Read La Bible en Sango courant – Mbeti ti Nzapa Sigingo 15 Bible Online

Sigingo 15 - La Bible en Sango courant – Mbeti ti Nzapa bible

Sigingo 15

¹Tongaso Moïse na azo ti Israel ahe bia so na *KOTA GBIA, ala tene: Mbi ye ti he bia na KOTA GBIA: lo fa kota ngangu ti lo, lo bi ambarata na azo ti kpengo na mbarata ni na ya ti kota ngu-ingo!

²KOTA GBIA ayeke ngangu ti mbi, mbi yeke he bia na lo. Lo laa lo soo mbi! Lo yeke Nzapa ti mbi, mbi yeke sepela lo! Lo yeke Nzapa ti babâ ti mbi, mbi ye ti he bia ti fa kota ti lo.

³KOTA GBIA ayeke ngangu zo ti bira. Iri ti lo ayeke KOTA GBIA!

⁴Lo bi apusu ti mbarata ti Faraon na aturugu ti lo na ya ti kota ngu-ingo. Kota ngu-ingo ti Asosongo amene akpengba turugu ti lo.

⁵Ala li na gbe ti ngu tongana têne si ngu so ali mingi akanga ndö ti ala kue.

⁶KOTA GBIA, maboko ti mo ti koli afa kota ngangu ti mo! KOTA GBIA, maboko ti mo ti koli anika awato!

⁷Mo yeke kota ahon ndoni! Mo yeke kinda azo so alondo ti ke mo. Tongana ngonzo ti mo alondo tongana wâ, ngonzo ni ayeke gbi ala tongana holengo pere.

⁸Ngangu pupu ti hon ti mo asara si ngu abongbi na ndö ti tere, *amapo aluti na nduzu tongana gbagba, ngu so ali aga tongana kuru sese na gbe ti kota ngu-ingo.

⁹Awato ti e atene lani, atene: “E tumba peko ti ala, fade e yeke wara ala. E yeke kangbi ya ti aye ti ala so e gbu na peko ti bira, e yeke mu ni alingbi na e. E yeke gboto yongoro zeme ti e, e yeke mu aye ti ala kue na maboko ti ala!”

¹⁰Me mo KOTA GBIA, mo huru pupu si kota ngu-ingo akanga ndö ti ala. Ala li na gbe ti kota ngu tongana nengo wen.

¹¹KOTA GBIA, na popo ti anzapa, lo so wa laa ayeke tongana mo? Zo wa laa alingbi na gonda, lo yeke nde si lo yeke nzoni kue tongana mo? Zo wa laa alingbi ti sara akota ye tongana mo? Zo wa laa alingbi ti sara aye ti kpene tongana mo?

¹²Mo yoro maboko ti mo ti koli si sese amene awato ti e!

¹³Na lege ti nzoni be ti mo, mo fa lege na azo ti mo so mo zi ala awe. Na lege ti ngangu ti mo, mo gue na ala na ndo ti duti ti mo so ayeke nde si ayeke nzoni kue.

¹⁴Amara so angoro ala ama tënë ni, tere ti ala ado na mbeto. Kota mbeto agbu azo ti Filistii.

¹⁵Be ti amakonzi ti Edom afun kue. Tere ti akota zo ti Moab ado na mbeto, be ti azo ti Kanaan kue awoko awe.

¹⁶Mbeto na kota mbeto agbu ala. KOTA GBIA, so ala baa ngangu ti maboko ti mo, mbeto ahon ndö ti ala si tënë ahunzi na yanga ti ala, ngbii azo ti mo ahon na mbage ti ngu ni; azo ti mo so mo vo ala so.

¹⁷KOTA GBIA, fadeso mo sara si ala li kâ, mo zia ala na ndö ti hoto so ayeke ti mo; ndo so mo leke ti duti daa laa, ndo ni ayeke nde si ayeke nzoni kue, maboko ti mo wani laa aleke ni.

¹⁸KOTA GBIA, mo yeke le-gbia kpu na kpu!

¹⁹So ambarata ti Faraon, apusu ti mbarata ti lo nga na azo ti kpengo na ambarata ti lo ali na ya ti kota ngu-ingo, KOTA GBIA asara si ngu ni amene ala. Me azo ti Israel ahon na popo ti kota ngu-ingo ni, na ndö ti kuru sese.

²⁰Tongaso Miriam, wayanga-Nzapa, ita ti Aaron ti wali amu kete ngo. Awali ti Israel kue amu peko ti lo, ala yeke pika kete ngo si ala yeke dodo.

²¹Miriam amu li ti bia ni na ala, atene: “Ala he bia na KOTA GBIA, lo fa kota ngangu ti lo, lo bi ambarata na azo ti kpengo na mbarata ni na ya ti kota ngu-ingo!”

²²Moïse amu yanga na azo ti Israel si ala londo na tere ti kota ngu-ingo ti Asosongo ti hon. Ala mu lege so ague na benyama ti Shur. Ala tambula lango ota na benyama, ala wara ngu pepe.

²³Ala si na Mara, me ala lingbi ti nyon ngu ti Mara ni pepe, ngbanga ti so ngu ni asee sengo. Ndani laa azo adi iri ti ngu ni so Mara.

²⁴Azo ni akasa Moïse, atene: “Fade e yeke nyon nyen?”

²⁵Moïse adema tere ti lo na KOTA GBIA si KOTA GBIA afa na lo mbeni nduru keke. Moïse amu keke ni, lo bi na ya ti ngu ni si ngu ni aga nzoni. Na ndo so laa KOTA GBIA amu na azo ti Israel andia nga na lege ti sarango ye so lo fa. Na ndo so nga laa KOTA GBIA atara be ti ala.

²⁶Lo tene na ala, lo tene: “Tongana ala ma tënë ti mbi KOTA GBIA, Nzapa ti ala nzoni, tongana ala sara ye so ayeke mbirimbiri na le ti mbi, tongana ala dingi mê ti ala ti ma atënë ti yanga ti mbi, tongana ala sara ye alingbi na ambela ti mbi kue, fade mbi yeke zia mbeni kobela oko na tere ti ala pepe; kobela so lani mbi zia na tere ti azo ti Ezipte so. Biani, mbi KOTA GBIA laa mbi yeke kai kobela ti ala.”

²⁷Na pekoni, azo ti Israel asi na Elim. Kâ, ali ti ngu baleoko na use na akeke ti mburu balembarambara ayeke daa. Ala sara bâbâ ti ala kâ na tere ti ngu.