Read La Bible en Sango courant – Mbeti ti Nzapa Sigingo 26 Bible Online

Sigingo 26 - La Bible en Sango courant – Mbeti ti Nzapa bible

Sigingo 26

¹Ti da so Nzapa ayeke duti daa, fade azo ti sarango ye na kode ayeke sara ni na amapia-bongo baleoko so ayeke na kamba ti *len so akpengba kpengbango, so a bongbi ni na kua ti tere ti taba so nzoroko ni akpa le ti nduzu, na mbeni so abe bengo si mbeni abe si ayeke za zango. Fade ala yeke kpo alimo ti *asheruben na tere ni.

²Fade amapia-bongo ni kue alingbi tere: yongoro ni metere baleoko na osio si konongo ti le ni metere use.

³Fade ala yeke mu amapia-bongo oku, ala tengbi ni titene aga kota mapia-bongo oko; ala yeke mu nga tanga ti amapia-bongo oku ni, ala tengbi ni titene aga kota mapia-bongo oko.

⁴Ala yeke mu yanga ti bongo so nzoroko ni akpa le ti nduzu, ala sara na kamba si ala fu ni na tere ti yanga ti kozo kota mapia-bongo ni. Ala yeke fu nga gi mara ti yanga ti bongo so na tere ti yanga ti use kota mapia-bongo ni.

⁵Ala yeke zia kamba baleoku so na yanga ti kozo kota mapia-bongo ni, kamba baleoku na yanga ti use kota mapia-bongo ni. Kamba oko oko ti kozo kota mapia-bongo ni na akamba ti use kota mapia-bongo ni ayeke baa le ti tere.

⁶Ala yeke sara *akongi baleoku so ayeke na lôro. Na pekoni, ala yeke gbu yanga ti akota mapia-bongo use so na akongi ni, ala yeke tengbi ni titene da ni aga gi oko.

⁷“Fade ala yeke sara akota mapia-bongo baleoko na oko na kua ti tere ti ngasa titene aga use ye ti bingo na li ti da ni.

⁸Fade amapia-bongo ni baleoko na oko kue ayeke lingbi tere: yongoro ni metere baleoko na oku, konongo ti le ni metere use.

⁹Ala yeke tengbi yanga ti akota mapia-bongo oku daa. Na pekoni, ala yeke tengbi nga yanga ti tanga ti akota mapia-bongo omene so daa. Ti omene mapia-bongo ni, ala yeke fu ni titene yanga ni ati na dawa ti da ni.

¹⁰Fade ala yeke fu kamba baleoku na yanga ti kozo kota mapia-bongo ni; ala yeke fu nga kamba baleoku na yanga ti use kota mapia-bongo ni.

¹¹Ala yeke sara kongi baleoku na bengba wen. Na pekoni, ala yeke yoro akamba ni na ya ni ti gbu na akota mapia-bongo ni si da ni aga gi oko.

¹²Na mbage ti nduru ti akota mapia-bongo so ala tengbi so, fade yanga ni ayeke ti na sese. Ti mbeni mapia-bongo so yanga ni ayo ahon da ni, ndambo ti bongo ni ayeke ti na mbage ti peko ti da ni.

¹³Na mbage ti yongoro ti akota mapia-bongo so ala tengbi so, yanga ti mapia-bongo so ayo ahon da ni ayeke ti mbage na mbage. Tongaso si ndö ti da ni akanga kue.

¹⁴Ti bata use li ti da ni, fade ala yeke mu poro ti koli-taba so a kpaka bengba nzoroko na tere ni, ala sara na ye ti kangango na li ti da ni; ala yeke sara nga na mbeni ye ti kangango na li ti da ni na apendere poro ti nyama, ala zia na ndö ni.

¹⁵“Fade ala yeke mu keke ti akasia, ala sara na *amabaya; ala yeke zia ni aluti na nduzu ti gbu da so Nzapa ayeke duti daa.

¹⁶Yongoro ti mabaya oko oko ayeke duti metere oku si nduru ni santimetere balembarambara na oku.

¹⁷Ala yeke sara amabaya ni kue alingbi tere: na mbage ti gbeni, ala yeke zia anduru keke use so abaa le ti tere.

¹⁸Ala yeke sara amabaya baleuse ti zia na mbage ti Mbongo ti da ni.

¹⁹Na pekoni, ala yeke mu wen ti nginza, ala sara na gere ni baleosio titene amabaya ni aluti na ndö ni. Gere ni use use ayeke ndali ti mabaya oko oko alingbi na anduru keke use.

²⁰Ala yeke sara nga mabaya baleuse ti zia na mbeni mbage ti da ni, na mbage ti Banga.

²¹Ala yeke mu wen ti nginza, ala sara nga na gere ni baleosio titene amabaya ni aluti na ndö ni. Gere ni use use ayeke ndali ti mabaya oko oko.

²²Ti peko ti da ni, na mbage ti Do, ala yeke sara mabaya omene;

²³ala yeke sara nga mabaya use ti zia na andangoro ti da ni na ngbonda ni kâ.

²⁴Na mbage ti gbeni, ya ti amabaya use so ayeke zi zingo; me na mbage ti nduzu, amabaya ni ayeke gbu tere na ya ti mbeni *kati. Amabaya ni use kue ayeke lingbi tere si ayeke duti na andangoro ti da ni.

²⁵Fade amabaya ti peko ti da ni kue ayeke duti miombe si agere ni baleoko na omene; a sara ni na wen ti nginza, so ti tene mabaya oko, gere ni use; mabaya oko, gere ni use.

²⁶“Ala yeke mu keke ti akasia, ala sara na alate ti kanga na amabaya ni: late oku ndali ti amabaya ti mbage ti da ni,

²⁷late oku ndali ti amabaya ti mbeni mbage ti da ni, late oku ndali ti peko ti da ni, na mbage ti Do.

²⁸Late so ahon na be ti amabaya ni, fade ayeke hon na ndo so ndambo ti amabaya ni ayeke daa, tongana a haka ni; late ni ayeke londo na kozo mabaya ni asi na ndangba mabaya ti da ni.

²⁹Ala yeke zia lôro na tere ti amabaya ni nga na tere ti alate ni. Ala yeke mu lôro asara na akati so alate ni ayeke hon na ya ni.

³⁰Moïse, fade mo yeke yo na nduzu da so Nzapa ayeke duti daa, alingbi gi na kode so mbi fa na mo ge na li ti hoto so.

³¹“Fade azo ti sarango ye na kode ayeke mu kamba ti len so akpengba kpengbango, ala bongbi ni na bongo so nzoroko ni akpa le ti nduzu, bongo so abe bengo, bengba bongo so ayeke za zango, ala sara na ridoo. Fade ala yeke kpo limo ti *asheruben na tere ti ridoo ni.

³²Ala yeke kanga ridoo ni na nduzu na akongi so a sara na lôro; akongi ni ayeke duti na tere ti angbongboro keke osio ti akasia so a zia lôro na tere ni. Ala yeke zia angbongboro keke ni aluti na ndö ti gere ni osio so a sara na wen ti nginza.

³³Ala yeke kanga ridoo ni na nduzu na gbe ti akongi ni. “Na peko ti ridoo ni kâ, ala yeke zia sanduku so a zia na ya ni atêne so a su atënë ti mbuki na le ni. Ridoo ni ayeke kangbi popo ti ndo so ayeke nde si ayeke nzoni kue na ndo so ayeke nde si ayeke nzoni kue ahon atanga ni.

³⁴Na ndo so ayeke nde si ayeke nzoni kue ahon atanga ni so, fade ala yeke zia ye ti kangango na yanga ti sanduku ti mbuki ni daa.

³⁵Na dawa ti ridoo ni, na mbage ti Banga, na ndo so ayeke nde si ayeke nzoni kue so, ala yeke zia meza ni daa. Ti gere ti alamba ni, ala yeke zia ni abaa ndo le na le na meza ni, na mbage ti Mbongo ti da ni.

³⁶“Ti ridoo ti yanga ti da ni, fade azo ti kpongo bongo na apendere nzoroko ayeke sara mbeni ridoo nde na kamba ti len so akpengba kpengbango, ala bongbi ni na bongo so nzoroko ni akpa le ti nduzu, bongo so abe bengo na bengba bongo so ayeke za zango.

³⁷Fade ala yeke leke angbongboro keke oku na keke ti akasia ti gbu ridoo ni na nduzu. Ala yeke zia lôro na tere ti akeke ni. Ala yeke kanga ridoo ni na tere ti akeke ni na akongi so a zia lôro na tere ni. Ala yeke kporo bengba wen ti sara na agere oku ndali ti angbongboro keke ni.”