Read La Bible en Sango courant – Mbeti ti Nzapa Job 18 Bible Online

Job 18 - La Bible en Sango courant – Mbeti ti Nzapa bible

Job 18

¹Bildad, zo ti kodro ti Shuha amu tënë si lo tene:

²Atënë so ala yeke tene ngbii so, ala yeke kai ni lawa? Ala gbu li ti ala, na pekoni, fade e yeke tene tënë.

³Ala baa e tongana nyama ngbanga ti nyen? Ala baa ti ala atene, e yeke azo so e hinga ndo pepe?

⁴Ti mo, tongana ngonzo agbu mo awe, mo yeke suru tere ti mo wani na ka. Mo baa mo tene, ndali ti mo, sese ayeke ga benyama? Ndali ti mo, têne ayeke zia plase ti lo ti gue na mbeni ndo nde?

⁵Biani, fade lamba ti zo ti sioni ayeke mingo, wâ so ayeke na ya ti duke ti lo ayeke kiri ti za pepe.

⁶Ya ti da ti lo ayeke gue ti vuko, lamba ayeke mingo na ndö ti lo.

⁷Ando, lo yeke tambula tongana koli, me fadeso, lo tambula nzoni pepe; apialo ti lo ayeke sara si lo ti.

⁸Biani, gere ti lo ayeke li na ya ti gbanda si gbanda ni ayeke kanga gere ti lo.

⁹Mbeni kuku ayeke gbu lo na peko ti gere ti lo, mbeni kamba ayeke gbu lo ngangu.

¹⁰Kamba so agbu gere ti lo so, a honde ni hondengo na ya ti sese; a leke kuku ni na lege so lo yeke hon daa.

¹¹Mbage na mbage kue, kota mbeto agbu lo; mbeto ni ayeke mu peko ti lo na ndo so kue lo yeke gue daa.

¹²Lani lo yeke na ngangu mingi me fadeso, nzara awoko lo awe; pasi amu ndo na tere ti lo kue.

¹³Mbeni kobela ayeke te poro ti tere ti lo; sioni kobela ayeke buba ambage ti tere ti lo kue.

¹⁴A yeke gboto lo na da ti lo so lo yeke duti daa kpoo so, a yeke gue na lo na gbia ti ndo ti akuâ.

¹⁵Da ti lo ayeke ti lo mbeni pepe; mbeni zo nde alingbi ti lango daa. Ye so ayeke ti lo, fade a yeke tuku *sufre na ndö ni.

¹⁶Lo yeke ga tongana keke so na gbe ni, agunda ni ahole; na li ni, amaboko ni ahole nga.

¹⁷Na ya ti kodro, azo ayeke kiri ti dabe ti ala na lo pepe, ala yeke kiri ti di iri ti lo na mbeni ndo pepe.

¹⁸A yeke mu lo na popo ti azo so angba na fini, a bi lo na ndo ti akuâ so avuko vukongo; a yeke tumba lo na ndö ti sese.

¹⁹Fade mbeni molenge wala ata ti lo ti mu plase ti lo na ya ti kodro ayeke daa pepe. Na ya ti da ti lo, mbeni zo oko ayeke ngba na fini pepe.

²⁰Ti londo na To ti si na Do, li ti azo ayeke kpe ndali ti aye so asi na lo, mbeto ayeke gbu azo kue.

²¹Ala tene: “Baa, gi ye so angba na zo ti sioni na sewa ti lo laa! Baa, ndo so azo aye lani ti hinga Nzapa pepe so laa!”