Read La Bible en Sango courant – Mbeti ti Nzapa Abia (Psaumes) 52 Bible Online

Abia (Psaumes) 52 - La Bible en Sango courant – Mbeti ti Nzapa bible

Abia (Psaumes) 52

¹Bia so ayeke ndali ti makonzi-bia; bia ti fango ye na zo; bia ti David.

²David ahe bia so na ndembe so Doeg, zo ti mara ti Edom ague, atene na Saul, atene: “Baa David ayeke na da ti Ahimelek”.

³Mo zo ti ngangu, mo yeke gonda tere ti mo ndali ti sioni so mo sara ngbanga ti nyen? Nzoni be ti Nzapa angba lakue.

⁴Menga ti mo agi lege ti sara sioni na azo; menga ti mo ayeke tongana zeme so yanga ni aza, menga ti mo ayapu ti handa na azo.

⁵Mo ye ti mo sioni ye ahon nzoni ye; mo ye tënë ti mvene ahon taa-tënë. Luti kete

⁶Mo ye atënë so kue ayeke buba ndo; menga ti mo ayeke handa azo.

⁷Ndani laa Nzapa ayeke buba ande mo biani biani; lo yeke gboto mo na ya ti da ti mo ti bi mo na gigi; lo yeke zi mo na ndö ti sese ti azo so angba na fini. Luti kete

⁸Fade azo ti mbirimbiri ayeke baa ye ni si ala yeke kpe mbeto ni; ala yeke he mo na ngia, ala tene:

⁹“Ala baa ngangu koli so! Lo mu lani Nzapa tongana ngangu gbagba ti batango lo pepe, me lo zia be ti lo na ndö ti gba ti mosoro ti lo; lo zia nga be ti lo na ndö ti sarango sioni ti lo.”

¹⁰Ti mbi, mbi yeke lakue na da ti Nzapa tongana keke ti olive so akugbe ni angba fini ni; mbi zia be ti mbi na nzoni be ti Nzapa kpu na kpu.

¹¹Fade mbi yeke mu singila na mo lakue ndali ti aye so mo sara. Na le ti azo ti mo, mbi yeke zia be ti mbi ti ku gi mo, ngbanga ti so mo yeke nzoni.