Read La Bible en Sango courant – Mbeti ti Nzapa Job 13 Bible Online

Job 13 - La Bible en Sango courant – Mbeti ti Nzapa bible

Job 13

¹Taa-tënë, aye so kue so, mbi baa ni na le ti mbi awe; mbi ma tënë ni si mbi hinga nda ni.

²Ye so ala hinga, mbi nga, mbi hinga ni; mbi yeke buba zo ti ala pepe.

³Ti mbi, mbi ye ti tene tënë na Nzapa, lo so ngangu ti lo ahon angangu kue; mbi ye ti ke na dawa ti lo tënë so lo bi na li ti mbi.

⁴Ti ala, ala kanga ndö ti taa-tënë na tenengo mvene; ala kue, ala yeke awanganga so ahinga ye oko pepe.

⁵Zo wa laa ayeke sara si ala kai kpoo? Tongana ala kai fade, ka azo abaa ala tongana azo ti ndara!

⁶Ala ma tënë so mbi yeke tene ti ke tënë so a bi na li ti mbi! Ala dingi mê ti ala, ala ma tënë so mbi yeke tene ti zi tënë na li ti mbi.

⁷Tënë so ala yeke tene na legeni pepe so, ala tene ti mu mbage ti Nzapa laa? Ala yeke tene mvene so ti mu maboko na lo laa?

⁸Ala yeke mu mbage ti lo biani laa? Ala yeke gbu koko ti lo laa?

⁹Tongana lo gi fade nda ti tënë ti be ti ala, ka asara nzoni na ala? Ala ye ti handa lo tongana ti so zo ayeke handa mba ti lo zo?

¹⁰Tongana ala mu mbage ti zo, ataa na hondengo ni, fade lo yeke suku ngangu na ala biani.

¹¹Nengo ti lo ti gbia ayeke zia mbeto na be ti ala pepe? Kota mbeto ti lo ayeke ti na ndö ti ala pepe?

¹²Atënë ti ala so ala ngba ti diko ayeke tongana senge mburu ti wâ; agbungo li ti ala, ya ni ayeke fâ tongana sese ti sarango na ta.

¹³Ala kanga yanga ti ala! Ala zia mbi! Mbi laa mbi ye ti tene tënë; ataa nyen laa asi na mbi-oo, so senge.

¹⁴Ye so kue aye ti si, mbi yeke ku ni kungo, mbi ye ti ka tere ti mbi na kuâ.

¹⁵Biani, lo lingbi ti fâ mbi senge, nyen laa aso mbi, nyen? Me mbi ye ti fa na le ti lo so sarango ye ti mbi ayeke sioni pepe.

¹⁶So laa ayeke soo mbi, ngbanga ti so zo ti sioni be alingbi ti luti na le ti Nzapa pepe.

¹⁷Ala ma, ala ma tënë ti mbi si! Ala zi mê ti ala, ala ma tënë so mbi yeke fa nda ni.

¹⁸Ala baa, mbi yeke nduru ti fa peko ti atënë ti mbi na le ti ngbanga; mbi hinga, mbi tene, tënë ayeke na li ti mbi pepe.

¹⁹Zo wa laa aye ti bi tënë na li ti mbi? Tongana mbi sara sioni, mbi yeda ti kanga yanga ti mbi si mbi kui.

²⁰Nzapa ti mbi, mbi hunda na mo gi aye use si fade mbi zia ti honde tere ti mbi na le ti mo:

²¹Kozoni, zi maboko ti mo so ane na ndö ti mbi; kiri mo zia kota mbeto na be ti mbi pepe.

²²Na pekoni, mo iri ndo, fade mbi yeke kiri tënë na mo; wala mbi tene tënë si mo yeke kiri tënë na mbi.

²³Sioni oke laa mbi sara? Siokpari oke laa mbi sara? Sioni ti mbi na siokpari ti mbi so ake mo, fa ni na mbi si mbi hinga.

²⁴Mo honde le ti mo na mbi si mo baa mbi tongana wato ti mo ngbanga ti nyen?

²⁵Mo ye ti tumba peko ti kugbe so pupu amu ahon na ni? Mo ye ti tumba peko ti holengo pere?

²⁶Mo de mbeti na tere ti mbi; asioni so mbi sara na ndembe so mbi de maseka, mo zia ni kue na li ti mbi.

²⁷Mo kanga gere ti mbi na zingiri; aye so kue mbi yeke sara, le ti mo gi na ndö ni; ndo so kue mbi yeke hon daa, le ti mo gi na peko ti mbi.

²⁸Me tere ti mbi ayeke buba tongana keke so afun; wala tongana bongo so akangi ate ni.