Read La Bible en Sango courant – Mbeti ti Nzapa Abia (Psaumes) 119 Bible Online

Abia (Psaumes) 119 - La Bible en Sango courant – Mbeti ti Nzapa bible

Abia (Psaumes) 119

¹Ti ala nzoni, azo so tambula ti ala alingbi kue si sarango ye ti ala alingbi na *Ndia ti *KOTA GBIA!

²Ti ala nzoni, azo so asara aye so lo hunda na ala si ala mu be ti ala kue ti gi lo!

³Ala sara ye ti sioni pepe, ala tambula gi na lege so lo fa na ala.

⁴KOTA GBIA, mo laa mo mu andia ti mo na azo titene ala bata ni nzoni.

⁵Ayeke nzoni tambula ti mbi ague mbirimbiri titene mbi sara ye alingbi na ambela ti mo.

⁶Tongaso, fade kamene ayeke sara mbi pepe tongana mbi baa atënë ti ndia ti mo kue.

⁷Fade mbi yeke mu singila na mo na be ti mbi kue tongana mbi manda ti hinga fango ngbanga ti mo ti mbirimbiri.

⁸Mbi yeke sara ye alingbi na ambela ti mo; mo zia mbi biani biani pepe!

⁹Fade maseka ayeke sara tongana nyen ti bata lege ti lo mbirimbiri? — Na lege ti sarango ye alingbi na tënë ti mo.

¹⁰Mbi gi mo na be ti mbi kue; sara si mbi hon nde na atënë ti ndia ti mo pepe.

¹¹Mbi bata atënë ti yanga ti mo na be ti mbi, tongaso si mbi sara siokpari pepe ti ke mo.

¹²KOTA GBIA, mbi mu singila na mo! Fa na mbi ambela ti mo.

¹³Mbi diko na yanga ti mbi atënë ti ngbanga so kue mo fâ.

¹⁴Ngia so mbi yeke na ni tongana mbi sara aye so mo hunda na mbi ahon ngia so mbi yeke na ni tongana mbi wara gba ti mosoro.

¹⁵Mbi yeke gbu li ti mbi na ndö ti andia ti mo si le ti mbi ayeke ngba na ndö ti lege so mo ye mbi mu ni.

¹⁶Ambela ti mo anzere na mbi mingi, fade mbi yeke girisa tënë ti mo pepe.

¹⁷Sara nzoni na mbi, zo ti kua ti mo, titene mbi ngba na fini si mbi bata tënë ti mo.

¹⁸Zi le ti mbi si mbi baa aye ti kpene so ayeke na ya ti ndia ti mo.

¹⁹Mbi yeke wande na sese so, honde atënë ti ndia ti mo na mbi pepe.

²⁰Na ngoi kue, nzara ti atënë ti fango ngbanga ti mo asara mbi mingi.

²¹Mo suku na azo ti baba so a deba ala awe, ala so azia lege ti atënë ti ndia ti mo si ala yeke mu mbeni lege nde so.

²²Azo azonga mbi, ala baa mbi tongana mbumbuse ye; zi mbi na ya ni, ngbanga ti so mbi sara aye so kue mo hunda na mbi.

²³Ataa amakonzi aduti ti leke tënë na tere ti mbi, mbi zo ti kua ti mo, mbi yeke gbu li ti mbi na ndö ti ambela ti mo.

²⁴Aye so mo hunda na mbi anzere na mbi mingi, ni laa ayeke mu wango na mbi.

²⁵Mbi lango taa na ya ti fuku ti sese; sara si mbi kiri mbi duti na fini alingbi na tënë ti mo.

²⁶Mbi fa lege ti dutingo ti mbi na mo si mo kiri tënë na mbi; fa na mbi ambela ti mo.

²⁷Sara si mbi ma ya ti andia ti mo, tongaso si mbi gbu li ti mbi na ndö ti aye ti kpene ti mo.

²⁸Vundu ti be ti mbi asara si ngu ti le ti mbi ayuru; yo mbi na nduzu alingbi na tënë ti mo.

²⁹Bata mbi si mbi mu lege ti tenengo mvene pepe; na lege ti nzoni be ti mo, fa na mbi ndia ti mo.

³⁰Mbi soro ti mu lege ti taa-tënë; mbi yeke sara ye alingbi na atënë ti fango ngbanga ti mo.

³¹Mbi mu be ti mbi kue ti sara aye so mo hunda na mbi; KOTA GBIA, sara si kamene agbu mbi pepe.

³²Mbi yeke kpe loro na lege so atënë ti ndia ti mo afa, ngbanga ti so mo sara si be ti mbi ade.

³³KOTA GBIA, fa na mbi lege ti ambela ti mo si mbi bata ni ngbii asi na ndani.

³⁴Sara si mbi hinga ndo si mbi sara ye alingbi na ndia ti mo; mbi mu be ti mbi kue ti sara ye alingbi na ni.

³⁵Sara si mbi mu lege ti atënë ti ndia ti mo; ye so anzere na be ti mbi laa.

³⁶Sara si mbi gi ti wara ye gi ndali ti mbi wani pepe, me mbi gi lege ti sara aye so mo hunda.

³⁷Sara si le ti mbi angba na ndö ti buba ye pepe, sara si mbi kiri mbi duti na fini ti mu lege so mo fa.

³⁸Ye so mo mu yanga ti sara ni na mbi, zo ti kua ti mo, sara ni si fade azo akpe mbeto ti mo.

³⁹Zonga so mbeto ni ayeke sara mbi so, pusu ni yongoro na tere ti mbi, ngbanga ti so atënë ti fango ngbanga ti mo ayeke nzoni.

⁴⁰Biani, nzara ti andia ti mo asara mbi mingi; sara si mbi kiri mbi duti na fini na lege ti mbirimbiri ti mo.

⁴¹KOTA GBIA, sara si nzoni be ti mo aga na ndö ti mbi; soo mbi alingbi na tënë ti yanga ti mo.

⁴²Tongaso si mbi yeke na tënë ti tenengo ni na zo so ayeke zonga mbi, ngbanga ti so mbi zia be ti mbi na ndö ti tënë ti mo.

⁴³Zi taa-tënë kue na yanga ti mbi pepe, ngbanga ti so mbi yeke ku atënë ti fango ngbanga ti mo.

⁴⁴Fade mbi yeke bata ndia ti mo lakue lakue, kpu na kpu.

⁴⁵Mbeni ye ti kangango lege na mbi ayeke daa pepe, ngbanga ti so mbi yeke gi andia ti mo.

⁴⁶Na dawa ti agbia, mbi yeke tene tënë ti aye so mo hunda; kamene ayeke sara mbi pepe.

⁴⁷Mbi yeke wara ngia gi na lege ti atënë ti ndia ti mo so mbi ye mingi.

⁴⁸Mbi yo maboko ti mbi na nduzu na mbage ti atënë ti ndia ti mo so mbi ye mingi; mbi yeke gbu li ti mbi na ndö ti ambela ti mo.

⁴⁹Dabe ti mo na tënë so mo tene na mbi, zo ti kua ti mo; mbi zia be ti mbi ti ku tënë ni.

⁵⁰Ye so ayeke mu na mbi ngangu na ya ti ye ti mawa so asi na mbi laa: yanga so mo mu na mbi laa asara si mbi duti na fini.

⁵¹Azo ti baba ahe mbi na ngia ahon ndoni, me mbi zia lege ti ndia ti mo pepe.

⁵²KOTA GBIA, mbi dabe ti mbi na atënë ti fango ngbanga ti mo ti ando, ni laa asara si be ti mbi ade.

⁵³Ngonzo agbu mbi ngangu mingi na tere ti azo ti sioni so azia lege ti ndia ti mo.

⁵⁴Ambela ti mo aga tongana abia ti mbi, na ngoi so kue mbi yeke tongana gene na ndö ti sese so.

⁵⁵KOTA GBIA, na bi, mbi yeke dabe ti mbi na mo titene mbi sara ye alingbi na ndia ti mo.

⁵⁶Ye so ayeke ti mbi wani ayeke titene mbi sara ye alingbi na andia ti mo.

⁵⁷KOTA GBIA, mbi tene: ye so aga ye ti mbi, ayeke titene mbi sara ye alingbi na atënë ti mo.

⁵⁸Na be ti mbi kue, mbi hunda mo ti sara nzoni na mbi; baa mawa ti mbi alingbi na yanga so mo mu.

⁵⁹Mbi gbu li ti mbi na ndö ti tambula ti mbi si mbi kiri na ndö ti ye so mo hunda na mbi.

⁶⁰Titene mbi ku kungo pepe, mbi hon daa hio ti bata atënë ti ndia ti mo.

⁶¹Azo ti sioni agbu mbi na gbanda ti ala, me mbi girisa ndia ti mo pepe.

⁶²Na be ti bi, mbi yeke londo ti mu singila na mo ngbanga ti fango ngbanga ti mo ti mbirimbiri.

⁶³Mbi yeke sara songo na amba ti mbi so kue akpe mbeto ti mo, ala so asara ye alingbi na andia ti mo.

⁶⁴KOTA GBIA, nzoni be ti mo asi singo na ndö ti sese so; fa na mbi ambela ti mo.

⁶⁵KOTA GBIA, mo sara nzoni na mbi, zo ti kua ti mo, alingbi na tënë ti mo.

⁶⁶Fa na mbi lege ti hinga mbirimbiri nda ti aye, mu na mbi hingango ndo, ngbanga ti so mbi zia be ti mbi na ndö ti atënë ti ndia ti mo.

⁶⁷Kozo titene mbi baa pasi, mbi yeke gue ando kirikiri; me fadeso mbi yeke sara ye na lege ti tënë ti yanga ti mo.

⁶⁸Mo yeke nzoni si mo yeke sara nzoni na azo; fa na mbi ambela ti mo.

⁶⁹Azo ti baba abuba iri ti mbi na atënë ti mvene ti ala; me ti mbi, na be ti mbi kue, mbi yeke sara ye alingbi na andia ti mo.

⁷⁰Tënë ti ye oko agbu be ti azo ni pepe; me ti mbi, ndia ti mo anzere na mbi mingi.

⁷¹Pasi so asi na mbi, asara nzoni na mbi, tongaso si mbi manda ambela ti mo.

⁷²Ndia so alondo na yanga ti mo ayeke nzoni na mbi ahon lôro na nginza kutu kutu.

⁷³Maboko ti mo asara mbi si agbu mbi na nduzu; sara si mbi hinga ndo si mbi manda atënë ti ndia ti mo.

⁷⁴Azo so akpe mbeto ti mo, be ti ala anzere na bango mbi, ngbanga ti so mbi zia be ti mbi ti ku tënë ti mo.

⁷⁵KOTA GBIA, mbi hinga, mbi tene, atënë ti fango ngbanga ti mo ayeke mbirimbiri, pasi so mo sara na mbi ayeke na legeni.

⁷⁶Sara si nzoni be ti mo azi mawa na be ti mbi, alingbi na yanga so mo mu na mbi, zo ti kua ti mo.

⁷⁷Fa na mbi so mo yeke baa mawa ti mbi, tongaso si mbi ngba na fini, ngbanga ti so ndia ti mo anzere na mbi mingi.

⁷⁸Sara si kamene agbu azo ti baba so ayeke sara pasi na mbi senge senge! Ti mbi, mbi yeke gbu li ti mbi na ndö ti andia ti mo.

⁷⁹Ayeke nzoni azo so ayeke kpe mbeto ti mo aga na mbi, fade ala yeke hinga aye so mo hunda na azo!

⁸⁰Na be ti mbi kue, ayeke nzoni mbi sara ye alingbi na ambela ti mo si kamene asara mbi pepe.

⁸¹Mbi woko kue na kungo mo titene mo ga, mo soo mbi; mbi zia be ti mbi ti ku tënë ti mo.

⁸²Le ti mbi awoko na kungo tënë ti yanga ti mo si mbi tene: “Lawa laa mo yeke sara titene be ti mbi ade?”

⁸³Mbi yeke tongana bozo so a sara na poro ti nyama si azia na ndö ti wâ titene ahole, me mbi girisa ambela ti mo pepe.

⁸⁴Alango ti mbi, zo ti kua ti mo, angba oke? Lawa laa mo yeke fâ ande ngbanga na ndö ti azo so ayeke sara ngangu na mbi so?

⁸⁵Azo ti baba azi du titene mbi ti daa; ye so ala sara so alingbi na ndia ti mo pepe.

⁸⁶Atënë ti ndia ti mo kue ayeke taa-tënë; azo ayeke tumba peko ti mbi gi senge senge, mu na mbi maboko.

⁸⁷Mbi woko kue, angba gi kete ka a kinda mbi na sese; me mbi zia andia ti mo pepe.

⁸⁸Sara si mbi kiri mbi duti na fini alingbi na nzoni be ti mo, tongaso si mbi yeke bata aye so mo wani, mo hunda na mbi ti sarango ni.

⁸⁹KOTA GBIA, tënë ti mo aluti ngangu na yayu kpu na kpu.

⁹⁰Mo yeke bata tënë ti yanga ti mo ngu na ngu; mo lu gere ti sese si angba ti luti ngangu.

⁹¹Ndali ti atënë ti fango ngbanga ti mo, aye so mo sara angba ngbii asi laso. Biani, dunia kue ayeke sara kua na mo.

⁹²Tongana ndia ti mo anzere fade na mbi mingi pepe, ka mbi kui na mawa awe.

⁹³Mbi yeke girisa andia ti mo laoko pepe, ngbanga ti so na lege ti ala, mo sara si mbi duti na fini.

⁹⁴Mbi yeke zo ti mo, soo mbi, ngbanga ti so mbi gi lege ti andia ti mo.

⁹⁵Azo ti sioni azia be ti ala ti ku ti fâ mbi, me mbi duti kpoo ti ma ya ti aye so mo hunda na mbi.

⁹⁶Aye so kue ayeke nzoni, mbi baa so nzoni ni ayeke gue ngbii ahunzi, me atënë ti ndia ti mo ayeke si na ndani pepe.

⁹⁷Mbi ye ndia ti mo mingi! Mbi yeke gbu li ti mbi daa lakue.

⁹⁸Atënë ti ndia ti mo asara si mbi yeke na ndara mbi hon awato ti mbi, atënë ti ndia ni aga ye ti mbi kpu na kpu.

⁹⁹Mbi hinga ndo, mbi hon awafango-ye kue na mbi, ngbanga ti so mbi yeke gbu li ti mbi na ndö ti aye so mo hunda na mbi.

¹⁰⁰Mbi hinga nda ti aye mbi hon akangba kue, ngbanga ti so mbi sara ye alingbi na andia ti mo.

¹⁰¹Mbi kpe alege ti sioni kue, tongaso si mbi sara ye alingbi na tënë ti mo.

¹⁰²Mbi zia peko na atënë ti fango ngbanga ti mo pepe, ngbanga ti so mo laa mo fa ye na mbi.

¹⁰³Atënë ti yanga ti mo anzere na yanga ti mbi mingi, anzere na yanga ti mbi ahon mafuta ti wotoro.

¹⁰⁴Ndali ti andia ti mo, mbi ga zo ti hingango nda ti aye, tongaso si mbi ke alege kue ti mvene.

¹⁰⁵Tënë ti mo ayeke tongana lamba ndali ti gere ti mbi, lumiere so ayeke za na ndö ti lege so mbi yeke hon daa.

¹⁰⁶Mbi deba yanga ti mbi awe si mbi luti na ndö ni, mbi tene: mbi yeke sara ye alingbi na atënë ti fango ngbanga ti mo ti mbirimbiri.

¹⁰⁷KOTA GBIA, mbi baa pasi mingi; sara si mbi kiri mbi duti na fini alingbi na tënë ti mo.

¹⁰⁸KOTA GBIA, yeda na sambela ti mbi so mbi ya na mo tongana *sandaga so; fa na mbi atënë ti fango ngbanga ti mo.

¹⁰⁹Kuâ ayeke gi mbi mbage na mbage kue, me mbi girisa ndia ti mo pepe.

¹¹⁰Azo ti sioni aleke kuku ti gbu na mbi, me mbi hon yongoro na andia ti mo pepe.

¹¹¹Aye so mo hunda na mbi aga ye ti mbi biani biani; aye ni ayeke zia ngia na be ti mbi.

¹¹²Mbi mu be ti mbi kue ti sara ye alingbi na ambela ti mo; ye so mbi yeke wara na peko ni kpu na kpu laa.

¹¹³Mbi ke azo ti be use use, me mbi ye ndia ti mo.

¹¹⁴Mo laa mo yeke ndo ti hondengo tere ti mbi na *vala ti batango mbi; mbi zia be ti mbi ti ku tënë ti mo.

¹¹⁵Ala azo ti sarango sioni, ala hon yongoro na tere ti mbi, tongaso si fade mbi yeke sara ye alingbi na atënë ti ndia ti Nzapa ti mbi.

¹¹⁶Gbu maboko ti mbi alingbi na tënë ti yanga ti mo si mbi ngba na fini; ndali ti so mbi zia be ti mbi ti ku mo, sara si kamene agbu mbi pepe.

¹¹⁷Gbu mbi na nduzu si mbi soo kuâ, tongaso fade le ti mbi angba na ndö ti ambela ti mo.

¹¹⁸Azo so kue azia lege ti ambela ti mo, mo ke ala, ngbanga ti so aye ti mayere ti ala ayeke gi mvene.

¹¹⁹Mo zi azo ti sioni kue ti sese ti tuku ala tongana ti so a yeke tuku azende; mbi ye aye so mo hunda.

¹²⁰Tere ti mbi kue ayeke do na mbeto na dawa ti mo, mbeto ti atënë ti fango ngbanga ti mo asara mbi.

¹²¹Mbi sara ye alingbi na fango ngbanga ti mbirimbiri; azo so ayeke sara ngangu na mbi so, mo zia mbi na maboko ti ala pepe.

¹²²Bata lege ti nzoni duti ti zo ti kua ti mo; ayeke nzoni azo ti baba asara ngangu na mbi pepe!

¹²³Le ti mbi awoko na kungo mo titene mo soo mbi na kuâ, nga na kungo atënë ti yanga ti mo so ayeke mbirimbiri.

¹²⁴Sara ye na mbi, zo ti kua ti mo alingbi na nzoni be ti mo; fa na mbi ambela ti mo.

¹²⁵Mbi yeke zo ti kua ti mo, sara si mbi hinga ndo, tongaso si mbi hinga aye so mo hunda na mbi.

¹²⁶KOTA GBIA, ngoi titene mo sara kua ti mo alingbi awe, ngbanga ti so azo ake ndia ti mo.

¹²⁷Mbi ye atënë ti ndia ti mo ahon lôro, ataa lôro ti nzoni ni.

¹²⁸Mbi baa so andia ti mo ayeke mbirimbiri, be ti mbi ake alege kue ti mvene.

¹²⁹Aye so mo hunda na azo, mbi baa ni tongana aye ti kpene, nilaa mbi yeke sara ye alingbi na ni.

¹³⁰Gingo nda ti atënë ti mo ayeke zi le ti zo, ayeke sara si senge zo ahinga nda ti aye.

¹³¹Tongana ti so zo ayeke na nzara si lo zi yanga ti lo kota, nzara ti atënë ti ndia ti mo asara mbi mingi.

¹³²Turne tere ti mo na mbage ti mbi, baa mawa ti mbi, tongana ti so mo yeke sara ka na azo so aye mo.

¹³³Na lege ti tënë ti yanga ti mo, sara si mbi do sese ngangu; mo zia mbeni ye ti sioni ahon ndö ti mbi pepe.

¹³⁴Zi mbi na maboko ti azo so ayeke sara ngangu na mbi, tongaso si mbi sara ye alingbi na andia ti mo.

¹³⁵Baa mbi zo ti kua ti mo na nzoni le; fa na mbi ambela ti mo.

¹³⁶Ngu ti le ti mbi ayeke sua mingi, ngbanga ti so azo asara ye alingbi na ndia ti mo pepe.

¹³⁷KOTA GBIA, mo yeke mbirimbiri, atënë ti fango ngbanga ti mo ayeke na legeni.

¹³⁸Aye so mo hunda na azo ayeke mbirimbiri si ayeke taa-tënë biani.

¹³⁹Ngonzo agbi be ti mbi tongana wâ, ngbanga ti so awato ti mbi agirisa atënë ti mo.

¹⁴⁰A tara atënë ti yanga ti mo, mbeni ye ti sioni oko ayeke daa pepe, nilaa mbi zo ti kua ti mo, mbi ye ni mingi.

¹⁴¹Ataa so mbi yeke kete si azo abaa mbi tongana mbumbuse ye, mbi girisa andia ti mo pepe.

¹⁴²Mbirimbiri ti mo ayeke mbirimbiri so ayeke lakue lakue, ndia ti mo ayeke taa-tënë.

¹⁴³Ye ti ngangu asi na mbi si mbeto agbu mbi, me atënë ti ndia ti mo laa anzere na mbi mingi.

¹⁴⁴Aye so mo hunda ayeke mbirimbiri lakue lakue; sara si mbi ga zo ti hingango nda ti aye si fade mbi ngba na fini.

¹⁴⁵KOTA GBIA, mbi iri mo na be ti mbi kue, mo yeda, fade mbi yeke sara ye alingbi na ambela ti mo.

¹⁴⁶Mbi iri mo, soo mbi, fade mbi yeke sara ye alingbi na aye so mo hunda.

¹⁴⁷Kozo titene ndo ahan, mbi iri mo; mbi zia be ti mbi ti ku atënë ti mo.

¹⁴⁸Ade ndo ahan kue pepe, mbi zi le ti mbi ti gbu li ti mbi na ndö ti atënë ti yanga ti mo.

¹⁴⁹Na lege ti nzoni be ti mo, ma mbi; KOTA GBIA, sara si mbi kiri mbi duti na fini alingbi na atënë ti fango ngbanga ti mo.

¹⁵⁰Azo so ayeke tumba peko ti ye ti sioni ayeke ga nduru na mbi; ala yeke yongoro na ndia ti mo.

¹⁵¹Me mo KOTA GBIA, mo yeke nduru na mbi, atënë ti ndia ti mo kue ayeke taa-tënë.

¹⁵²Aye so mo hunda, mbi hinga ngbene ye giriri mbi tene, mo leke ni kpu na kpu.

¹⁵³Baa pasi ti mbi, zi mbi na ya ni, ngbanga ti so mbi girisa ndia ti mo pepe.

¹⁵⁴Gbu koko ti mbi, zi mbi na ya ti tënë alingbi na atënë ti yanga ti mo, tongaso si mbi kiri mbi duti na fini.

¹⁵⁵Ayeke ngangu na azo ti sioni ti soo kuâ, ngbanga ti so ala yeke gi lege ti ambela ti mo pepe.

¹⁵⁶KOTA GBIA, mo yeke baa mawa ti azo mingi; sara si mbi kiri mbi duti na fini alingbi na atënë ti fango ngbanga ti mo.

¹⁵⁷Azo so ayeke tumba peko ti mbi na azo so ayeke sara ngangu na mbi ayeke mingi; me aye so mo hunda na mbi so, mbi zia lege ni pepe.

¹⁵⁸Mbi baa azo so ake mo si be ti mbi aso, ngbanga ti so ala sara ye alingbi na atënë ti yanga ti mo pepe.

¹⁵⁹KOTA GBIA, baa lege so mbi ye na andia ti mo; sara si mbi kiri mbi duti na fini alingbi na nzoni be ti mo.

¹⁶⁰Tënë ti mo na ngbongboro ni kue ayeke taa-tënë, atënë ti fango ngbanga ti mo kue ayeke mbirimbiri si angba lakue lakue.

¹⁶¹Amakonzi asara ngangu na mbi senge senge, me mbi yeke kpe gi mbeto ti atënë ti mo.

¹⁶²Tere ti mbi anzere ndali ti atënë ti yanga ti mo tongana ti zo so agbu ye na peko ti bira.

¹⁶³Mbi ke tënë ti mvene, ayeke sioni mingi na le ti mbi, me ndia ti mo laa mbi ye.

¹⁶⁴Na ya ti lango oko oko, mbi sepela mo fani mbarambara ndali ti fango ngbanga ti mo so ayeke mbirimbiri.

¹⁶⁵Azo so aye ndia ti mo, ala yeke na taa siriri, mbeni ye ti kinda ala ayeke daa pepe.

¹⁶⁶KOTA GBIA, mbi zia be ti mbi ti ku titene mo soo mbi, tongaso si mbi sara ye alingbi na atënë ti ndia ti mo.

¹⁶⁷Mbi sara ye alingbi na aye so mo hunda na mbi; mbi ye aye ni ahon ndoni.

¹⁶⁸Mbi sara ye alingbi na andia ti mo nga na aye so mo hunda na mbi; aye so kue mbi yeke sara, mo baa ni.

¹⁶⁹KOTA GBIA, ayeke nzoni toto ti mbi ague, asi na mo; sara si mbi hinga ndo alingbi na tënë ti mo.

¹⁷⁰Ayeke nzoni demango tere ti mbi ague, asi na mo; zi mbi na ya ti sioni alingbi na atënë ti yanga ti mo.

¹⁷¹Ayeke nzoni yanga ti mbi atene tënë ti sepelango mo, ngbanga ti so mo yeke fa na mbi ambela ti mo!

¹⁷²Ayeke nzoni mbi he bia ndali ti atënë ti yanga ti mo, ngbanga ti so atënë ti ndia ti mo ayeke mbirimbiri.

¹⁷³Ayeke nzoni mo mu na mbi maboko, ngbanga ti so mbi soro andia ti mo.

¹⁷⁴KOTA GBIA, nzara ti be ti mbi ayeke titene mo soo mbi; ndia ti mo anzere na mbi mingi.

¹⁷⁵Ayeke nzoni mbi ngba na fini ti sepela mo; fade atënë ti fango ngbanga ti mo ayeke mu maboko na mbi.

¹⁷⁶Mbi gue kirikiri tongana taba so agirisa; ayeke nzoni mo gi mbi, zo ti kua ti mo, ngbanga ti so mbi girisa atënë ti ndia ti mo pepe.