Read La Bible en Sango courant – Mbeti ti Nzapa Job 40 Bible Online

Job 40 - La Bible en Sango courant – Mbeti ti Nzapa bible

Job 40

¹*KOTA GBIA akiri amu tënë si lo tene na Job:

²Mo so mo yeke ke tënë na Nzapa so ngangu ti lo ahon angangu kue so, mo kpa ti gi tënë na lo? Mo so mo yeke *bingbi tënë na Nzapa so, mo yeke na mbeni tënë ti kiri na ni?

³Tongaso Job akiri tënë na KOTA GBIA, atene:

⁴Mbi yeke ti mbi ye oko pepe. Tënë ti nyen laa mbi lingbi ti kiri ni na mo? Tënë ahunzi na yanga ti mbi awe.

⁵Mbi tene tënë fade awe, mbi yeke kiri tënë pepe; mbi tene tënë mingi awe, fadeso, mbi kai awe.

⁶Na ya ti ngangu pupu, *KOTA GBIA akiri tënë na Job, atene:

⁷Mo leke tere ti mo, luti tongana koli! Mbi yeke hunda mo na atënë, fade mo kiri peko ni na mbi.

⁸Mo ye biani ti fa so mbi fâ ngbanga na legeni pepe? Mo ye ti fa so mbi sara sioni si mo laa mo sara nzoni?

⁹Ngangu ti maboko ti mo alingbi na ti mbi Nzapa? Go ti mo atoto alingbi na sungbango ti bekpa ti mbi?

¹⁰Tongana ye ni ayeke tongaso, kanga nengo ti gbia nga na gonda na tere ti mo tongana ye ti pendere; yu pendere na zango ndo na tere ti mo tongana bongo.

¹¹Tuku sioni ngonzo ti mo na ndö ti azo; baa azo ti baba kue, mo zia ala na kete ndo!

¹²Baa azo ti baba kue, mo sara si ala ba bango na sese. Mo nika azo ti sioni biaku.

¹³Mo honde ala kue legeoko na ya ti sese; kanga ala na ya ti sururu.

¹⁴Tongaso, fade mbi wani, mbi yeke he bia ti gonda na mo, ngbanga ti so ngangu ti mo asara si mo so benda.

¹⁵Baa Behemot so nzoni; mbi sara lo tongana ti so mbi sara mo; lo yeke te pere tongana bagara.

¹⁶Ngangu ti lo ayeke na ngbonda ti lo, ngangu ti lo ayeke na nyama ti ya ti lo.

¹⁷Damba ti lo akpengba tongana keke ti sedre; akamba ti gere ti lo ahon na ndö ti tere, na ndö ti tere.

¹⁸Abio ti tere ti lo akpengba tongana bengba wen; abio ti kate ti lo akpa ngbongboro wen.

¹⁹Nyama ni ayeke na popo ti akota ye so mbi sara. Me gi mbi oko so mbi sara lo laa, mbi yeke na ngangu ti hon ndö ti lo.

²⁰Ahoto ayeke mu na lo pere ti tengo ni, ahoto so anyama ti ngonda ayeke sara ngia na ndö ni.

²¹Lo yeke lango na gbe ti akete keke, lo yeke honde tere ti lo na popo ti asosongo, na ndo so ngu ayeke daa.

²²Lo yeke bata tere ti lo na gbe ti de ti akete keke; akeke ti yanga ti ngu angoro lo.

²³Tongana ngu asuku mingi, lo yeke gi be ti lo pepe. Ataa ngu ti Jourdain asuku ngbii asi na yanga ti lo, lo yeke duti kpoo.

²⁴Tongana le ti lo angba na zingo ni, zo wa laa alingbi ti gbu lo? Zo wa laa alingbi ti gbu lo ti koro du na hon ti lo?

²⁵Fade mo yeke bi yango ti gbu na Leviatan tongana ti so mo yeke gbu susu? Mo yeke kanga kamba na yanga ti lo?

²⁶Mo lingbi ti yoro mbeni keke ti sosongo na hon ti lo? Wala mo koro ngbangba ti lo na mbeni *kongi?

²⁷Mo baa ti mo, mo tene, lo yeke voro tere ti lo titene mo zi lo? Lo yeke tene anzerengo tënë na mo?

²⁸Mo na lo ayeke ga ambuki titene lo ga ngbaa ti mo lakue?

²⁹Mo yeke sara ngia na lo tongana ti so mo yeke sara ngia na kete kete ndeke? Mo yeke kanga lo titene amolenge ti mo ti wali asara ngia na lo?

³⁰Azo ti gingo susu ayeke bongbi tere ti ka lo? Ala yeke kangbi ya ti lo na popo ti gba ti azo ti dengo buze?

³¹Mo lingbi ti kpo poro ti tere ti lo na ale ti kokora gbani gbani, wala ti koro li ti lo na likongo?

³²Zia maboko na ndö ti lo, e baa! Mo yeke girisa mara ti bira so laoko pepe! Fade mo yeke tara ti kiri ti sara ni pepe!