Read La Bible en Sango courant – Mbeti ti Nzapa Job 19 Bible Online

Job 19 - La Bible en Sango courant – Mbeti ti Nzapa bible

Job 19

¹Job amu tënë si lo tene:

²Fade ala yeke ngba ti mu vundu na mbi ngbii asi lawa? Ala yeke ngba ti nika mbi na tënë ngbii asi lawa?

³Fani baleoko laa ala zonga mbi so. Kamene asara ala ti sara pasi na mbi tongaso pepe?

⁴Tongana mbi girisa fade lege biani, ka girisango lege ni abaa gi mbi wani!

⁵Ti ala, ala ye ti kiri mbi na gbeni si ala ga kota. Ye ti kamene so asi na mbi, ala yeke bi tënë ni na li ti mbi.

⁶Ayeke nzoni ala hinga atene, Nzapa laa asara mbana na mbi, lo laa lo gbu mbi na ya ti gbanda ti lo.

⁷Mbi dekongo ndali ti ye ti ngangu; zo oko akiri tënë pepe; mbi iri ndo gbaa, fango ngbanga ti mbirimbiri ayeke daa pepe.

⁸Nzapa akanga lege na mbi, lo ye titene mbi hon pepe; lo zia mbi, mbi tambula na ya ti vukongo ndo.

⁹Lo zi nengo ti mbi; aye so mbi yeke pika kate ti mbi daa, lo zi ni awe.

¹⁰Lo buba mbi biani biani; ti mbi ahunzi awe; ye so mbi zia be ti mbi ti ku, lo gboto ni tongana ti so a yeke gboto keke.

¹¹Ngonzo ti lo ti wâ alondo na tere ti mbi, lo baa mbi tongana wato ti lo.

¹²Azo ti lo so ayeke fâ azo abongbi, ala suru lege ngbii asi na mbi, ala ngoro da ti mbi titene ala ti na ndö ti mbi.

¹³Asewa ti mbi, Nzapa apusu ala yamba na tere ti mbi; azo so lani ahinga mbi, ala yeke sara kue ti kpe mbi kpengo.

¹⁴Azo ti da ti mbi ayeke daa mbeni pepe; azo so aye fade mbi mingi, ala girisa mbi awe.

¹⁵Azo so lani mbi tisa ala na da ti mbi, ala na azo ti kua ti mbi ti wali, ala baa mbi tongana wande. Ti ala, mbi yeke zo so ala hinga lo oko pepe.

¹⁶Mbi iri zo ti kua ti mbi, lo yeda pepe; ataa mbi voro lo, mbi voro lo gbaa.

¹⁷Yanga ti mbi ayeke fun sioni, wali ti mbi alingbi ti kanga be ti lo pepe; taa amolenge ti ya ti mbi, mbi fun sen na hon ti ala.

¹⁸Ataa akete molenge, ala yeke baa mbi tongana mbumbuse zo; tongana mbi zi yanga ti tene tënë, ala yeke he mbi hengo.

¹⁹Amba ti mbi so kue mbi na ala e ye tere mingi, ala ye ti baa mbi na le ti ala fani use pepe. Azo so lani mbi ye ala, ala londo ti sara sioni na mbi.

²⁰Fadeso, gi senge poro na abio ti mbi laa angba; mbi yeke na ya ti kpale, mbi girisa ye kue.

²¹Ala amba ti mbi, ala baa mawa ti mbi, ala baa mawa ti mbi maa! Biani, maboko ti Nzapa laa apika mbi.

²²Ala yeke tumba peko ti mbi tongana ti Nzapa so ngbanga ti nyen? Ala de ti woko na sarango mbi pasi pepe?

²³Ae! Tongana a su fade atënë ti mbi na mbeti, ka ayeke nzoni mingi! Âdu fade a su ni na ya ti mbeni mbeti, ka ayeke nzoni.

²⁴Âdu fade a mu wen si a de na atënë ni na ndö ti têne, a kpaka plon daa si angba lakue lakue, ka ayeke nzoni mingi!

²⁵Ti mbi, mbi hinga so zo ti zingo mbi ayeke na fini; na ndani, lo yeke luti na ndö ti sese.

²⁶Ataa poro ti tere ti mbi abuba kue, ataa tere ti mbi angba senge tongaso, fade mbi yeke baa Nzapa.

²⁷Biani, mbi wani laa mbi yeke baa lo; le ti mbi ayeke baa lo, mbeni zo nde laa ayeke baa lo pepe. Be ti mbi ayeke do dongo titene ngoi ni so asi hio.

²⁸Ala yeke hunda tere ti ala, atene: “E yeke sara tongana nyen ti tumba peko ti Job? Tënë ti nyen laa e yeke wara ti gue na lo na le ti ngbanga?”

²⁹Tongaso, alingbi ala sara mbeto ti yongoro zeme, ngbanga ti so tumbango so ala tumba peko ti mbi so alingbi na kuâ. Ayeke nzoni ala hinga so, ngbanga ayeke duti ande daa.