Read La Bible en Sango courant – Mbeti ti Nzapa Sigingo 29 Bible Online

Sigingo 29 - La Bible en Sango courant – Mbeti ti Nzapa bible

Sigingo 29

¹“Lege so mo yeke zia Aaron na amolenge ti lo nde titene ala sara kua ti awayango-sandaga na mbi ayeke so: “Fade mo yeke mu koli-bagara oko na akoli-taba use so mbage ti tere ti ala abuba pepe;

²mo yeke mu farini ti *ble, mo sara na mapa so a sara na mama ni pepe, na agatoo so a sara na mafuta si mama ni ayeke daa pepe nga na makara so a sara na mama ni pepe si a kpaka mafuta na tere ni.

³Fade mo yeke zia aye ni kue na ya ti mbeni sakpa si mo mu sakpa ni, na koli-bagara ni nga na akoli-taba ni use kue, mo ga na ni na dawa ti mbi.

⁴“Fade mo yeke mu Aaron na amolenge ti lo, mo ga na ala na yanga ti da ti bongo so Nzapa na azo ti lo ayeke wara tere daa si mo yeke sukula ala na ngu.

⁵Mo yeke mu abongo ti awayango-sandaga, mo yu na Aaron: yongoro bongo ti gbeni, kaba na gbe ti *efod, efod nga na bozo so ayeke na ndö ti kate. Mo yeke kanga akamba ti efod na ndö ti abongo ni.

⁶Mo yeke zia na li ti lo bongo so a yeke kanga na li tongana kpoto, mo yeke zia palata na ndö ti kpoto ni ti fa atene, a zia lo nde ndali ti Nzapa.

⁷Mo yeke mu mafuta ti tukungo na li ti zo, mo tuku na li ti lo ti zia lo nde ndali ti mbi.

⁸Fade mo yeke mu amolenge ti Aaron, mo ga na ala si mo yeke yu ti ala abongo ni na ala.

⁹Mo yeke kanga kamba na ndö ti bongo ti Aaron na amolenge ti lo. Mo yeke zia kpoto na li ti ala ti fa atene, kua ti wayango-sandaga aga ti ala kpu na kpu. “Lege so mo yeke zia Aaron na amolenge ti lo ti to nda ti kua ti ala laa.

¹⁰“Fade mo yeke ga na koli-bagara ni na yanga ti da ti bongo so Nzapa na azo ti lo ayeke wara tere daa. Aaron na amolenge ti lo ayeke zia maboko ti ala na li ti koli-bagara ni.

¹¹Mo yeke fâ go ti koli-bagara ni na dawa ti mbi KOTA GBIA, na yanga ti da ti bongo so mbi na azo ti mbi e yeke wara tere daa.

¹²Mo yeke mu mene ti koli-bagara ni, na li ti maboko ti mo, mo yeke zia ni na ndö ti adidi ti gbalaka. Na pekoni, mo yeke tuku tanga ti mene ni kue na gere ti gbalaka ni.

¹³Mo yeke mu mafuta so kue ayeke na tere ti akamba ti ya ti nyama ni, na mafuta so ayeke na tere ti be ni nga na aronyon use na mafuta so ayeke na tere ni, mo gbi kue na wâ na ndö ti gbalaka ni.

¹⁴Me kasa ti koli-bagara ni, poro ti lo na puru ti lo, mo yeke gbi ni yongoro na tere ti bâbâ. So ayeke sandaga ndali ti zingo siokpari na li ti awayango-sandaga laa.

¹⁵“Na pekoni, fade mo yeke mu kozo koli-taba ni. Aaron na amolenge ti lo ayeke zia maboko ti ala na li ti taba ni.

¹⁶Mo yeke fâ go ti taba ni, mo mu mene ni, mo fi na tere ti gbalaka ni, angoro ni kue.

¹⁷Mo yeke doroko nyama ni; mo yeke sukula akamba ti ya ti nyama ni na agere ni si mo yeke zia ni na ndö ti akasa ni nga na ndö ti li ti nyama ni.

¹⁸Mo yeke gbi koli-taba ni kue na wâ na ndö ti gbalaka. So ayeke *sandaga so a gbi ni kue na wâ ndali ti mbi KOTA GBIA, sandaga so a gbi ni kue na wâ si fion ni anzere na mbi KOTA GBIA.

¹⁹“Na pekoni, fade mo yeke mu use koli-taba ni. Aaron na amolenge ti lo ayeke zia maboko ti ala na li ti taba ni.

²⁰Mo yeke fâ go ti taba ni, mo mu mene ni, mo zia na tere ti mê ti Aaron ti mbage ti koli; mo zia nga na tere ti mê ti amolenge ti lo, na ndö ti kota li ti maboko ti ala ti mbage ti koli nga na ndö ti kota li ti gere ti ala ti mbage ti koli. Na pekoni, mo yeke fi mene ni na tere ti gbalaka ni, angoro ni kue.

²¹Mo yeke mu mene ni kete so ayeke na ndö ti gbalaka, mo yeke mu nga mafuta ti tukungo na li ti zo, mo fi na tere ti Aaron nga na tere ti abongo ti lo; mo fi nga na tere ti amolenge ti lo nga na tere ti abongo ti ala. Tongaso, Aaron na amolenge ti lo, na abongo ti ala ayeke ga ye so a zia nde ndali ti Nzapa.

²²Sandaga ti koli-taba so laa ayeke fa atene, amolenge ti Aaron ali na kua ti awayango-sandaga awe. Mo yeke mu damba ti nyama ni, mafuta so ayeke na tere ti akamba ti ya ti lo, mafuta so ayeke na tere ti be ni, aronyon use na mafuta so ayeke na tere ni nga na gere ti nyama ni ti mbage ti koli.

²³Na ya ti sakpa ti mapa so a sara na mama ni pepe si a zia na dawa ti mbi KOTA GBIA, mo yeke mu mapa oko, gatoo oko so a sara na mafuta nga na makara oko.

²⁴Mo yeke zia aye so kue na maboko ti Aaron na ti amolenge ti lo. Mo yeke tene na ala ti ya ni na mbi na nduzu ti fa atene, ala mu na mbi.

²⁵Na pekoni, mo yeke kiri ti mu aye ni na maboko ti ala si mo yeke gbi ni na wâ na ndö ti gbalaka; mo yeke bongbi ni na sandaga so a yeke gbi ni kue na wâ. So ayeke sandaga so fion ni anzere na mbi KOTA GBIA, sandaga so a gbi ni kue na wâ ndali ti mbi KOTA GBIA.

²⁶Mo yeke mu kate ti use koli-taba ni, lo so ayeke ti Aaron so, mo ya ni na nduzu ti fa atene, mo mu na mbi. Na pekoni, kasa ni ayeke ga ti mo.

²⁷“Fade mo yeke mu kate ti koli-taba so ala ya na mbi nga na gere ti koli-taba so ala zi ni si ala ya ni na nduzu ti fa atene, ala mu na mbi, mo zia ni nde ndali ti mbi.

²⁸Ndia so ayeke ngba kpu na kpu ndali ti azo ti Israel: na ngoi so kue ala yeke zi akasa ti anyama ni so ti ya na mbi KOTA GBIA na sandaga ti beoko, fade ala yeke mu ni na Aaron na amolenge ti lo.

²⁹“Na peko ti kuâ ti Aaron, abongo ti lo ti wayango-sandaga ayeke ga ti amolenge ti lo. Ala yeke yu ni na lango so a yeke tuku mafuta na li ti ala si ala yeke to nda ti sara kua na mbi.

³⁰Mbeni molenge ti Aaron so ayeke mu ande kua na peko ti babâ ti lo ayeke yu abongo ni na ya ti lango mbarambara, na ndembe so lo yeke li na ya ti da ti bongo so Nzapa na azo ti lo ayeke wara tere daa titene lo sara kua ti mbi na ndo so ayeke nde si ayeke nzoni kue.

³¹“Use koli-taba so a ya na sandaga ti fa atene, Aaron na amolenge ti lo ali na kua ti awayango-sandaga awe, fade ala yeke to kasa ti nyama ni na mbeni ndo so ayeke nde si ayeke nzoni kue.

³²Fade Aaron na amolenge ti lo ayeke te kasa ni na mapa so ayeke na ya ti sakpa; ala yeke te ni na yanga ti da ti bongo so Nzapa na azo ti lo ayeke wara tere daa.

³³Ye so a mu na sandaga titene mbi Nzapa, mbi zi siokpari na li ti ala si ala li na ya ti kua ti ala so, fade gi ala oko laa ayeke te ni; mbeni zo nde alingbi ti te ni pepe, ngbanga ti so a zia kobe ni so nde ndali ti Nzapa.

³⁴Tongana tanga ti kasa ni wala tanga ti mapa ni angba asi ndaperere, fade a yeke gbi ni. Zo ayeke kiri ti te ni pepe, ngbanga ti so ayeke kobe so a zia ni nde ndali ti Nzapa.

³⁵“Fade mo yeke sara na Aaron na amolenge ti lo alingbi gi na yanga so mbi mu na mo. Ala yeke mu lango mbarambara ti sara matanga ti lingo ti ala na kua ni.

³⁶“Na ya ti lango oko oko, fade mo yeke ya mbeni koli-bagara na sandaga ndali ti zingo siokpari na li ti azo. Na lege so laa mo yeke zi siokpari na tere ti gbalaka ni. Na pekoni, mo yeke tuku mafuta na ndö ni ti zia ni nde.

³⁷Fade ala yeke mu lango mbarambara ti sara na matanga so. Na pekoni, ala yeke zia gbalaka ni nde ndali ti mbi. Tongaso gbalaka ni ayeke ga mbeni ye so ayeke nde si ayeke nzoni kue ahon atanga ni. Zo so kue wala ye so kue ayeke ndu gbalaka ni ayeke wara ye ti peko ni.”

³⁸“Baa, aye so fade ala yeke ya na *sandaga na ndö ti gbalaka ni na ya ti lango oko oko ayeke so: akete taba use ti ngu oko; ala yeke ya ni kpu na kpu.

³⁹Ala yeke ya kozo taba ni na ndaperere si ala yeke ya use taba ni na lakui.

⁴⁰Ti kozo taba ni, ala yeke mu kilo ota ti farini, ala tuku litere oko na ndambo ti mafuta ti nzoni ni daa, ala gbu ya ni. Na pekoni, ala ga na litere oko na ndambo ti vin.

⁴¹Ti use taba ni, ala yeke ya lo na lakui. Ala yeke ya gi mara ti sandaga tongana ti so ala sara na ndaperere so, nga na mara ti sandaga ti samba so ala sara so. So ayeke sandaga so fion ni anzere na mbi KOTA GBIA, sandaga so a gbi ni kue na wâ ndali ti mbi.

⁴²So ayeke sandaga so a yeke gbi ni kue na wâ si ala yeke ya ni na dawa ti mbi ngu na ngu, kpu na kpu na yanga ti da ti bongo so mbi KOTA GBIA, mbi na azo ti mbi e yeke tere daa. Na ndo so laa mbi yeke wara ala daa ti tene tënë na mo.

⁴³“Mbi yeke wara azo ti Israel na ndo so; gonda ti mbi ayeke sara si ndo ni ayeke duti nde si aduti nzoni kue.

⁴⁴Da ti bongo so mbi na azo ti mbi e yeke wara tere daa, na gbalaka ni, fade mbi yeke zia ni nde ndali ti mbi. Mbi yeke zia Aaron na amolenge ti lo nde titene ala sara kua ti mbi ti wayango-sandaga.

⁴⁵Fade mbi yeke duti na popo ti azo ti Israel si mbi yeke duti Nzapa ti ala.

⁴⁶Fade ala yeke hinga atene, mbi laa mbi yeke KOTA GBIA, Nzapa ti ala; mbi laa mbi mu ala na kodro ti Ezipte mbi sigigi na ala titene mbi duti na popo ti ala. “Mbi laa mbi yeke KOTA GBIA, Nzapa ti ala.”