Read La Bible en Sango courant – Mbeti ti Nzapa Job 35 Bible Online

Job 35 - La Bible en Sango courant – Mbeti ti Nzapa bible

Job 35

¹Elihu angba ti tene tënë, lo tene:

²Job, so mo yeke tene: “Mbi yeke mbirimbiri mbi hon Nzapa” so, mo baa ti mo, mo tene, tënë ti mo ayeke na legeni?

³Biani, mo tene: “Ataa mbi sara siokpari pepe, asara nyen na mo, nyen? Nyen laa mbi wara na pekoni, nyen?”

⁴Fade mbi yeke kiri tënë na mo nga na amba ti mo legeoko.

⁵Zi le ti mo, mo baa le ti nduzu, baa ambinda: ala yeke kâ na nduzu, yongoro na mo!

⁶Tongana mo sara siokpari, asara nyen na Nzapa, nyen? Tongana mo tomboka na tere ti lo fani mingi, asara nyen na lo? Ye oko pepe!

⁷Tongana mo yeke mbirimbiri, mbirimbiri ti mo ayeke mu na lo nyen? Nyen laa lo yeke wara na maboko ti mo, nyen?

⁸Ataa mo sara sioni-oo, ataa mo sara nzoni-oo, sioni ni na nzoni ni kue mo sara ni gi na amba ti mo zo.

⁹Tongana a nika azo, ala yeke dema tere ti ala; ala yeke dekongo na gbe ti azo ti sarango ngangu.

¹⁰Me mbeni oko atene pepe: “Nzapa so asara mbi so ayeke na ndo wa? Lo so lo zia abia na yanga ti e si e yeke he na bi so, lo yeke na ndo wa?

¹¹Lo so lo yeke fa ye na e na lege ti anyama ti ngonda, lo yeke mu ndara na e na lege ti andeke ti nduzu.”

¹²Tongaso azo adekongo, me lo yeda pepe ndali ti baba ti azo ti sioni.

¹³Asenge senge tënë laa, Nzapa ayeke ma pepe; lo so ngangu ti lo ahon angangu kue, lo yeke dingi mê ti lo ti ma ni pepe.

¹⁴Job, so mo tene: “Mbi yeke baa Nzapa pepe, tënë ti mbi ayeke na maboko ti lo si mbi ngba ti ku lo” so, fade lo yeke ma mo tongana nyen?

¹⁵Ti fadeso, ngonzo ti Nzapa ade alondo pepe si lo dabe ti lo na atënë ti mbana ti mo so pepe.

¹⁶Ye ni ayeke tongaso, ngbanga ti so mo zi yanga ti mo senge senge, mo yeke tene gba ti abuba tënë.