Read La Bible en Sango courant – Mbeti ti Nzapa Job 3 Bible Online

Job 3 - La Bible en Sango courant – Mbeti ti Nzapa bible

Job 3

¹Na pekoni, Job azi yanga si lo deba lango so a du na lo.

²Lo mu tënë si lo tene:

³Ayeke nzoni lango so a du na mbi so agirisa, nga na bi so atene: “A mu ngo ti molenge-koli awe” so!

⁴Ayeke nzoni lango ni so avuko pitipiti! Nzapa so ayeke na nduzu kâ ado ni azia! Ndo avuru na ndö ti lo pepe!

⁵Ayeke nzoni vukongo ndo na ndo so avuko ahon ndoni akanga ndö ti lango ni so! Vukongo mbinda amu ndö ti lo! Na kota lâ, ndo so avuko vukongo azia kota mbeto na be ti lango ni so!

⁶Na bi ni so, ayeke nzoni ndo avuko mingi! Alango so ayeke na ya ti ngu oko, a zi bi ni so na popo ti ala; a diko ni na popo ti alango ti nze pepe.

⁷Biani, na bi ni so, ayeke nzoni wali amu ngo pepe; zo oko adekongo ti ngia na bi ni so pepe!

⁸Ayeke nzoni azo so ayeke deba alango, adeba bi ni sioni sioni; azo so ahinga ti zingo Leviatan adeba bi ni so!

⁹Ayeke nzoni atongoro ti ndaperere ti bi ni so avuko! Bi ni aku titene ndo ahan, me lo ku gbaa; lo baa sigingo ti lâ pepe!

¹⁰Biani, bi ni so akanga lani ya ti mama ti mbi pepe; tongaso laso, le ti mbi ayeke baa aye ti pasi ni so.

¹¹So lani mbi de na ya ti mama ti mbi so, mbi kui pepe, ngbanga ti nyen? So lani mbi yeke sigigi so, fini ti mbi ahunzi pepe, ngbanga ti nyen?

¹²A zia mbi lani na ndö ti agere ti mama ti mbi, ngbanga ti nyen? Mama amu na mbi me, ngbanga ti nyen?

¹³Tongaso pepe, ka fadeso, mbi yeke duti kpoo na ya ti du ti kuâ ti mbi; ka mbi lango, mbi wu tere ti mbi

¹⁴legeoko na agbia nga na akota zo ti ndö ti sese so; ala so akiri aleke akota da so lani ati,

¹⁵wala na amolenge ti gbia so lani ayeke na lôro, nga na aye so a sara na wen ti nginza si asi singo na ya ti ada ti ala.

¹⁶Wala mbi duti lani daa pepe, tongana amolenge so a du ala na kuâ ni si ala baa le ti lâ pepe.

¹⁷Na ya ti du ti kuâ, azo ti sioni azia ti sara wusuwusu; azo so awoko kue ayeke wu tere ti ala.

¹⁸Azo ti kanga nga ayeke duti na siriri, ala kiri ti ma dekongo ti asanziri pepe.

¹⁹Kâ, asenge zo na akota zo, ala kue gi legeoko; ngbaa asigigi na gbe ti wa ti lo awe.

²⁰Azo so ayeke baa pasi, Nzapa azia a du ala ngbanga ti nyen? Azo so be ti ala ayeke na vundu, Nzapa ayeke mu fini na ala ngbanga ti nyen?

²¹Ala yeke ku kuâ, me kuâ ni ayeke ga pepe; ala yeke gi kuâ ahon gingo mosoro.

²²Tongana ala wara fade du ti kuâ, ka be ti ala asi singo na ngia, ka ala dodo na ngia!

²³Me mbi yeke zo so mbi hinga pepe ndo so mbi yeke gue daa; Nzapa akanga mbi tongana zo so a kanga lo na ya ti gbagba.

²⁴Kobe ti mbi ti tengo ni ayeke gi dema; dekongo ti mbi ayeke sigigi tongana ngu so ayeke sua.

²⁵Ye so mbi sara mbeto ni, ni laa asi na mbi; ye so azia mbeto na be ti mbi, ni laa awara mbi.

²⁶Ti mbi, be ti mbi aduti kpoo pepe, mbi yeke na siriri pepe, mbi yeke na wungo tere pepe. Gingo be ahon ndö ti mbi.