Read La Bible en Sango courant – Mbeti ti Nzapa Abia (Psaumes) 49 Bible Online

Abia (Psaumes) 49 - La Bible en Sango courant – Mbeti ti Nzapa bible

Abia (Psaumes) 49

¹Bia ti azo ti Kore; bia so ayeke ndali ti makonzi-bia.

²Ala, azo ti amara kue, ala ma tënë so, ala azo ti ndö ti dunia kue, ala dingi mê ti ala, ala ma tënë so.

³Ala, asenge zo na akota zo, ala azo ti mosoro na awayere, ala ma tënë so legeoko.

⁴Yanga ti mbi ayeke tene atënë ti ndara, be ti mbi ayeke tene atënë ti hingango ndo.

⁵Mbi yeke zi mê ti mbi ti ma *amato, fade mbi yeke pika kundi si mbi yeke fa na nda ti atënë so ali mingi.

⁶Na ngoi so ye aga ngangu na mbi, na ngoi so azo so sarango ye ti ala ayeke mbirimbiri pepe angoro mbi ti sara sioni na mbi, mbi yeke sara mbeto ngbanga ti nyen?

⁷Azo ni azia be ti ala na ndö ti gba ti ye so ala yeke na ni, ala yeke pika kate ti ala ndali ti mosoro ti ala.

⁸Zo alingbi ti vo fini na mba ti lo pepe, wala lo lingbi ti futa na Nzapa ngere ti fini ti lo wani pepe.

⁹Ngere ti fini ti zo ayeke ngangu mingi, zo alingbi ti futa ni laoko pepe.

¹⁰Zo ayeke ngba ande na fini lakue? Lo yeke li ande na du ti kuâ pepe?

¹¹E baa so, zo ti ndara ayeke kui kuingo, zo ti buba na zo so li ti lo ayeke daa pepe, ala yeke kui kuingo; ala yeke zia aye ti ala na ambeni zo.

¹²Ala baa ti ala atene, da ti ala ayeke ngba lakue lakue, ndo ti duti ti ala ayeke ngba kpu na kpu si ala zia iri ti ala na ndö ti sese ti ala.

¹³Ataa so zo ayeke na mosoro mingi, lo yeke kui tongana nyama; lo yeke ngba na fini pepe.

¹⁴Azo so azia be ti ala mingi na ndö ti ala wani, azo so tënë ti ala wani anzere na ala mingi so, baa ye so ayeke si ande na ala ayeke so:

¹⁵a yeke pusu ala ti gue na ala na ndo ti akuâ tongana ataba; kuâ ayeke tongana wabatango ala. Na ndaperere, azo so sarango ye ti ala ayeke na legeni ayeke hon ndö ti ala. Pendere ti azo ni ayeke hon, ndo ti akuâ si ayeke ga da ti lango ti ala.

¹⁶Me fade Nzapa ayeke futa ngere ti fini ti mbi; biani, lo yeke zi mbi na gbe ti ngangu ti kuâ.

¹⁷Tongana mbeni zo aga zo ti mosoro si anzoni ye asi singo na ya ti da ti lo, mo gi be ti mo pepe,

¹⁸ngbanga ti so na lango ti kuâ ti lo, lo yeke gue na ye oko pepe, anzoni ye ti lo ayeke mu nga peko ti lo oko pepe.

¹⁹So zo ni ade na fini, lo yeke pika kate ti lo, azo ayeke gonda lo, atene: “Ti mo nzoni, aye ti mo kue ayeke tambula nzoni!”

²⁰Me fade lo yeke gue ti wara akotara ti lo so ayeke kiri ti baa le ti lâ pepe so.

²¹Ataa so zo ayeke na mosoro mingi, lo yeke kui tongana nyama; lo hinga so pepe.