Read La Bible en Sango courant – Mbeti ti Nzapa Job 8 Bible Online

Job 8 - La Bible en Sango courant – Mbeti ti Nzapa bible

Job 8

¹Tongaso, Bildad, zo ti kodro ti Shuha amu tënë si lo tene:

²Atënë so mo yeke tene so, mo yeke ngba ti tene ni ngbii asi lawa? Atënë ti yanga ti mo so ayeke tongana kota pupu ayeke ngba ngbii asi lawa?

³Nzapa ayeke sanze lege ti fango ngbanga? Lo so ngangu ti lo ahon angangu kue so, lo yeke sara si ye so ayeke mbirimbiri aga ye ti kirikiri?

⁴Tongana amolenge ti mo asara siokpari so ake lo, lo sara si siokpari ti ala akiri na li ti ala wani.

⁵Ti mo, tongana mo gi Nzapa, tongana mo voro tere ti mo na lo so ngangu ti lo ahon angangu kue,

⁶tongana mo yeke mbirimbiri si mo sara ye na legeni, fade lo yeke baa ndo na ndö ti mo si lo yeke zia mo na ndo so alingbi na sarango ye ti mbirimbiri ti mo.

⁷Aye so kue mo wara kozo, fade mo yeke baa ni tongana kete ye tongana mo yeke baa aye so mo yeke wara ande.

⁸Mo hunda azo so ayeke kozo ti e; mo dingi mê ti mo, mo ma ye so akotara ti ala asara ando.

⁹Biani, a du e biri biri, e hinga ye oko pepe; fini ti e na ndö ti sese so ayeke hon hio tongana gbe ti de.

¹⁰Me azo so ayeke kozo ti e ayeke fa ye na mo, ala yeke tene na mo *amato so be ti ala agirisa na ni pepe:

¹¹“Ndo so ngu ayeke daa pepe so, apere ti ya ti ngu ayeke sigigi daa? Tongana ngu ayeke daa pepe, fade sosongo akono?

¹²So akongo angba ti sigigi, so ade afâ ala pepe, sosongo ni ayeke hole kozoni na ambeni pere!”

¹³Baa ye so ayeke si na azo so agirisa Nzapa laa; ye so zo ti sioni azia be ti lo ti ku ayeke hon tongaso.

¹⁴Ye so lo zia be ti lo daa, ya ni afâ awe; ye so lo luti na ndö ni ayeke kamba ti tere.

¹⁵Tongana lo yeke gbu dere ti da ti lo ti luti, da ni ayingi; tongana lo yeke gbu ni ngangu, da ni atuku na sese, gburrr.

¹⁶Lo yeke tongana keke so ngu ti ya ni asi singo na gbe ti lâ; amaboko ti lo agbara na ndö ti yaka.

¹⁷Agunda ti lo ahon na ndö ti tere, na ndö ti tere na popo ti atêne; keke ni ali ngbii na gbe ti kota têne.

¹⁸Me tongana a gboto lo na ndo so lo yeke daa kozoni, fade ndo ni atene: “Mbi baa mo laoko pepe.”

¹⁹Lege so ngia ti azo ni ayeke hunzi na ni laa. Ndo so lani lo yeke daa, fade mbeni keke nde ayeke sigigi daa.

²⁰Zo so ayeke sara ye na legeni, Nzapa ayeke ke lo pepe. Azo ti sarango sioni, lo yeke mu maboko na ala pepe.

²¹Lo yeke sara si ngia asi singo na yanga ti mo; lo yeke sara si mo yeke dekongo na ngia.

²²Fade kamene ayeke gbu le ti awato ti mo; azo ti sioni ayeke daa mbeni pepe.