Read La Bible en Sango courant – Mbeti ti Nzapa Sigingo 21 Bible Online

Sigingo 21 - La Bible en Sango courant – Mbeti ti Nzapa bible

Sigingo 21

¹KOTA GBIA akiri atene: “Baa, andia so mo yeke fa na azo ti Israel ayeke so:

²Tongana ala vo mbeni ngbaa so ayeke hebro, fade lo sara kua na ya ti ngu omene. Na ngu mbarambara ni, lo lingbi ti sigigi senge, lo yeke futa mbeni ye oko pepe.

³Tongana lo ga lani na da ti ala gi lo oko, fade lo yeke sigigi gi lo oko. Tongana lo yeke lani na wali, fade lo na wali ti lo ayeke sigigi.

⁴Tongana wa ti ngbaa ni laa amu na lo wali si wali ni adu na lo amolenge-koli wala amolenge-wali, fade wali ni na amolenge ni angba ti wa ti lo si ngbaa ni asigigi gi lo oko.

⁵Me tongana ngbaa ni atene: ‘Mbi ye wa ti mbi, mbi ye wali ti mbi na amolenge ti mbi, mbi ye ti sigigi na gbe ti ngbaa ni pepe’,

⁶fade wa ti lo ni ayeke gue na lo na dawa ti Nzapa; lo yeke zia lo nduru na yanga ti da wala na tere ti kadere ti nduzu ti yanga ti da si lo yeke koro mê ti ngbaa ni na mbeni kota sua. Tongaso ngbaa ni ayeke sara kua na lo kpu na kpu.

⁷“Tongana zo aka molenge ti lo ti wali na ngbaa, fade molenge-wali ni ayeke sigigi tongana ti angbaa-koli pepe.

⁸Tongana wa ti lo avo lo fade titene lo ga wali ti lo si be ti wa ti lo ni akiri anzere na lo pepe, lo lingbi ti zia lege na babâ ti ngbaa-wali ni ti kiri ti vo lo. Me lo lingbi ti ka lo na mbeni wande pepe, so ayeke tongana handango wali ni laa.

⁹Tongana wa ti lo ni avo lo ti mu na molenge ti lo ti koli, fade lo yeke sara na ngbaa-wali ni alingbi na ndia so a yeke sara ka ndali ti mungo amolenge-wali.

¹⁰Tongana wa ti lo ni amu mbeni wali nde ti ga wali ti lo, fade lo ngba ti mu na kozo wali ni kobe na bongo, lo ngba ti lango na tere ti lo.

¹¹Tongana wa ti lo ni asara na lo aye ota so pepe, ngbaa-wali ni alingbi ti sigigi senge senge; lo yeke futa mbeni nginza oko pepe.”

¹²“Zo so apika mbeni zo si zo ni akui, fade a yeke fâ lo.

¹³Me tongana zo ni aleke na be ti lo kozoni pepe ti fâ mba ti lo ni si mbi KOTA GBIA laa, mbi yeda tongaso, fade mbi yeke fa na zo ti fango zo ni mbeni ndo titene lo kpe daa ti bata tere ti lo.

¹⁴Me tongana zo asara ngonzo na tere ti mba ti lo si lo fâ mba ti lo ni na lege ti mayere, ataa lo kpe, lo luti na tere ti gbalaka ti mbi, fade ala gbu lo, ala fâ lo.

¹⁵“Zo so apika babâ ti lo wala mama ti lo, alingbi ala fâ lo.

¹⁶“Zo so anzi mbeni zo ti ka lo, wala lo ka lo awe wala a wara zo ni na ndo ti lo, alingbi ala fâ lo.

¹⁷“Zo so adeba babâ ti lo wala mama ti lo, alingbi ala fâ lo.”

¹⁸“Tongana azo atiri si mbeni abo mba ti lo na têne wala lo pika mba ti lo ni na gobo si lo kui pepe, me lo lango na gbogbo,

¹⁹na pekoni tongana lo londo, lo sigigi ti tambula na keke, zo so apika mba ti lo so, fade a yeke sara sioni na lo pepe. Me fade lo yeke futa mbeni ye na mba ti lo ni alingbi na lango so mba ti lo ni asara na kua pepe so; fade lo yeke vo yoro na tere ti mba ti lo ni ngbii kobela ti lo akai.

²⁰“Tongana zo apika ngbaa ti lo ti koli wala ti wali na kota keke si ngbaa ni akui gi na gbe ti maboko ti lo, alingbi a kiri na zo ni peko ti sioni so lo sara.

²¹Me tongana ngbaa ni angba na fini lango oko wala lango use si lo kui, fade a yeke kiri na zo ni peko ti sioni so lo sara pepe, ngbanga ti so ngbaa ni ayeke ye ti nginza ti lo.

²²“Tongana akoli atiri si ala pusu mbeni mama ti ngo abi lo na sese, tongana ngo ni atuku si mbeni sioni ye asi na peko ni pepe, fade koli ti wali ni ayeke diko wungo ti nginza so akoli ni alingbi ti futa. Fade ala yeke futa nginza ni na dawa ti awafango-ngbanga.

²³Me tongana mbeni sioni ye asi na wali ni, fade a yeke sara sioni na zo ni: tongana lo fâ zo, fade a yeke fâ nga lo.

²⁴Tongana lo koro le ti zo, fade a yeke koro nga le ti lo; tongana lo fâ pembe ti zo, fade a yeke fâ nga pembe ti lo; tongana lo kungbi maboko ti zo, fade a yeke kungbi nga maboko ti lo; tongana lo kungbi gere ti zo, fade a yeke kungbi nga gere ti lo.

²⁵Tongana lo zö zo na wâ, fade a yeke zö nga lo na wâ; tongana lo zia ka na tere ti zo, fade a yeke zia nga ka na tere ti lo; tongana lo pika zo na ka, fade a yeke pika nga lo na ka.

²⁶“Tongana zo apika ngbaa ti lo ti koli wala ti wali si lo koro le ti lo, fade lo yeke zia lege na ngbaa ni ti sigigi senge senge ndali ti le ti lo ni.

²⁷Tongana lo fâ pembe ti ngbaa ti lo ti koli wala ti wali, fade lo yeke zia lege na ngbaa ni ti sigigi senge senge ndali ti pembe ti lo ni.

²⁸“Tongana bagara akpo mbeni koli wala mbeni wali na didi ti lo si zo ni akui, fade a yeke bo bagara ni na têne ti fâ lo. Fade zo ayeke te kasa ti bagara ni pepe. Me ti wa ti bagara ni, fade tënë ayeke na li ti lo pepe.

²⁹Me tongana bagara ni ayeke kpo ka azo lakue na didi ti lo si a tene tënë ni na wa ti lo, tongana wa ti lo ni abaa ndo na tere ti lo pepe si bagara ni afâ mbeni koli wala mbeni wali, fade a yeke bo bagara ni na têne ti fâ lo; fade a yeke fâ nga wa ti bagara ni.

³⁰Tongana a hunda na wa ti bagara ni ti futa mbeni ye ti soo na fini ti lo, alingbi lo futa ye so kue a hunda na lo.

³¹Tongana bagara ni afâ mbeni molenge-koli wala mbeni molenge-wali, fade ala sara na lo alingbi gi na oko ndia so.

³²Tongana bagara ni afâ mbeni ngbaa ti koli wala ti wali, fade wa ti bagara ni ayeke futa na wa ti ngbaa ni ale ti nginza baleota. Na pekoni, a yeke bo bagara ni na têne ti fâ lo.

³³“Tongana zo azia yanga ti du ti ngu senge, wala lo zi mbeni du si lo kanga yanga ni pepe si mbeni bagara wala mbeni lele ati daa,

³⁴alingbi zo ti zingo du ni afuta na wa ti nyama ni nginza so alingbi. Me fade kuâ ti nyama ni ayeke ga ti zo so afuta nginza ni.

³⁵“Tongana bagara ti mbeni zo akpo bagara ti mbeni zo nde si bagara ni akui, fade ala use kue ayeke ka bagara so angba na fini si ala yeke kangbi nginza ni na popo ti ala. Ti bagara so akui so, ala yeke kangbi nga lo na popo ti ala.

³⁶Me tongana azo ahinga atene, bagara ni ayeke kpo ka abagara lakue na didi ti lo si wa ti lo abaa ndo na tere ti lo pepe, alingbi wa ti lo amu mbeni bagara nde na zo so bagara ti lo akui so si kuâ ti nyama ni ayeke ga ti lo.”

³⁷“Tongana zo anzi mbeni bagara, mbeni taba wala mbeni ngasa, tongana lo fâ lo wala lo ka lo, alingbi lo mu abagara oku na peko ti bagara so lo nzi so, lo mu nga ataba osio wala angasa osio na peko ti so lo nzi so.”