Read La Bible en Sango courant – Mbeti ti Nzapa Job 12 Bible Online

Job 12 - La Bible en Sango courant – Mbeti ti Nzapa bible

Job 12

¹Tongaso Job amu tënë si lo tene:

²Taa-tënë, ala laa ahinga ye ahon azo kue! Tongana ala kui, fade ndara ayeke daa mbeni pepe.

³Mbi nga, mbi hinga ndo tongana ala; mbi yeke buba zo ti ala pepe. Atënë so ala tene, zo wa laa ahinga ni pepe, zo wa?

⁴Mbi iri Nzapa titene lo kiri tënë na mbi, mbi ga ye so amba ti mbi ayeke he na ngia. Zo ti mbirimbiri, zo so asara ye na legeni mbirimbiri, lo laa azo ayeke he lo na ngia.

⁵Azo so aduti nzoni, kota tënë ti ala ayeke so: “Zo ti mawa ayeke nyen!” Gi oko tënë so, ala yeke tene na zo so aye ti ti.

⁶Ya ti da ti *azaragina ayeke na siriri, azo so ayeke gi yanga ti Nzapa ayeke duti kpoo, ngangu ti ala wani, ala baa ni tongana nzapa ti ala.

⁷Me mo hunda anyama, fade ala yeke fa ye na mo; andeke ti nduzu, ala yeke tene tënë ni na mo.

⁸Tene tënë na sese, fade lo yeke fa ye na mo; asusu ti kota ngu-ingo, ala yeke fa peko ni na mo.

⁹Na popo ti aye so kue so, lo so wa laa ahinga pepe, atene: *KOTA GBIA laa asara aye so kue na maboko ti lo?

¹⁰Aye so kue ayeke na fini, fini ti ala ayeke na maboko ti lo; pupu so zo ayeke wu ayeke na maboko ti lo.

¹¹Azo ayeke tene: “Mê ayeke tara tënë tongana ti so yanga ayeke tara nzerengo ti kobe.

¹²Ndara ayeke ye ti ambakoro; hingango nda ti ye ayeke ti azo so ate gigi aninga.”

¹³Andaa ndara na ngangu ayeke ti Nzapa; wango na hingango nda ti ye ayeke ti lo.

¹⁴Tongana Nzapa abuba ye, zo oko ti kiri ti leke ni ayeke daa pepe; tongana lo bi mbeni zo na da ti kanga, zo oko ti zi lo ayeke daa pepe.

¹⁵Tongana lo gbanzi ngu-Nzapa ti pika, ndo kue ahole holengo; tongana lo zi ngu ni, ngu ni ayeke buba ndö ti sese.

¹⁶Ngangu na ndara ayeke ti lo. Zo so agirisa lege, na zo so asara si mba ti lo agirisa lege, ala kue ayeke ti Nzapa.

¹⁷Lo yeke sara si azo ti mungo wango ti kodro atambula gere senge; lo yeke bi tomboka na li ti awafango-ngbanga.

¹⁸Lo yeke zi bongo ti gbia na tere ti agbia si lo yeke kanga bongo ti ngbaa na ngbonda ti ala.

¹⁹Lo yeke sara si awayango-sandaga atambula gere senge; azo so aduti na ndö ti mbata kpu na kpu, lo yeke kinda ala na sese.

²⁰Azo so ahinga ti tene tënë nzoni, lo yeke zi tënë na yanga ti ala; lo yeke zi hingango nda ti ye na ambakoro.

²¹Lo yeke bi buba na tere ti akota zo; lo yeke zi ngangu ti azo ti sarango ngangu na amba ti ala.

²²Ye so ahonde na ya ti vukongo ndo, lo yeke sigigi na ni polele; ye so ayeke na ndo so avuko pitipiti, lo yeke fa ni na gigi polele.

²³Lo yeke sara si amara awu, na pekoni, lo yeke hunzi ala kue; lo yeke sara si amara amu ndö ti sese, na pekoni, lo yeke sara si a gbu ala, a gue na ala na kodro wande.

²⁴Lo yeke zi hingango ndo ti amakonzi ti kodro; lo yeke sara si ala tambula kirikiri na ndo so lege ayeke daa pepe.

²⁵Amakonzi ni atatara ndo na bi, na ya ti vukongo ndo. Ala tambula kirikiri tongana azo so samba ahon ndö ti ala.