Read La Bible en Sango courant – Mbeti ti Nzapa Abia (Psaumes) 44 Bible Online

Abia (Psaumes) 44 - La Bible en Sango courant – Mbeti ti Nzapa bible

Abia (Psaumes) 44

¹Bia ti azo ti Kore; bia so ayeke ndali ti makonzi-bia. Bia ti fango ye na zo.

²Nzapa, e ma na mê ti e wani, ababâ ti e atene na e tënë ti akota ye so mo sara ando na ngoi ti ala, na ngoi ti giriri.

³Na lege ti ngangu ti mo, mo tumba amara nde na ndö ti sese ti ala si mo zia akotara ti e na ndö ti sese ni. Mo sara ngangu na amara ni titene azo ti mo awara ndo.

⁴Ndali ti yongoro zeme ti ala si ala mu sese ni pepe; ndali ti ngangu ti ala si ala so benda pepe. Me ngangu ti mo, maboko ti mo laa asara ye ni, ndali ti so mo baa ala na nzoni le si mo ye ala.

⁵Nzapa ti mbi, mo yeke Gbia ti mbi, mo laa mo yeke mu yanga si azo ti mo ayeke so benda.

⁶Ndali ti mo, e kinda awato ti e; na lege ti iri ti mo, e do na sese azo so ake e.

⁷Mbi zia be ti mbi na ndö ti kokora ti mbi pepe; mbi so benda na lege ti yongoro zeme ti mbi pepe.

⁸Mo laa mo sara si e hon ndö ti awato ti e; mo zia kamene na le ti azo so ake e.

⁹Nzapa, e yeke he bia ti gonda mo lakue; e yeke mu singila na mo lakue. Luti kete

¹⁰Me mo ke e awe, mo zia kamene na le ti e awe. Fadeso mo ke ti gue na aturugu ti e na bira.

¹¹Mo sara si e kpe na le ti awato ti e; azo so ake e agbu aye ti e na peko ti bira ahon na ni.

¹²Mo zia e na maboko ti ala tongana ataba ti fango ni; mo kangbi e kirikiri na popo ti amara nde.

¹³Mo ka azo ti mo na kete ngere, mo wara ye oko na peko ni pepe.

¹⁴Mo mu lege na azo so alango nduru na e ti zonga e; e ga ye ti buba na le ti azo so angoro e, ala yeke he e na ngia.

¹⁵Mo sara si e ga tongana tënë ti toli ti amara nde; azo ayeke he e na ngia si ala yeke yingi li ti ala.

¹⁶Lakue, buba ti mbi gi na le ti mbi, kamene agbu le ti mbi kue

¹⁷tongana mbi yeke ma zonga na dengo ba, wala mbi yeke baa wato so ayeke kiri sioni na e.

¹⁸Ataa so be ti e agirisa na mo pepe, ataa so e buba lege ti *mbuki ti e na mo pepe, aye so kue asi na e.

¹⁹E kiri na peko pepe, e ngba lakue ti tambula na lege ti mo;

²⁰me mo nika e na benyama, mo sara si e duti na ya ti vukongo ndo ti kuâ.

²¹Tongana e girisa lani Nzapa ti e, tongana e sambela lani mbeni nzapa nde,

²²ka mo, Nzapa, mo hinga ni awe pepe? Biani, atënë kue ti be ti zo so angba na hondengo ni, mo hinga ni.

²³Ndali ti mo laa a yeke fâ e lakue, a mu e tongana ataba so a yeke gue na ala na ndo ti fango ala.

²⁴*Kota Gbia, mo zingo na lango ma! Mo lango ngbanga ti nyen? Mo zingo, mo ke e lakue lakue pepe!

²⁵Mo honde le ti mo na e ngbanga ti nyen? Be ti mo agirisa na pasi ti e nga na ye ti ngangu so asi na e ngbanga ti nyen?

²⁶Biani, e lango na ya ti fuku ti sese, e lango taa na ya ti e na ndö ti sese.

²⁷Londo, mo mu maboko na e! Soo e na kuâ ndali ti nzoni be ti mo.