Read La Bible en Sango courant – Mbeti ti Nzapa Job 9 Bible Online

Job 9 - La Bible en Sango courant – Mbeti ti Nzapa bible

Job 9

¹Job amu tënë si lo tene:

²Taa-tënë, mbi hinga so ye ni ayeke tongaso. Zo alingbi ti hon ndö ti Nzapa na le ti ngbanga? Oko pepe!

³Tongana zo aye ti gi tënë na Nzapa, zo ni atene tënë saki oko, Nzapa akiri tënë oko pepe.

⁴Ndara ti Nzapa ayeke kota mingi, ngangu ti lo ayeke mingi; zo wa laa alingbi ti gbu le ni na lo si lo wara sioni pepe, zo wa?

⁵Lo yeke zi ahoto ti zia ala na mbeni ndo nde, ahoto ni ahinga ye oko daa pepe; na ya ti ngonzo ti lo, lo yeke kinda ahoto ni.

⁶Lo yeke sara si gunda ti sese ayingi, agere ti sese ni ayeke do dongo.

⁷Tongana lo mu yanga na lâ, lâ ayeke sigigi pepe; lo yeke kanga lege na atongoro ti su.

⁸Gi lo oko, lo gbara le ti nduzu, lo tambula na ndö ti *amapo ti kota ngu-ingo.

⁹Lo sara bongbi ti atongoro: Kota Urse, Orion, Pleyade nga na Bongbi ti atongoro ti mbage ti Mbongo.

¹⁰Lo sara akota ye so zo agi nda ni gbaa; lo sara aye ti kpene so zo alingbi ti diko wungo ni pepe.

¹¹Tongana lo hon nduru na tere ti mbi, mbi yeke baa lo pepe; tongana lo hon ti gue, mbi yeke hinga pepe.

¹²Tongana lo gbu ye na ngangu, zo wa laa alingbi ti tene na lo: “Kiri na ni”, zo wa? Zo wa laa alingbi ti tene na lo: “Nyen laa mo sara so”?

¹³Tongana Nzapa asara ngonzo, ngonzo ti lo ayeke kai pepe. Asioni nyama ti ngu, aye so amu peko ti Rahab ati na gbe ti Nzapa.

¹⁴Mbi ni, mbi lingbi ti kiri tënë na lo? Tënë wa laa mbi lingbi ti kiri ni na lo?

¹⁵Ataa mbi yeke fade zo ti mbirimbiri, mbi lingbi ti kiri tënë tongana nyen? Gi ye oko laa angba na mbi: mbi voro tere ti mbi na wafango-ngbanga ti mbi titene lo baa mawa ti mbi.

¹⁶Ataa mbi iri ndo si lo kiri tënë na mbi, mbi hinga pepe, lo yeda ti ma mbi laa?

¹⁷Gi ndali ti kete kete ye, lo yeke nika mbi; lo zia gba ti ka na tere ti mbi senge senge.

¹⁸Lo yeke zia lege kete na mbi pepe titene mbi wu pupu; me lo yeke sara si sengo ye asi singo na be ti mbi.

¹⁹Alingbi mbi sara ngangu na lo si? Ngangu ti lo ahon ti mbi mingi. Fade mbi gue na ngbanga? Zo wa laa ayeke iri mbi na le ti ngbanga ni ti gbu koko ti mbi, zo wa?

²⁰Ataa mbi yeke mbirimbiri, fade tënë ti yanga ti mbi ayeke fâ ngbanga na li ti mbi. Ataa mbi sara sioni pepe, fade a tene, mbi sara sioni.

²¹Mbeni tënë ayeke na li ti mbi pepe? Mbi wani, mbi hinga pepe. Nzara ti ngbango na fini asigigi na ya ti mbi awe.

²²Ye kue gi legeoko, ndani laa mbi tene: zo so tënë ayeke na li ti lo pepe, na zo so asara sioni, Nzapa ayeke nika ala kue.

²³Tongana mbeni kpale ati gba-gburrr si afâ azo, azo so asara sioni pepe, Nzapa ayeke he akpale ti ala ni hengo.

²⁴Tongana a zia sese na maboko ti azo ti sarango sioni, Nzapa ayeke kanga le ti awafango-ngbanga ni. Tongana lo laa lo sara pepe, zo wa laa asara?

²⁵Alango ti fini ti mbi ahon hio hio, ahon awanguru so ayeke kpe loro; alango ni akpe ahon, ala baa nzoni pepe.

²⁶Alango ni amu loro tongana akete ngo so ayeke mu loro na le ti ngu; alango ni amu loro tongana *ngoalo so ayeke ti na ndö ti kobe ti lo.

²⁷Mbi tene na be ti mbi: Ayeke nzoni mbi gi be ti mbi pepe, mbi kanga ndö ti le ti mbi pepe, mbi duti na ngia!

²⁸Me apasi ti mbi kue angba ti zia mbeto na be ti mbi. Nzapa, mbi hinga so fade mo yeke zi tënë na li ti mbi pepe.

²⁹Ti mo, alingbi tënë ayeke na li ti mbi si! Tongana ye ni ayeke tongaso, ngbanga ti nyen si mo yeke sara pasi na mbi senge senge?

³⁰Ataa mbi sukula tere ti mbi na savon, mbi sukula maboko ti mbi na mokpakpa,

³¹fade mo yeke yoro mbi na ya ti potopoto si taa bongo ti mbi ayeke ke mbi.

³²Nzapa ayeke zo tongana mbi pepe titene mbi kiri tënë na lo, titene mbi na lo, e gue legeoko na da ti ngbanga.

³³Tongana mbeni zo ti lekengo tënë ayeke fade na popo ti e titene lo zia maboko ti lo na ndö ti e use kue,

³⁴ka lo zi zaza so Nzapa ayeke pika na mbi si kota mbeto ti lo ahon ndö ti mbi pepe.

³⁵Tongaso, ka mbi tene tënë na lo na mbeto pepe. Me ye ni ayeke tongaso pepe, mbi yeke gi mbi oko.