Read La Bible en Sango courant – Mbeti ti Nzapa Job 17 Bible Online

Job 17 - La Bible en Sango courant – Mbeti ti Nzapa bible

Job 17

¹Mbi wu gbaa, fini ti mbi ayeke gue ti hunzi; ye so angba na mbi ayeke du ti kuâ.

²Azo ti hengo ndo laa angoro mbi; sioni yanga ti ala akanga lege na mbi ti lango.

³Nzapa, mo wani, mo futa ngere ti soo mbi maa! Mbeni zo nde wa laa alingbi ti mu tere ti lo ti soo mbi?

⁴Biani, mo kanga hingango ndo ti amba ti mbi awe; tongaso, fade mo yeke zia lege na ala ti hon ndö ti mbi pepe.

⁵Ala kpa zo so airi amba ti lo ti te kobe, andaa amolenge ti lo aku ti ala kobe ni gbaa.

⁶Mbi ga ye ti ngia ti azo, mbi ga zo so ala yeke tuku ngu ti yanga na le ti lo.

⁷Vundu akanga le ti mbi; tere ti mbi kue ayeke tongana gbe ti de.

⁸Azo so ayeke sara ye na legeni, tongana ala baa mbi, li ti ala akpe. Azo so asara sioni pepe, ala yeke kasa azo ti sarango sioni.

⁹Ala yeke tene: “Ayeke nzoni zo ti mbirimbiri angba gi na lege ti sarango ye ti lo; zo so maboko ti lo avuru, ayeke nzoni lo kiri lo gbu ngangu ahon ti kozoni!”

¹⁰Ti ala amba ti mbi, ala ga, ala kue akiri aga! Me na popo ti ala, mbi wara mbeni zo ti ndara pepe!

¹¹Fini ti mbi ahunzi awe, apialo ti mbi ali ngu awe, apialo so mbi zia be ti mbi na ndö ni so.

¹²Ti amba ti mbi, tongana ndo avuko, ala tene ti ala, atene, kota lâ laa. Ala tene, ndo aga nduru ti han, andaa ndo angba ti vuko.

¹³Nyen laa mbi ngba ti ku, nyen? Mbi yeke ku gi ndo ti akuâ, ndo ti lango ti mbi laa; mbi yeke ku gi mbeni konza na ya ti vukongo ndo.

¹⁴Mbi tene na du ti kuâ, mbi tene: “Mo yeke babâ ti mbi!” Mbi tene na angusu, mbi tene: “Ala yeke mama ti mbi, ala yeke a-ita ti mbi ti wali!”

¹⁵Ye so mbi zia be ti mbi ti ku so ayeke na ndo wa? Zo wa laa alingbi ti baa ni?

¹⁶Ye so mbi zia be ti mbi ti ku azu na ndo ti akuâ, na ngbonda ni kâ; e use kue, e lango na ya ti fuku ti sese.