Read La Bible en Sango courant – Mbeti ti Nzapa Sigingo 39 Bible Online

Sigingo 39 - La Bible en Sango courant – Mbeti ti Nzapa bible

Sigingo 39

¹Ala mu bongo so nzoroko ni akpa le ti nduzu, bongo so abe bengo na bengba bongo so ayeke za zango, ala fu na abongo ti awayango-sandaga titene ala sara na kua na ya ti da so ayeke nde si ayeke nzoni kue. Ala fu nga abongo so a zia nde ndali ti Aaron alingbi na yanga so *KOTA GBIA amu lani na Moïse.

²Ala fu *efod ni na kamba ti *len so akpengba kpengbango, ala bongbi ni na bongo so nzoroko ni akpa le ti nduzu, bongo so abe bengo, bengba bongo so ayeke za zango. Ala kpo apendere nzoroko na tere ti efod ni na kamba so a sara na lôro.

³Ala mu lôro, ala pika ni si aga lepe-lepe tongana kugbe. Azo ti kpongo bongo na apendere nzoroko afâ ya ni kete kete tongana kamba, ala bongbi ni na bongo so nzoroko ni akpa le ti nduzu, bongo so abe bengo na bengba bongo so ayeke za zango nga na kamba ti len.

⁴Ala fu akamba use na yanga ti efod ni ti kanga na ni na ndö ti go.

⁵Ala sara si akamba ti efod ni na efod ni aga gi ye oko. Ala sara nga ni na kamba ti len so akpengba kpengbango, ala bongbi ni na bongo so nzoroko ni akpa le ti nduzu, bongo so abe bengo, bengba bongo so ayeke za zango. Ala kpo apendere nzoroko na tere ni na kamba so a sara na lôro, alingbi na yanga so KOTA GBIA amu lani na Moïse.

⁶Ala leke atêne use ti kornaline, ala zia ni na ya ti akadere use ti lôro. Ala kpaka iri ti amolenge ti Jacob na ndö ti atêne ni tongana ti so a yeke kpaka iri ti zo na ndö ti *ye ti kpongo na nzoroko.

⁷Ala zia atêne ni na tere ti akamba ti ndö ti go ti efod ni. Atêne ni aga mbeni ye ti dango be ndali ti amara baleoko na use ti Israel, alingbi na yanga so KOTA GBIA amu lani na Moïse.

⁸Na pekoni, azo ti sarango ye na kode asara bozo so ayeke na ndö ti kate. Ala sara ni tongana ti so a sara na *efod so. Ala sara ni na kamba ti *len so akpengba kpengbango, ala bongbi ni na bongo so nzoroko ni akpa le ti nduzu, bongo so abe bengo, bengba bongo so ayeke za zango. Ala kpo apendere nzoroko na tere ni na kamba so a sara na lôro.

⁹Yongoro ti bozo ni ayeke santimetere baleuse na oku, alingbi tere mbage na mbage kue tongana a kungbi ya ni use.

¹⁰Ala zia molongo osio ti atêne ti ngangu ngere na yanga ni. Na kozo molongo ni, ala zia rubis, topaze na emerode.

¹¹Na use molongo ni, ala zia grena, safir na diaman.

¹²Na ota molongo ni, ala zia yasente, agate na ametiste.

¹³Na osio molongo ni, ala zia krizolite, kornaline na zaspe. Ala zia têne oko oko na ya ti kadere so a sara na lôro.

¹⁴Ala kpaka iri ti amolenge ti Jacob baleoko na use na ndö ti têne oko oko tongana ti so a yeke kpaka iri ti zo na ndö ti *ye ti kpongo na nzoroko. Wungo ti atêne ni alingbi na wungo ti amara baleoko na use ti Israel.

¹⁵Ndali ti bozo ni, ala sara akete zingiri use tongana ti so a yeke sara pete; ala sara azingiri ni na lôro ti nzoni ni.

¹⁶Ala mu lôro, ala sara na akadere use nga na *akati use si ala zia ni na andangoro use ti bozo ni na mbage ti nduzu.

¹⁷Akete zingiri so a sara na lôro so, ala kanga ni na tere ti akati use so ayeke na andangoro use ti bozo ni.

¹⁸Ala kanga nga mbeni yanga ti akete zingiri ni na tere ti akadere so a sara na lôro si ayeke na ndö ti go ti efod so. Ala kanga ni titene bozo ni aduti na mbage ti dawa.

¹⁹Ala mu lôro, ala sara na ambeni *kati use; ala zia ni na andangoro use ti bozo ni na mbage ti gbeni, na ndo so abaa le na efod ni.

²⁰Ala mu lôro, ala sara na ambeni kati use; ala zia ni na yanga ti akamba ti ndö ti go ti efod ni, na mbage ti dawa, na ndo so a fu ni daa so. Ala zia akati ni na ndö ti akamba ti efod ni.

²¹Ala tengbi akati ti bozo ni na akati ti efod ni na mbeni kamba so nzoroko ni akpa le ti nduzu. Tongaso si bozo ni alango na ndö ti kamba ti efod ni si bozo ni alingbi ti hon mbage na mbage pepe, alingbi na yanga so KOTA GBIA amu lani na Moïse.

²²Na pekoni, ala mu bongo so nzoroko ni kue akpa le ti le ti nduzu, ala fu na kaba ti yu na gbe ti *efod ni.

²³Titene ala yu kaba ni, ala koro go ni taa gi na be ti mapia-bongo ni. Ala pika yanga ni kue na kpengbango kamba titene asuru pepe.

²⁴Na yanga ti kaba ni, na mbage ti gbeni, ala zia ambeni ye ti pendere daa, angoro ni kue: ambeni le ti keke so iri ni grenade si nzoroko ni akpa le ti nduzu, abe bengo na mbeni abe si ayeke za zango nga na kamba ti *len so akpengba kpengbango.

²⁵Ala mu lôro ti nzoni ni, ala sara na ye so ayeke toto ngrengre, ala zia ni na popo ti ale ti grenade ni; ala zia aye ni tongaso angoro yanga ti kaba ni kue.

²⁶Na yanga ti kaba ni, ye so ayeke toto ngrengre so, ala zia ni oko, ala zia nga le ti grenade oko; ala zia aye ni tongaso angoro yanga ni kue, alingbi na yanga so KOTA GBIA amu lani na Moïse.

²⁷Na pekoni, zo ti kpongo bongo na apendere nzoroko afu na Aaron nga na amolenge ti lo ti koli mbeni yongoro bongo so a sara na len,

²⁸mbeni bongo so a yeke kanga na li tongana kpoto na akpoto so a sara na len, akilote so a sara na len, akamba ti len so akpengba kpengbango;

²⁹akamba ti ndö ti bongo so a sara na len so akpengba kpengbango, nzoroko ni akpa le ti nduzu, bengba bongo na bengba bongo so ayeke za zango, alingbi na yanga so KOTA GBIA amu lani na Moïse.

³⁰Na pekoni, ala mu lôro ti nzoni ni, ala sara na mbeni palata so akpa kongo; ala kpaka na ndö ni mbeni tënë tongaso: “Ye so a zia nde ndali ti KOTA GBIA.” Ala kpaka ni tongana ti so a yeke kpaka iri na ndö ti têne.

³¹Ala mu kamba so nzoroko ni akpa le ti nduzu, ala kanga na palata ni na ndö ti bongo so a yeke kanga na li tongana kpoto, alingbi na yanga so KOTA GBIA amu lani na Moïse.

³²Lege so akua kue ti sarango da so Nzapa ayeke duti daa, da ti bongo so Nzapa na azo ti lo ayeke wara tere daa ahunzi na ni laa. Azo ti Israel asara ye ni alingbi gi na yanga so KOTA GBIA amu lani na Moïse.

³³Ala mu aye ti da ni ague na ni na Moïse: — da ti bongo na agbakuru ni: *kongi ni, *amabaya ni, alate ni, angbongboro keke ni na agere ni;

³⁴— ye ti kangango na li ti da ni so ala sara na poro ti koli-taba so ala kpaka bengba nzoroko na tere ni nga na mbeni ye ti kangango na li ti da ni so ala sara na apendere poro ti nyama, ala zia na ndö ni, ridoo so akangbi ya ti da ni;

³⁵— sanduku so a zia na ya ni atêne so a su atënë ti mbuki na le ni, akeke ti yongo na ni na ye ti kangango na yanga ni;

³⁶— meza na agbakuru ni kue nga na mapa so a yeke zia na dawa ti Nzapa;

³⁷— gere ti alamba so ala sara ni na lôro ti nzoni ni, na alamba ni nde nde na agbakuru ni kue nga na mafuta ti ziango na ya ti alamba ni;

³⁸— gbalaka so ala sara na lôro, mafuta ti tukungo na li ti zo ti zia lo nde, yombo so a yeke zö na wâ; — ridoo ti yanga ti da ti bongo ni;

³⁹— gbalaka so ala sara na bengba wen, gbanda ni so ala sara na bengba wen, ayongoro keke ti yongo na ni na agbakuru ni kue; — kota sembe na gere ni;

⁴⁰— abongo ti gbagba ni, angbongboro wen ni, agere ni nga na ridoo ti yanga ti gbagba ni, akamba ni, awen so a kpo ti gbu da ni na nduzu; — agbakuru so kue a yeke sara na kua na ya ti da ti bongo so Nzapa na azo ti lo ayeke wara tere daa, da so a zia nde ndali ti Nzapa;

⁴¹— abongo ti awayango-sandaga titene ala sara na kua na ndo so ayeke nde si ayeke nzoni kue; — abongo so a zia nde ndali ti wayango-sandaga Aaron, na abongo so amolenge ti lo ayeke yu ti sara na kua ti wayango-sandaga.

⁴²Azo ti Israel asara akua ni kue alingbi gi na yanga so KOTA GBIA amu lani na Moïse.

⁴³Moïse abaa kua so kue ala sara; ala sara ni alingbi gi na yanga so KOTA GBIA amu. Tongaso Moïse asara tufa na ndö ti azo ti Israel.