Read La Bible en Sango courant – Mbeti ti Nzapa Job 30 Bible Online

Job 30 - La Bible en Sango courant – Mbeti ti Nzapa bible

Job 30

¹Me fadeso, azo so ngu ti ala alingbi na ti mbi pepe, ayeke he mbi na ngia. Ando, mbi baa so ababâ ti ala akpa pepe ti duti na popo ti ambo ti bata anyama ti mbi.

²Mara ti azo so ngangu ayeke na ala pepe so, kua ti nyen laa ala lingbi ti sara na mbi, nyen?

³Nzara na pasi asara si ala nge ngengo; ala yeke gi kobe ti tengo ni na ndo so ahole holengo, ndo so ye kue abuba daa.

⁴Ala yeke fâ pere so ayeke ingo ingo na tere ti akete keke; agunda ti keke aga kobe ti ala.

⁵Azo kue atumba ala, azo ayeke dekongo na li ti ala tongana azo ti nzi.

⁶Ala yeke lango na tere ti ahoto, na ya ti adu ti sese nga na ya ti adu ti têne.

⁷Ala bongbi tere ti ala na gbe ti akamba ti ki, ala yeke toto tongana nyama na popo ti akete keke.

⁸Mara ti azo ti fuu laa, iri ti ala ayeke daa pepe. A mu keke si a tumba na ala na ya ti kodro.

⁹Me fadeso, ala yeke he bia na iri ti mbi, ala yeke fono na iri ti mbi.

¹⁰Be ti ala ake mbi mingi si ala yeke pusu yongoro na tere ti mbi. Ala yeke tuku ngu ti yanga na le ti mbi, tënë ni asara ye oko na ala pepe.

¹¹Ndali ti so Nzapa azi ngangu ti mbi si lo zia kamene na le ti mbi, ala yeke sara ye ti be ti ala na mbi.

¹²Amaseka-koli ti mbana ayeke londo ti bi tënë na li ti mbi; ala yeke gi lege ti bi mbi na sese, ala londo ti ti na ndö ti mbi ti mingo mbi biani biani.

¹³Ala kanga lege kue na mbi, ala sara kue ti mingo mbi, ngangu ti ala wani alingbi awe; ala hunda maboko ti mbeni zo nde pepe.

¹⁴Ala koro kota du na ya ti gbagba, ala hara mbi na gbe ti atêne so atuku so.

¹⁵Mbeto agbu mbi, mbeto ni azi nengo ti mbi tongana ti so pupu ayeke zi mbeni ye ti hon na ni. Nzoni duti ti mbi ahon tongana mbinda.

¹⁶Fadeso, fini ti mbi ague ti hunzi; mbi ngba gi na ya ti alango ti pasi.

¹⁷Na bi, pasi ni ali mbi ngbii agbu bio, ate mbi si akanga lege na mbi ti lango.

¹⁸Nzapa agbu mbi ngangu na bongo ti mbi; lo yeke pete go ti mbi tongana go ti bongo so ayeke kete.

¹⁹Lo bi mbi na ya ti potopoto, mbi ga tongana fuku ti sese wala mburu ti wâ.

²⁰Nzapa, mbi dekongo na mo, me mo kiri tënë pepe. Mbi luti na dawa ti mo titene mo baa mbi.

²¹Mo kiri mo ga bamara na tere ti mbi; mo mu ngangu ti mo kue ti sara pasi na mbi.

²²Mo zia mbi na ndö ti pupu si pupu ni amu mbi ahon na mbi; mo sara si ngangu pupu ayingi mbi ngangu.

²³Mbi hinga kue, mo yeke gue na mbi na kuâ laa, ndo so a diko ndali ti azo so kue ayeke na fini.

²⁴Me tongana zo ati awe, lo yeke yoro maboko pepe? Na ya ti ye ti ngangu, lo yeke dekongo pepe?

²⁵Azo so gigi ti ala ayeke ngangu so, mbi toto lani ndali ti ala pepe? Azo ti mawa, vundu ti ala agbu be ti mbi pepe?

²⁶Biani, mbi zia be ti mbi lani ti ku nzoni dutingo, me ye ti vundu laa aga. Mbi yeke ku titene ndo ahan, me ndo avuko pitipiti.

²⁷Be ti mbi ayeke kporo kporongo; alango ti pasi asi na mbi.

²⁸Mbi yeke tambula gi na vundu; lâ asigigi ndali ti mbi pepe. Na le ti azo kue, mbi luti na nduzu si mbi dekongo.

²⁹Ndali ti dekongo ti mbi ni, mbi ga ita ti ambo ti ngonda, mbi ga mba ti andeke ti bi.

³⁰Poro ti tere ti mbi abuba si ati; kobela ti wâ agbi mbi asi na bio.

³¹Kundi ti mbi aga gi ye ti totongo na kuâ; *ngoli ti mbi ayeke toto na gbe ti abia ti azo ti totongo kuâ.