Read La Bible en Sango courant – Mbeti ti Nzapa Abia (Psaumes) 147 Bible Online

Abia (Psaumes) 147 - La Bible en Sango courant – Mbeti ti Nzapa bible

Abia (Psaumes) 147

¹Aleluya! Hengo bia na Nzapa ti e ayeke nzoni ye mingi, sepelango lo nzoni anzere mingi!

²*KOTA GBIA ayeke leke Jérusalem, lo yeke bongbi azo ti Israel so a gbu ala a gue na ala na kodro wande.

³Azo so be ti ala afâ ka, lo laa lo yeke kai ni, lo yeke kanga ka ti ala.

⁴Lo yeke diko atongoro, lo yeke mu iri na ala oko oko kue.

⁵KOTA GBIA ti e ayeke kota, lo yeke na ngangu mingi; nda ti hingango ye ti lo ayeke daa pepe.

⁶KOTA GBIA ayeke mu asenge zo na nduzu, lo yeke kiri azo ti sioni ngbii asi na sese.

⁷Ala azo, ala he bia na KOTA GBIA ti mu singila na lo; ala pika kundi na Nzapa ti e.

⁸Lo laa lo sara si mbinda amu le ti nduzu kue, lo leke ngu-Nzapa ndali ti sese; lo sara si apere asigigi na ndö ti ahoto.

⁹Lo yeke mu kobe na anyama, nga na amolenge ti *kpakpo na ndembe so ala yeke toto nzara.

¹⁰Lo baa ngangu ti mbarata tongana senge ye, ngangu ti zo ti kpengo loro anzere na be ti lo pepe.

¹¹Me be ti KOTA GBIA anzere na azo so ayeke kpe mbeto ti lo, ala so azia be ti ala ti ku titene lo sara nzoni be na ala.

¹²Jérusalem, gonda KOTA GBIA! *Sion, sepela Nzapa ti mo!

¹³Biani, lo sara si angbongboro wen ti yanga ti gbagba ti mo akiri akpengba; lo sara tufa na ndö ti amolenge ti mo so ayeke na ndo ti mo.

¹⁴Lo mu siriri na sese ti mo, lo mu na mo taa nzoni *ble alingbi na mo.

¹⁵Yanga so lo mu, lo tokua na ndö ti sese, na loro, tënë ti lo ahon.

¹⁶Lo sara si *neze atuku na sese tongana vuru kua ti tere ti taba, lo kangbi ale ti neze ni na ndo kue tongana mburu ti wâ.

¹⁷Lo fâ ya ti *apembe ti bekpa ti lo nduru nduru si lo bi ni. So lo sara si de asara mingi mingi so, zo wa laa alingbi ti gbu le ni, zo wa?

¹⁸Gi so lo mu yanga, apembe ti bekpa aga ngu; lo sara si pupu aya si ngu asua.

¹⁹Lo fa tënë ti lo na Jacob, lo fa ambela ti lo nga na atënë ti ndia ti lo na Israel.

²⁰Aye ni so, lo sara ni na ambeni mara pepe, amara ni ahinga atënë ti ndia ti lo pepe. Aleluya!