Read La Bible en Sango courant – Mbeti ti Nzapa Sigingo 25 Bible Online

Sigingo 25 - La Bible en Sango courant – Mbeti ti Nzapa bible

Sigingo 25

¹KOTA GBIA atene na Moïse:

²“Mo tene na azo ti Israel, mo tene: Ala bongbi ambeni ye ti ala aga na ni na mbi. Fade ala yamba aye ni na maboko ti azo so kue aga na ni na nzoni be.

³Baa, aye so ala yeke yamba na maboko ti azo ni ayeke aye tongana: lôro, wen ti nginza, bengba wen,

⁴bongo so nzoroko ni akpa le ti nduzu na bongo so abe bengo, bengba bongo so ayeke za zango, bongo so a sara na *len nga na bongo so a sara na kua ti tere ti ngasa,

⁵aporo ti akoli-taba so a zia bengba nzoroko na tere ni, apendere poro ti nyama, keke ti akasia,

⁶mafuta ti ziango na ya ti alamba, fuku ti yombo ndali ti sarango na mafuta ti tukungo na li ti zo ti zia lo nde nga ndali ti fuku ti yombo ti zongo na wâ,

⁷atêne ti kornaline na ambeni pendere têne nde nde ti ngangu ngere so a yeke zia na tere ti *efod nga na tere ti bozo so ayeke na ndö ti kate ti kota wayango-sandaga.

⁸Fade azo ti Israel ayeke sara mbeni da so ayeke nde si ayeke nzoni kue ndali ti mbi titene mbi duti na popo ti ala.

⁹Fade ala yeke sara da ni na akungba ti ya ni kue alingbi gi na kode nga na tapande so mbi yeke fa na mo.”

¹⁰“Fade ala yeke sara mbeni sanduku na keke ti akasia. Yongoro ni ayeke santimetere ngbangbo oko baleuse na oku, nduru ni santimetere balembarambara na oku, yongo ni na nduzu santimetere balembarambara na oku.

¹¹Fade ala yeke zia lôro ti nzoni ni na tere ti sanduku ni, na ya ni nga na mbage ti gigi ni kue. Ala yeke mu lôro, ala leke na mbeni pendere ye, ala zia na tere ti yanga ti sanduku ni, angoro ni kue.

¹²Ala yeke kporo lôro na wâ, ala leke na *akati osio, ala zia na andangoro ni: use na mbage, use na mbage.

¹³Fade ala yeke leke ayongoro keke ti akasia use, ala zia lôro na tere ni kue.

¹⁴Ala yeke yoro akeke ni na ya ti akati ni so ayeke na tere ti sanduku ni mbage na mbage titene a yo na ni.

¹⁵Akeke ni ayeke ngba na ya ti akati ni; a yeke zi ni pepe.

¹⁶Fade mo yeke zia na ya ti sanduku ni atêne so a su atënë ti mbuki na le ni si mbi yeke mu na mo so.

¹⁷“Ala yeke sara mbeni *ye ti kangango na yanga ti sanduku ni na lôro ti *nzoni ni. Yongoro ni ayeke santimetere ngbangbo oko baleuse na oku, nduru ni santimetere balembarambara na oku.

¹⁸Ala yeke sara *asheruben use na lôro so a pika tere ni pikango, ala yeke zia ala na ndö ti ye ti kangango na yanga ti sanduku ni, oko na yanga ni, oko na mbeni yanga ni.

¹⁹Asheruben use so na ye ti kangango na yanga ti sanduku ni ayeke gi ye oko, sheruben oko na yanga ni, oko na mbeni yanga ni.

²⁰Asheruben ni ayeke zi ya ti *akpangi ti ala kota na ndö ti ye ti kangango na yanga ti sanduku ni ti bata ni. Asheruben ni ayeke luti, ala yeke baa le ti tere si ala yeke baa ndo na mbage ti ye ti kangango na yanga ti sanduku ni.

²¹Na ya ti sanduku ni, mo yeke zia atêne so a su atënë ti mbuki na le ni si mbi yeke mu na mo so. Na pekoni, mo yeke zia ye ti kangango na yanga ti sanduku ni na ndö ni.

²²Na ndo so laa mbi yeke wara tere na mo, na ndö ti ye ti kangango na yanga ti sanduku ni, na popo ti asheruben use so. Na ndo so laa mbi yeke mu yanga na mo ndali ti azo ti Israel.”

²³“Fade ala yeke sara mbeni meza na keke ti akasia. Yongoro ni ayeke metere oko, nduru ni santimetere baleoku, yongo ni na nduzu santimetere balembarambara na oku.

²⁴Fade ala yeke zia lôro ti nzoni ni na tere ni; ala yeke mu lôro, ala leke na mbeni pendere ye, ala zia na tere ti yanga ni, angoro ni kue.

²⁵Na tere ti ayanga ni osio kue, ala yeke zia kadere so nduru ni ayeke santimetere miombe; na tere ti kadere ni, ala yeke mu lôro, ala leke na mbeni pendere ye, ala zia na tere ni, angoro ni kue.

²⁶Fade ala yeke sara *akati osio na lôro; ala yeke zia akati ni na ndangoro osio ti meza ni, nduru na ndo so gere ni osio ayeke daa.

²⁷Ala yeke zia akati ni nduru na tere ti kadere ni titene a yeke yoro ayongoro keke ni daa ti yo na meza ni.

²⁸Fade ala yeke leke ayongoro keke use ti akasia, ala yeke zia lôro na tere ni kue. Akeke ni laa ayeke mu ande lege na azo ti yo na meza ni.

²⁹Fade ala yeke sara akpangbara sembe, akopo, akota sembe na adu ti sembe titene a tuku *sandaga ti samba daa. Ala yeke sara aye ni kue na lôro ti nzoni ni.

³⁰Fade ala yeke mu mapa so a leke si a yeke zia na dawa ti mbi, ala zia na ndö ti meza ni si angba na dawa ti mbi lakue lakue.”

³¹“Fade ala yeke sara mbeni gere ti alamba na lôro ti nzoni ni so a pika tere ni pikango. Gere ti alamba ni, amaboko ni, akopo ni, akutu ni nga na akongo ni ayeke bongbi kue ti ga gi ye oko.

³²Fade amaboko ni ayeke sigigi omene na tere ti yongoro gere ti alamba ni: ota na mbage, ota na mbage.

³³Na ndö ti maboko oko oko ti gere ti alamba ni, fade akopo ota so a sara ni si akpa ndika, na akutu ni nga na aye so akpa kongo ayeke duti na tere ni.

³⁴Ti gere ti alamba ni wani, akopo osio so a sara ni si akpa ndika, na akutu ni nga na aye so akpa kongo ayeke duti na tere ni.

³⁵Na gbe ti akozo maboko use ti gere ti alamba ni so asigigi, oko na mbage, oko na mbage, fade kutu oko ayeke duti daa. Fade kutu oko oko ayeke duti nga na gbe ti tanga ti amaboko use use so asigigi so. Fade ye ni ayeke duti gi tongaso ndali ti tanga ti amaboko omene so kue.

³⁶Akutu ni, na amaboko ni na gere ti alamba ni ayeke bongbi kue ti ga gi ye oko; a yeke sara ni kue na lôro ti nzoni ni so a pika tere ni pikango.

³⁷Fade ala yeke sara lamba mbarambara; ala yeke zia ni na ndö ti gere ti alamba ni titene alamba ni aza wâ na tere ti gere ti alamba ni.

³⁸Aye ti zingo na zende na tere ti ameshe ti lamba ni nga na akete sembe so a yeke tuku amburu ti wâ daa, fade ala yeke sara ni na lôro ti nzoni ni.

³⁹Fade ala yeke mu lôro ti nzoni ni so nengo ni ayeke kilo baleota, ala sara na gere ti alamba ni nga na agbakuru ni.

⁴⁰Moïse, mo baa ye ni nzoni, fade mo yeke sara kue ti sara ye ni alingbi gi na kode so mbi fa na mo na li ti hoto so.”