Read La Bible en Sango courant – Mbeti ti Nzapa Job 2 Bible Online

Job 2 - La Bible en Sango courant – Mbeti ti Nzapa bible

Job 2

¹Mbeni lâ, ala so ayeke lango na yayu akiri aga aluti na dawa ti *KOTA GBIA. Satan nga aga aluti na popo ti ala na dawa ti KOTA GBIA.

²KOTA GBIA ahunda Satan, atene: “Mo londo na ndo wa?” Satan akiri tënë na KOTA GBIA: “Mbi fono, mbi baa ndö ti sese si mbi ga so.”

³KOTA GBIA ahunda lo, atene: “Mo baa dutingo ti Job, zo ti kua ti mbi awe? Na ndö ti sese so, mbeni zo ti lingbi na lo ayeke daa pepe. Koli so ayeke sara ye na legeni, tënë ayeke na li ti lo pepe; lo yeke kpe mbeto ti Nzapa si lo yeke kpe lege ti sarango sioni. Lo ngba ti sara ye na legeni; mo pusu mbi lani titene mbi buba lo senge senge.”

⁴Me Satan akiri tënë na KOTA GBIA: “Ayeke na legeni. Zo kue ayeke mu ye ti kiri ti wara ye na pekoni. Ye so kue zo ayeke na ni, lo yeke mu ni ti soo na fini ti lo.

⁵Me mo yoro maboko ti mo, mo ndu bio ti lo na kasa ti tere ti lo, e baa! Mbi hinga so fade lo yeke deba mo taa na le ti mo.”

⁶Tongaso KOTA GBIA atene na Satan: “Nzoni! Mbi zia lo na maboko ti mo. Gi ye oko, mo bata fini ti lo.”

⁷Tongaso Satan alondo ahon na le ti KOTA GBIA. Na pekoni, lo pika Job na sioni kobela ti ka ti sanzo. Ka ni amu tere ti lo kue, alondo na gbe ti gere ti lo ngbii asi na li ti lo.

⁸Job aduti na ya ti mburu ti wâ, lo mu fango ta si lo yeke kpaka na tere ti lo.

⁹Wali ti lo atene na lo: “Fade mo yeke ngba ti sara ye na legeni tongaso? Mo deba Nzapa, mo kui ma!”

¹⁰Me Job akiri tënë na lo: “Mo yeke tene tënë tongana wali so li ti lo ayeke daa pepe. Tongana e wara nzoni ye na maboko ti Nzapa, e yeda; me tongana e wara sioni ye, e yeda pepe, ngbanga ti nyen?” Na ya ti aye so kue, Job asara siokpari na lege ti tënë ti yanga ti lo pepe.

¹¹Amba ti Job ota ama tënë ti aye ti vundu so kue asi na lo si zo oko oko alondo na kodro ti lo aga ti baa lo. Ayeke azo tongana: Elifaz, zo ti kodro ti Teman; Bildad, zo ti kodro ti Shuha nga na Sofar, zo ti kodro ti Naama. Ala ma tere titene ala ga akangbi vundu na lo, ti de be ti lo.

¹²So ala ngba yongoro, ala baa Job, me ala hinga lo pepe. Tongaso ala yoro yanga ti ala na kota toto. Zo oko oko asuru kota bongo ti lo ti de, ala tuku fuku ti sese na nduzu si akiri atuku na ya ti li ti ala.

¹³Ala ngba aduti na lo na sese na ya ti lango mbarambara na bi mbarambara. Zo oko atene tënë na lo pepe, ngbanga ti so ala baa so vundu ti lo ayeke ngangu mingi.