Read La Bible en Sango courant – Mbeti ti Nzapa Sigingo 6 Bible Online

Sigingo 6 - La Bible en Sango courant – Mbeti ti Nzapa bible

Sigingo 6

¹KOTA GBIA atene na Moïse: “Fafadeso, mo yeke baa ye so mbi yeke sara na Faraon. Na lege ti ngangu ti maboko ti mbi, mbi yeke sara si lo zia lege na azo ti Israel ti gue. Na lege ti ngangu ti mbi, mbi yeke sara si lo tumba ala na ya ti kodro ti lo!”

²Nzapa akiri atene na Moïse: “Mbi laa mbi yeke KOTA GBIA.

³Ando mbi si na Abraham, na Isaac nga na Jacob tongana ‘Nzapa so ngangu ti lo ahon angangu kue’. Me iri ti mbi so ayeke ‘KOTA GBIA’ so, mbi fa ni na ala pepe.

⁴Na pekoni, mbi sara *mbuki na ala; mbi mu zendo ti mu na ala sese ti Kanaan so ala duti ando daa tongana awande.

⁵Fadeso, mbi wani, mbi ma demango tere ti azo ti Israel so azo ti Ezipte asara ala na ngbaa; mbi dabe ti mbi na mbuki ti mbi na ala.

⁶Ndani laa, fade mo yeke tene na azo ti Israel, mo tene: ‘Mbi laa mbi yeke KOTA GBIA. Mbi yeke zi ala na gbe ti akua ti ngbaa ti Ezipte; mbi yeke zi ala na gbe ti ngbaa so azo ti Ezipte azia ala daa. Mbi yeke yoro maboko ti mbi si mbi yeke fâ ngbanga ti ngangu na ndö ti azo ti Ezipte si mbi yeke zi ala, azo ti Israel.

⁷Mbi yeke sara titene ala, azo ti Israel, ala ga azo ti mbi si mbi yeke duti Nzapa ti ala. Ala yeke hinga atene, mbi laa mbi yeke KOTA GBIA, Nzapa ti ala, lo so lo zi ala na gbe ti angangu kua ti Ezipte.

⁸Na pekoni, mbi yeke sara titene ala li na ya ti kodro so mbi deba yanga ti mbi ti mu na Abraham, na Isaac nga na Jacob. Mbi yeke mu kodro ni na ala, azo ti Israel titene aga ti ala. Mbi laa mbi yeke KOTA GBIA!’ ”

⁹Moïse atene peko ti atënë so kue na azo ti Israel, me ala ma lo pepe, ngbanga ti so angangu kua ti ngbaa asara si be ti ala awoko.

¹⁰KOTA GBIA atene na Moïse:

¹¹“Gue mo tene tënë na Faraon, gbia ti Ezipte, titene lo zia lege na azo ti Israel ti sigigi na ya ti kodro ti lo.”

¹²Me Moïse akiri tënë na KOTA GBIA, atene: “Baa, azo ti Israel ama mbi pepe. Fade Faraon ayeke ma mbi tongana nyen, mbi so yanga ti mbi ane nengo na tenengo tënë so?”

¹³Tongaso KOTA GBIA amu yanga na Moïse na Aaron ti gue ti tene tënë na azo ti Israel nga na Faraon, gbia ti Ezipte; tongaso si azo ti Israel alingbi ti sigigi na kodro ti Ezipte.

¹⁴Iri ti ababâ ti asewa ti azo ti Israel na lege ti molongo ni ayeke so: Ruben, kozo molenge ti Jacob. Amolenge ti Ruben ti koli ayeke so: Hanok, Palu, Hesron na Karmi. So ayeke akotara ti akete mara ti Ruben laa.

¹⁵Amolenge ti Siméon ti koli ayeke so: Yemuel, Yamin, Ohad, Yakin, Sohar na Shaul. Mama ti Shaul ayeke zo ti Kanaan. So ayeke akotara ti akete mara ti Siméon laa.

¹⁶Iri ti amolenge ti Lévi ti koli na lege ti *ahale ti ala ayeke so: Gershon, Kehat na Merari. Lévi asara ngu ngbangbo oko na baleota na mbarambara na ndö ti gigi.

¹⁷Amolenge ti Gershon ti koli ayeke so: Libni na Shimei. Zo oko oko ayeke kotara ti kete mara ti lo.

¹⁸Amolenge ti Kehat ti koli ayeke so: Amram, Isar, Hebron na Uziel. Kehat asara ngu ngbangbo oko na baleota na ota na ndö ti gigi.

¹⁹Amolenge ti Merari ti koli ayeke so: Mali na Mushi. So ayeke akotara ti akete mara ti Lévi na lege ti ahale ti ala laa.

²⁰Amram amu omba ti lo Yokebed ti ga wali ti lo. Lo na Yokebed adu Aaron na Moïse. Amram asara ngu ngbangbo oko na baleota na mbarambara na ndö ti gigi.

²¹Amolenge ti Isar ti koli ayeke so: Kore, Nefeg na Zikri.

²²Amolenge ti Uziel ti koli ayeke so: Mishael, Elisafan na Sitri.

²³Aaron amu Elisheba, molenge ti Aminadab ti ga wali ti lo. Elisheba ayeke ita ti Nashon ti wali. Aaron na Elisheba adu amolenge-koli osio: Nadab, Abihu, Elazar na Itamar.

²⁴Amolenge ti Kore ti koli ayeke so: Asir, Elkana na Abiasaf. So ayeke akotara ti akete mara ti Kore laa.

²⁵Elazar, molenge ti Aaron ti koli amu mbeni molenge ti Putiel ti ga wali ti lo. Lo na Elazar adu Pinas. So ayeke iri ti ababâ ti asewa ti azo ti mara ti Lévi na lege ti akete mara ti ala laa.

²⁶Aaron na Moïse laa KOTA GBIA amu yanga na ala, atene: “Ala zi azo ti Israel asigigi na Ezipte, na lege ti molongo ti amara ti ala oko oko.”

²⁷Moïse na Aaron laa atene tënë na Faraon, gbia ti Ezipte titene lo zia lege na azo ti Israel ti sigigi na ya ti kodro ti lo.

²⁸Na lango so KOTA GBIA atene tënë na Moïse na kodro ti Ezipte,

²⁹lo tene na lo: “Mbi laa mbi yeke KOTA GBIA! Atënë so kue mbi tene na mo so, gue, mo tene peko ni na Faraon, gbia ti Ezipte.”

³⁰Me Moïse akiri tënë na dawa ti KOTA GBIA, atene: “Mbi so yanga ti mbi ane nengo na tenengo tënë so, fade Faraon ayeke ma mbi tongana nyen?”