Read La Bible en Sango courant – Mbeti ti Nzapa Job 36 Bible Online

Job 36 - La Bible en Sango courant – Mbeti ti Nzapa bible

Job 36

¹Elihu angba ti tene tënë, lo tene:

²Job, ku kete si; mbi yeke na ambeni tënë ti tene na mo ti mu mbage ti Nzapa.

³Ye so mbi hinga, mbi ye ti fa ni na azo so ayeke yongoro kâ; mbi ye ti fa so Nzapa so asara mbi, atënë ti lo ayeke na legeni.

⁴Taa-tënë biani, tënë ti mbi ayeke mvene pepe; taa zo ti hingango ndo laa ayeke na tere ti mo so.

⁵Nzapa ayeke na ngangu mingi, lo yeke baa zo oko tongana mbumbuse ye pepe. Lo yeke na ngangu ahon ndoni, ye so lo leke na be ti lo ti sara, lo ngba gi na ndö ni.

⁶Zo ti sioni, Nzapa ayeke zia lo ti ngba na fini pepe; me lo yeke fâ ngbanga ti azo ti mawa na legeni.

⁷Lo yeke bi le ti lo yamba na azo ti mbirimbiri pepe. Ti agbia, lo yeke zia ala na ndö ti mbata titene ala ngba daa lakue. Me ala yeke ga azo ti baba.

⁸Baa, ala laa aga azo ti kanga so a kanga ala na zingiri; mawa agbu ala gbungo.

⁹Na lege so Nzapa aye ti fa na ala nda ti aye so ala sara, lo ye ti fa siokpari ti ala ndali ti so ala sara baba mingi.

¹⁰Lo zi mê ti ala titene ala ma tënë so lo gboto mê ti ala ndali ni; lo tene na ala ti zia lege ti sioni.

¹¹Tongana ala ma tënë si ala ma yanga ti Nzapa, fade gigi ti ala ayeke hunzi nzoni, ala yeke wara ngia na ya ti angu so ala yeke ngba na fini.

¹²Me tongana ala ma ni pepe, ala yeke mu lege so ague na ndo ti akuâ. Ala yeke kui, me ala hinga li ti ala daa pepe.

¹³Âdu ti azo ti sioni, ala ngba ti sara ngonzo; tongana Nzapa akanga ala na zingiri, ala yeke dekongo na lo pepe titene lo mu maboko na ala.

¹⁴Ala ngba maseka si ala kui, fini ti ala ahunzi na popo ti azo ti sarango ye ti ndumba ndali ti anzapa nde.

¹⁵Me Nzapa ayeke soo zo ti mawa na lege ti ye ti mawa so asi na lo; na lege ti ye ti ngangu, lo yeke zi mê ti lo ti ma ndo.

¹⁶Job, ando, Nzapa abata mo si ye ti ngangu asi na mo pepe. Mo yeke lani na aye gbani gbani; anzoni kobe asi singo na ndö ti meza ti mo.

¹⁷Me a fâ ngbanga na li ti mo tongana ti zo ti sioni; ngbanga so a de na li ti mo ayeke sanze pepe.

¹⁸Zia lege na sioni ngonzo ti pusu mo ti sara ye kirikiri pepe! Mo baa ti mo, mo tene, mo lingbi ti pete goro na Nzapa?

¹⁹Amosoro ti mo, gba ti lôro ti mo na ngangu so kue mo yeke sara alingbi oko pepe.

²⁰Ataa bi so fade a yeke sara si azo kue ahon, mo zia be ti mo na ndö ni pepe.

²¹Sara hange si mo kiri na mbage ti ye ti kirikiri pepe. Ndali ni, ye ti ngangu asi na mo.

²²Biani, Nzapa ayeke kota na lege ti ngangu ti lo. Zo wa laa alingbi ti fa ye tongana lo?

²³Zo wa laa ahunda na lo ti fa peko ti dutingo ti lo? Zo wa laa atene na lo: “Mo sara sioni”?

²⁴Dabe ti mo ti sepela lo ndali ti aye so lo sara. Ndali ti aye ni so laa azo ayeke he bia ti gonda na lo.

²⁵Azo kue alingbi ti baa aye ni; ala yeke baa ni yongoro kâ.

²⁶Biani, Nzapa ayeke kota, me e hinga li ti e daa pepe; e lingbi ti diko wungo ti ngu ti lo pepe.

²⁷Lo yeke gboto angu ti pere na mbage ti lo, lo yeke sara si aga mbinda, akiri aga ngu-Nzapa si ayeke pika.

²⁸Mbinda ni ayeke kangbi ngu-Nzapa ni si ayeke pika na ndö ti azo kue.

²⁹Zo wa laa alingbi ti hinga lege so ambinda ayeke hon na ni? Lege so bekpa ayeke sungba na ni na le ti nduzu?

³⁰Biani, Nzapa atokua awâ ti bekpa na ndö ti ambinda; lo kanga ndö ti ngbonda ti kota ngu-ingo.

³¹Na lege ti aye so laa lo yeke fâ ngbanga ti azo, lo yeke mu kobe gbani gbani na azo.

³²Lo honde wâ ti bekpa na ya ti maboko ti lo si lo yeke mu yanga na wâ ni, lo fa ndo so lo ye titene ati daa.

³³Bekpa ti lo ayeke fa gango ti lo, ataa anyama ahinga atene, lo ga nduru ti si.