ‘So ayeke *sandaga ti Pake ndali ti KOTA GBIA laa. Na ndembe so azo ti Israel ayeke lani na Ezipte, KOTA GBIA asara ye ti ngangu na kodro ni, me lo hon hongo na ndö ti ada ti e, lo luti pepe; lo bata asewa ti e.’ ” Tongaso azo ti Israel akuku akpo li ti ala na sese ti voro KOTA GBIA.

²⁸Na pekoni, ala kiri si ala to nda ti sara ye ni; ala sara ni alingbi gi na yanga so KOTA GBIA amu lani na Moïse na Aaron.

²⁹Na be ti bi, KOTA GBIA afâ akozo molenge-koli kue na ya ti kodro ti Ezipte: ti londo na kozo molenge ti gbia Faraon ti koli, lo so lo lingbi fade ti duti gbia na peko ti babâ ti lo, ngbii asi na kozo molenge ti azo so a gbu ala na kodro wande si abi ala na da ti kanga. Lo fâ nga akozo molenge-koli ti anyama.

³⁰Na bi ni so, gbia Faraon alondo, lo na azo ti gbe ti lo kue nga na azo ti Ezipte kue; kota dekongo amu ya ti kodro ni kue, ngbanga ti so mbeni da oko ayeke daa pepe so kuâ akui daa pepe.

³¹Na bi ni, Faraon airi Moïse na Aaron si lo tene na ala: “Ala londo, ala na azo ti Israel ti ala ni, ala sigigi na popo ti azo ti kodro ti mbi! Ala gue, avoro KOTA GBIA tongana ti so ala tene so.

³²Ala mu nga abagara ti ala, ataba na angasa ti ala, tongana ti so ala tene so, ala hon! Na pekoni, ala hunda na Nzapa ti ala ti sara tufa na ndö ti mbi.”

³³Azo ti Ezipte abaa atene, ala yeke kui kue. Nilaa ala hunda na azo ti Israel ti londo na kodro ti ala hio ti hon.

³⁴Ndani laa azo ti Israel amu farini so ala gbu ya ni ti sara na mapa si ade ti suku pepe, ala gue na ni. Ala kanga ta ti gbungo ya ti farini ni na bongo ti ala si ala zia na ndö ti go ti ala.

³⁵Azo ti Israel asara ye ni alingbi na tënë ti Moïse: ala hunda na azo ti Ezipte aye so a sara na wen ti nginza na lôro; ala hunda nga abongo.

³⁶KOTA GBIA asara si azo ti Ezipte abaa azo ti Israel na nzoni le. Nilaa ala mu na azo ti Israel aye so kue ala hunda. Lege so azo ti Israel amu aye na tere ti azo ti Ezipte kue ahon na ni laa.

³⁷Na pekoni, azo ti Israel alondo na Ramses ti gue na Sukot. Wungo ti akoli so angba ngangu ayeke nduru na saki ngbangbo omene; a diko awali, amolenge na ambakoro pepe.

³⁸Ambeni zo gbani gbani so ayeke ti amara nde nde amu peko ti ala si ala na ala ague. Ala gue na ataba, angasa na abagara; anyama ni awu ahon ndoni.

³⁹Farini so ala gbu ya ni si ala mu na Ezipte aga na ni so, ala sara na mapa so mama ni ayeke daa pepe. Biani, na ndembe so a tumba ala na Ezipte, ala wara lege ti ku titene farini ni asuku pepe; ala wara nga lege ti mu kobe ti tengo ni na lege pepe.

⁴⁰Azo ti Israel aduti na sese ti Ezipte ngu ngbangbo osio na baleota.

⁴¹Na peko ti ngu ngbangbo osio na baleota so, taa gi na lango ni so, azo ti KOTA GBIA asigigi na ya ti kodro ti Ezipte na lege ti molongo ti amara ti ala.

⁴²Na ndembe so KOTA GBIA azi azo ti lo na kodro ti Ezipte asigigi na ala, na bi ni kue, lo baa ndo na ndö ti ala. Bi ni so ayeke ti KOTA GBIA. Legeoko nga, na bi ni so, alingbi ahale ti Israel ti angoi kue alango pepe.

⁴³KOTA GBIA atene na Moïse na Aaron: “Baa ndia ti sarango *matanga ti Pake ayeke so: ‘Wande oko alingbi ti te kobe ti matanga ti Pake pepe.

⁴⁴Ngbaa so mo vo lo na nginza, fade mo fâ lo na *ganza kozo si lo lingbi ti te kobe ti matanga ti Pake ni.

⁴⁵Mbeni wande so aga ndali ti mbeni kete ngoi wala mbeni zo so ayeke sara kua si a yeke futa lo alingbi ti te ni pepe.

⁴⁶A yeke te kasa ti nyama ni gi na ya ti da so a to ni daa. Fade ala yeke mu mbeni kasa ni asigigi na ni pepe. ‘Ala yeke kungbi abio ti nyama ni pepe.

⁴⁷Fade bongbi ti azo ti Israel kue ayeke sara matanga ti Pake so.

⁴⁸Tongana mbeni wande so aduti na ndo ti ala aye ti sara matanga ti Pake ti KOTA GBIA, alingbi ala fâ akoli na amolenge-koli ti sewa ti lo na ganza. Na pekoni, lo lingbi ti duti na ya ti matanga ni; lo yeke tongana zo ti Israel so a du lo na ya ti kodro ni. ‘Zo so afâ ganza pepe, lo lingbi ti te kobe ni pepe.’ ”

⁴⁹“Ndia oko so ayeke ndali ti zo ti Israel so a du lo na ya ti kodro ni nga ndali ti wande so aduti na popo ti ala.”

⁵⁰Azo ti Israel kue asara ye ni alingbi gi na yanga so KOTA GBIA amu lani na Moïse na Aaron.

⁵¹Taa gi na lango ni so, KOTA GBIA azi azo ti Israel na kodro ti Ezipte asigigi na ala na lege ti molongo ti amara ti ala.