Read La Bible en Sango courant – Mbeti ti Nzapa Job 21 Bible Online

Job 21 - La Bible en Sango courant – Mbeti ti Nzapa bible

Job 21

¹Job amu tënë si lo tene:

²Ala ma tënë ti mbi nzoni; lege so ala yeke de be ti mbi na ni laa.

³Ala zia mbi, mbi tene tënë. Tongana mbi tene tënë ni ahunzi awe, ala lingbi ti he mbi senge.

⁴Mbi dema tere ti mbi na iri ti zo? Mbi kanga be ti mbi gbaa so, senge senge?

⁵Ala baa mbi nzoni: fade li ti ala ayeke kpe kue si tënë ayeke hunzi na yanga ti ala.

⁶Tongana mbi dabe ti mbi na ye so asi na mbi, mbeto ayeke sara mbi si tere ti mbi ayeke do dongo.

⁷Azo ti sioni angba ti duti na fini ngbanga ti nyen? Ala yeke ga mbakoro si komandema ti ala ayeke gue guengo na nduzu ngbanga ti nyen?

⁸*Ahale ti ala ayeke sara kodro na tere ti ala, a-ata ti ala ayeke kono gi na le ti ala.

⁹Siriri ayeke na da ti ala, zo oko ayeke sara mbeto pepe; zaza ti Nzapa ayeke pika ala pepe.

¹⁰Akoli-bagara ti ala ayeke zia ngo na ya ti amama ni, amama ti bagara ti ala ayeke du na kuâ ni pepe.

¹¹Azo ti sioni ayeke zia gba ti amolenge ti ala ti sara ngia ti ala, a-ata ti ala ayeke dodo na ngia.

¹²Ala yeke he bia, na pikango ngo, na kundi; ala yeke sara ngia na toto ti *ngoli.

¹³Na ya ti gigi ti ala, ala yeke duti nzoni si biaku tongaso, ala zu na siriri na ndo ti akuâ.

¹⁴Andaa ala tene na Nzapa, atene: “Zia e kpoo! E ye ti hinga lege ti mo pepe.

¹⁵Lo so a tene, ngangu ti lo ahon angangu kue so, lo yeke ti lo zo wa si e ga ngbaa ti lo? Tongana e sambela lo, nyen laa e yeke wara na pekoni nyen?”

¹⁶Ye ni laa: anzoni ye so azo so awara, ala yeke makonzi ni pepe! Ayeke nzoni mbi tara mara ti sarango ye ti azo ti sioni so oko pepe.

¹⁷Me fani oke laa lamba ti azo ti sioni so amingo? Fani oke laa aye ti ala abuba biani biani si ngonzo ti Nzapa aga ye ti ala?

¹⁸Azo ayeke tene: “Ayeke nzoni ala ga tongana pere so pupu amu ahon na ni; tongana holengo pere so kota pupu amu ahon na ni.”

¹⁹Ala tene: “Nzapa abata fade sioni ti ababâ ni ndali ti amolenge ti ala.” Nzapa alingbi fade ti sara sioni na azo ti sioni ni si li ti ala aga daa!

²⁰Ayeke nzoni zo ti sioni abaa aye ti lo abuba taa na le ti lo wani; lo nyon ngonzo ti Nzapa so ngangu ti lo ahon angangu kue si!

²¹Tongana lo kui awe, ye so ayeke si ande na amolenge ti lo ayeke sara ye oko na lo pepe.

²²Zo wa laa ayeke fa hingango ye na Nzapa? Lo laa lo yeke fâ ngbanga ti *a-ange pepe?

²³Mbeni zo angba ti lo ngangu si lo kui, lo duti nzoni, mbeni ye ayeke sara lo pepe,

²⁴lo kono, tere ti lo ayeke za zango, tere ti lo angba ngangu.

²⁵Me mbeni zo akui, vundu na be ti lo, lo duti nzoni laoko pepe.

²⁶Ala use kue alango na ya ti fuku ti sese; tere ti ala kue gi na angusu.

²⁷Ala amba ti mbi, mbi hinga tënë ti be ti ala; mbi hinga gbungo-li ti ala na ndö ti mbi.

²⁸Biani, ala tene: “Zo ti sarango ngangu na azo so, da ti lo ayeke na ndo wa? Zo ti sioni so, da ti lo aga tongana nyen?”

²⁹Azo so ayeke hon na lege, ala hunda ala pepe? Ala ke ti yeda na tënë ti azo ni so?

³⁰Na lango so ye ti ngangu ayeke si, zo ti sioni ayeke sigigi na ya ni, ngonzo ti Nzapa ayeke wara lo pepe.

³¹Zo wa laa alingbi ti ke sioni ti lo taa na le ti lo, zo wa? Ye so lo sara so, zo wa laa ayeke kiri peko ni na lo, zo wa?

³²Tongana zo ni akui, a yeke gue na lo na sende ti akuâ; a yeke bata sende ti kuâ ti lo.

³³Gba ti azo ague ti lu kuâ ti lo, ambeni na peko, ambeni na dawa. Sese so ayeke na popo-hoto ayapu na lo.

³⁴Atënë ti dengo be ti nyen laa ala tene na mbi? Gi pupu senge! Atënë so ala kiri na ni ayeke gi atënë ti handango zo.