Read La Bible en Sango courant – Mbeti ti Nzapa Abia (Psaumes) 30 Bible Online

Abia (Psaumes) 30 - La Bible en Sango courant – Mbeti ti Nzapa bible

Abia (Psaumes) 30

¹Bia ti David. A he ni ndali ti matanga ti ziango kota da ti Nzapa na maboko ti lo.

²*KOTA GBIA, mbi ye ti he bia ti fa kota ti mo, ngbanga ti so mo soo mbi na kuâ; mo sara si awato ti mbi ahe mbi pepe.

³KOTA GBIA, Nzapa ti mbi, mbi iri mo ti mu maboko na mbi si mo kai kobela na tere ti mbi.

⁴KOTA GBIA, mo sara si mbi sigigi na ndo ti akuâ; mo sara si mbi ngba na fini na ndembe so mbi yeke zu na ya ti du ti kuâ.

⁵Ala azo ti KOTA GBIA, ala he bia ti gonda na lo; ala sepela lo, ala dabe ti ala so lo yeke nde si lo yeke nzoni kue.

⁶Ngonzo ti lo ayeke ninga gi kete, me lo yeke sara nzoni be na zo na lango ti fini ti zo ni kue. Na lakui, azo angba ti toto, me na ndaperere, ala yeke dekongo na ngia.

⁷Na ndembe so mbi duti kpoo, mbi tene: “Mbeni ye ti yingi mbi ayeke daa pepe.”

⁸KOTA GBIA, na lege ti nzoni be ti mo, mo sara si mbi luti ngangu tongana kota hoto. Me mo honde le ti mo na mbi, nilaa kota mbeto ahon ndö ti mbi.

⁹KOTA GBIA, mbi iri mo ti mu maboko na mbi; mbi voro tere ti mbi na mo, mbi tene:

¹⁰“Tongana mbi kui, nyen laa mo yeke wara na peko ni, nyen? Tongana mbi zu na du ti kuâ, nyen laa mo yeke wara na peko ni, nyen? Zo so aga fuku ti sese awe, lo lingbi ti mu singila na mo? Zo so aga fuku ti sese awe, lo lingbi ti fa so mo yeke bata tënë ti yanga ti mo?

¹¹KOTA GBIA, ma mbi, baa mawa ti mbi! KOTA GBIA, mu maboko na mbi!”

¹²Mo zi vundu na be ti mbi awe si mbi yeke dodo na ngia; mo zi bongo ti mua na tere ti mbi awe si mo yu na mbi bongo ti matanga.

¹³Tongaso mbi yeke he bia na mo na be ti mbi kue; mbi yeke kai pepe. KOTA GBIA, Nzapa ti mbi, mbi yeke mu singila na mo lakue.