Read La Bible en Sango courant – Mbeti ti Nzapa Job 42 Bible Online

Job 42 - La Bible en Sango courant – Mbeti ti Nzapa bible

Job 42

¹Tongaso Job akiri tënë na *KOTA GBIA, atene:

²Mbi hinga so mo lingbi ti sara ye kue; mbeni pialo ti kara mo ayeke daa pepe.

³Mo tene, mbi tene tënë kirikiri, mbi sara si tënë so mo leke na be ti mo, le ni avuko. Andaa mbi hinga nda ti tënë ni pepe. Mbi yeda: mbi tene tënë ti ye so nda ni alinda ngangu, akara mbi si mbi hinga pepe.

⁴Mo tene na mbi: “Ma mbi si! Zia mbi, mbi tene tënë. Mbi yeke hunda mo na atënë, fade mo yeke kiri peko ni na mbi.”

⁵Kozoni, mbi ma tënë ti mo mango, me fadeso, mbi baa mo na le ti mbi awe.

⁶Ndani laa, be ti mbi aso ndali ti tënë so lani mbi tene. Mbi hinga so tënë ni ayeke na legeni pepe; mbi duti na ya ti fuku ti sese, na ya ti mburu ti wâ.

⁷So *KOTA GBIA atene tënë so na Job awe, lo tene na Elifaz, zo ti kodro ti Teman, atene: “Ngonzo ti mbi ti wâ alondo na tere ti mo nga na tere ti amba ti mo use, ngbanga ti so ala tene taa-tënë na ndö ti mbi pepe; Job, zo ti kua ti mbi laa atene taa-tënë.

⁸Fadeso, ala mu akoli-bagara mbarambara, akoli-taba mbarambara, ala gue, awara Job, zo ti kua ti mbi. Ala mu anyama ni na *sandaga so a yeke gbi kue na wâ ndali ti ala wani. Fade Job ayeke sambela ndali ti ala, mbi yeke yeda na sambela ti lo. Tongaso, mbi yeke sara na ala pepe alingbi na ye ti buba so ala sara; ala tene taa-tënë na ndö ti mbi pepe; gi Job, zo ti kua ti mbi laa atene taa-tënë.”

⁹Elifaz, zo ti kodro ti Teman, Bildad, zo ti kodro ti Shuha nga na Sofar, zo ti kodro ti Naama, ague, asara ye alingbi na yanga so KOTA GBIA amu na ala; KOTA GBIA ayeda na sambela ti Job na nzoni be.

¹⁰Na ngoi so Job ayeke sambela ndali ti amba ti lo, KOTA GBIA akiri na Job na kozo ndo ti lo. Aye so kue lo yeke na ni kozo, KOTA GBIA akiri amu na lo fani use.

¹¹A-ita ti lo ti koli, a-ita ti lo ti wali nga na azo so ahinga lo kozoni, ala kue aga ti baa lo. Ala te kobe na ndo ti lo, ala fa nzoni be ti ala na lo, ala de be ti lo ndali ti aye ti vundu so Nzapa asara si aga na ndö ti lo. Na pekoni, zo oko oko amu na lo kadoo ti kota le ti nginza oko nga na *kati oko so a sara na lôro.

¹²Na ya ti angu ti peko so, KOTA GBIA asara tufa na ndö ti Job ahon angu ti kozo. Job awara ataba saki baleoko na osio, *azambala saki omene, abagara ti fango na yaka saki use nga na amama ti lele saki oko.

¹³Lo kiri lo du amolenge-koli mbarambara nga na amolenge-wali ota.

¹⁴Lo di iri ti kozo molenge-wali ni Yemima, ti use ni Kesia, ti ota ni Keren-Hapuk

¹⁵Na ya ti kodro ni kue, ambeni wali so apendere tongana amolenge ti Job ayeke daa pepe. Babâ ti ala akangbi aye ti lo na popo ti ala na a-ita ti ala ti koli.

¹⁶Na pekoni, Job aduti na fini ngu ngbangbo oko na baleosio; lo baa amolenge ti lo nga na amolenge ti amolenge ti lo ngbii asi na osio molongo ti ala.

¹⁷Job aga mbakoro, lo te gigi alingbi na lo si lo kui.