Read La Bible en Sango courant – Mbeti ti Nzapa Job 32 Bible Online

Job 32 - La Bible en Sango courant – Mbeti ti Nzapa bible

Job 32

¹Elifaz, Bildad na Sofar azia ti kiri tënë na Job, ngbanga ti so Job abaa ti lo atene, ni yeke zo ti mbirimbiri.

²Ye so asara si ngonzo ti Elihu alondo tongana wâ. Lo yeke molenge ti Barakel, zo ti mara ti Buz; kete mara ti lo ayeke Ram. Ngonzo ti lo alondo na tere ti Job, ngbanga ti so Job atene, ni yeke mbirimbiri ni hon Nzapa.

³Ngonzo ti Elihu alondo nga na tere ti amba ti Job ota, ngbanga ti so ala wara tënë ti kiri na ni na Job pepe; ala baa ti ala atene, Nzapa laa asara siokpari.

⁴Kozoni, Elihu aku ti tene tënë na Job, ngbanga ti so ngu ti ala ahon ti lo.

⁵Me tongana Elihu abaa so akoli ota so ayeke na mbeni tënë ti kiri na ni na Job pepe, ngonzo ti lo alondo tongana wâ.

⁶Elihu, molenge ti Barakel, zo ti mara ti Buz amu tënë si lo tene: Mbi yeke maseka, me ala yeke ti ala ambakoro. Ndani laa mbi sara mbeto ti fa na le ti ala tënë so mbi hinga.

⁷Mbi tene na be ti mbi, mbi tene: “Ambakoro laa ayeke tene tënë, azo so ngu ti ala ayeke mingi laa ayeke fa ndara na azo.”

⁸Me ye so ayeke mu hingango ndo na zo ayeke yingo ti Nzapa; so ti tene pupu ti yanga ti Nzapa so ngangu ti lo ahon angangu kue.

⁹Dutingo na ngu mingi laa ayeke mu ndara na zo pepe; gango mbakoro laa asara si zo ahinga ye ti mbirimbiri pepe.

¹⁰Ndani laa mbi tene: ala ma mbi si! Mbi nga, mbi yeke fa ye so mbi hinga.

¹¹Baa, mbi ku fade ti ma ndangba tënë ti ala; mbi dingi mê ti mbi ti ma agbungo li ti ala, ti ma kiringo tënë ti ala na ndö ti atënë ti Job.

¹²Mbi ma ala nzoni mingi, me na popo ti ala, zo oko ti kiri mbeni tënë ti kanga yanga ti Job ayeke daa pepe; zo oko ti fa atene, tënë ti lo ayeke sioni ayeke daa pepe.

¹³Tongaso, ala tene pepe, atene: “Baa, tënë ti ndara laa: Nzapa oko laa alingbi ti hon lo na tënë, me mbeni zo pepe.”

¹⁴Na mbi laa Job atene tënë pepe; tongaso tënë ti ala laa mbi yeke mu ti kiri tënë na lo pepe.

¹⁵Ye ahon ndö ti ala; tënë oko titene ala kiri ni ayeke daa pepe, tënë ahunzi na yanga ti ala awe.

¹⁶Mbi ku gbaa. Me so ala kiri atene tënë pepe so, so ala kai ti kiri tënë so,

¹⁷ngoi ti mbi titene mbi sara tënë alingbi awe. Mbi nga, mbi yeke fa ye so mbi hinga.

¹⁸Mbi yeke na gba ti tënë ti tenengo ni; yingo so ayeke na ya ti mbi ayeke pusu mbi ti tene tënë.

¹⁹Tënë ni ayeke kporo na ya ti mbi tongana vin so ayeke gi lege ti sigingo ni gbaa si asungba afini bozo ti poro.

²⁰Ala zia mbi, mbi tene tënë si mbi wu pupu. Mbi ye ti zi yanga ti mbi si mbi kiri tënë.

²¹Taa-tënë, mbi yeke mu mbage ti zo oko pepe; mbi yeke tene anzerengo tënë ti handa na zo pepe.

²²Mbi hinga ti tene anzerengo tënë ti handa na zo pepe; tongaso pepe, ka lo so asara mbi ayeke nika mbi hio tongaso.